ເມື່ອບໍ່ດົນມານີ້, ເຈົ້າໜ້າທີ່ວິຊາສະເພາະໜ່ວຍງານສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ເມືອງບາຈຽງຈະເລີນສຸກ ໄດ້ເຄື່ອນໄຫວລົງມ້າງກຸ່ມມົ້ວສຸມເສບຢາເສບຕິດ ຢູ່ຖຽງສວນມັນຕົ້ນເຂດບ້ານກະຈິດ, ເມືອງບາຈຽງ ແຂວງຈຳປາ, ເຊິ່ງສາມາດກັກຕົວກຸ່ມເປົ້າໝາຍ 10 ຄົນ, ທີ່ກຳລັງມົ້ວສຸມເສບຢາເສບຕິດປະເພດຢາບ້າ, ດັ່ງນັ້ນ, ເຈົ້າໜ້າທີ່ຈຶ່ງໄດ້ນຳຕົວພວກກ່ຽວມາສຶກສາອົບຮົມຕາມລະບຽບການ.
ຜ່ານການສອບສວນ ພວກກ່ຽວໄດ້ຮັບສາລະພາບຕໍ່ເຈົ້າໜ້າທີ່ວ່າ: ຜ່ານມາແມ່ນໄດ້ເສບຢາເສບຕິດປະເພດຢາບ້າ ຢູ່ຈຸດດັ່ງກ່າວຫຼາຍຄັ້ງແລ້ວ, ເມື່ອເປັນດັ່ງນັ້ນ, ເຈົ້າໜ້າທີ່ຈຶ່ງນຳຕົວພວກກ່ຽວພ້ອມພໍ່ແມ່ຜູ້ປົກຄອງ ແລະ ອຳນາດການປົກຄອງບ້ານມາເປັນສັກຂີພະຍານ, ເພື່ອສຶກສາອົບຮົມກຸ່ມມົ້ວສຸມດັ່ງກ່າວ ໃຫ້ເຂົາເຈົ້າຮັບຮູ້ ແລະ ເຂົ້າໃຈ ກ່ຽວກັບຜົນຮ້າຍຂອງຢາເສບຕິດ ທີ່ເປັນອັນຕະລາຍຕໍ່ຊີວິດ ແລະ ຊັບສິນ, ເຮັດໃຫ້ບ້ານເມືອງບໍ່ມີຄວາມສະຫງົບ.