ທ່ານ ງາມປະສົງ ເມືອງມະນີ, ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ຊີ້ແຈງກ່ຽວກັບເຈລະຈາລາຄາປີ້ຍົນສະໜາມບິນບໍ່ແກ້ວຄືນໃໝ່ ໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ເມື່ອບໍ່ດົນມານີ້, ເຊິ່ງທ່ານໄດ້ກ່າວວ່າ: ສະໜາມບິນສາກົນບໍ່ແກ້ວ ເປັນການລົງທຶນຂອງພາກເອກະຊົນ ທີ່ໄດ້ເຊັນສັນຍາສໍາປະທານກັບກະຊວງແຜນການ ແລະ ການລົງທຶນ, ເຊິ່ງກະຊວງໂຍທາທິການ ແລະ ຂົນສົ່ງ ກໍາລັງເຈລະຈາສັນຍາຄຸ້ມຄອງ ແລະ ບໍລິການສະໜາມບິນດັ່ງກ່າວ ເພື່ອໃຫ້ສໍາເລັດໃນໄວໆນີ້. ການເຈລະຈາດັ່ງກ່າວຈະກໍານົດລາຄາຄ່າບໍລິການພາຍໃນສະໜາມບິນແຫ່ງນີ້ເພາະຖ້າຫາກເກັບຄ່າບໍລິການຢູ່ສະໜາມບິນສູງ ຈະເຮັດໃຫ້ລາຄາປີ້ເຮືອບິນສູງຂຶ້ນ.
ປັດຈຸບັນ, ລັດວິສາຫະກິດການບິນລາວ ຍັງບໍ່ໄດ້ບໍລິການໄປສະໜາມບິນແຫ່ງນີ້ເທື່ອ ເຊິ່ງກະຊວງໂຍທາທິການ ແລະ ຂົນສົ່ງ ພວມຊຸກຍູ້ສົ່ງເສີມຢູ່ ແຕ່ທາງການບິນລາວແຈ້ງມາວ່າ ຜູ້ສໍາປະທານສະໜາມບິນດັ່ງກ່າວເກັບຄ່າບໍລິການສູງເກີນໄປ ເຊິ່ງຈໍາເປັນຕ້ອງໄດ້ມີການເຈລະຈາກັນຄືນໃໝ່ ເພື່ອໃຫ້ລັດວິສາຫະກິດການບິນລາວ ສາມາດບິນບໍລິການບິນໄປສະໜາມບິນສາກົນບໍ່ແກ້ວໃຫ້ໄດ້ໃນອີກບໍ່ດົນນີ້.
ສໍາລັບສະໜາມບິນສາກົນບໍ່ແກ້ວ ຕັ້ງຢູ່ເມືອງຕົ້ນເຜິ້ງ ຢູ່ໃກ້ກັບເຂດເສດຖະກິດພິເສດສາມຫຼ່ຽມຄຳ, ໂຄງການດັ່ງກ່າວ ເປັນການລົງທຶນຂອງ ບໍລິສັດ ກຣິດເຕີເບເອເລຍອິນເວດເມັນແອນດີເວວລົບເມັ້ນ ຈຳກັດ 100% ໃນຮູບແບບ BOT, ເປັນສະໜາມບິນຂະໜາດ Code 4C, ສາມາດຮັບການລົງຈອດຂອງຍົນແອບັດສ໌ A320 ແລະ ໂບອິ່ງ 737, ອາຄານຜູ້ໂດຍສານສາມາດຮອງຮັບຜູ້ໂດຍສານເຂົ້າ-ອອກ 600 ຄົນ ໃນເວລາດຽວກັນ, ມູນຄ່າການລົງທຶນທັງໝົດ 225,358,700 ໂດລາສະຫະລັດ, ອາຍຸສຳປະທານ 50 ປີ, ໂດຍໄດ້ມີພິທີເປີດນໍາໃຊ້ຢ່າງເປັນທາງການໃນວັນທີ 5 ກຸມພາທີ່ຜ່ານມາ.
ຂ່າວ: FM90,0