ໃນໄລຍະ 5 ເດືອນຕົ້ນປີ 2024 ຜ່ານມາ, ທົ່ວແຂວງ ອັດຕະປື ມີອຸບັດເຫດຕາມທ້ອງຖະໜົນເກີດຂຶ້ນ 176 ຄັ້ງ, ມີພາຫະນະເປເພ 294 ຄັນ, ມີຄົນໄດ້ຮັບບາດເຈັບ 249 ຄົນ ແລະ ເສຍຊີວິດ 20 ຄົນ, ທຽບໃສ່ໄລຍະດຽວກັນຂອງປີຜ່ານມາຈຳນວນຜູ້ເສຍຊີວິດເພີ່ມຂຶ້ນ 7 ຄົນ, ລວມມູນຄ່າເສຍຫາຍຈາກການເກີດອຸບັດຕິເຫດທັງໝົດເກືອບ 2 ຕື້ກີບ.
ທ່ານ ຮ້ອຍເອກ ສົມໃຈ ນາມປະກາສິດ ຫົວໜ້າກອງສືບສວນ-ສອບສວນຄະດີອຸບັດເຫດ ກອງບັນຊາການປ້ອງກັນຄວາມສະຫງົບ ແຂວງອັດຕະປື ໄດ້ໃຫ້ສຳພາດໃນວັນທີ 13 ມິຖຸນາ 2024 ນີ້ວ່າ: ສະພາບອຸບັດເຫດຕາມທ້ອງຖະໜົນ ໃນຂອບເຂດທົ່ວແຂວງອັດຕະປື ມີລັກສະນະເພີ່ມຂຶ້ນ ເຖິງແມ່ນວ່າເຈົ້າໜ້າທີ່ຕໍາຫຼວດ ຈະໃຊ້ມາດຕະການຕ່າງໆ ເພື່ອຫຼຸດຜ່ອນການອຸບັດເຫດແລ້ວກໍ່ຕາມ, ເຊິ່ງສາເຫດທີ່ພາໃຫ້ເກີດອຸບັດຕິເຫດແຕ່ລະຄັ້ງ ສ່ວນໃຫຍ່ເກີດຈາກການລະເມີດກົດລະບຽບການສັນຈອນຂອງຜູ້ຂັບຂີ່ ໂດຍສະເພາະ ຂັບຂີ່ລົດໄວເກີນກຳນົດ, ດື່ມສິ່ງມຶນເມົາແລ້ວຂັບຂີ່ ແລະ ອື່ນໆ, ອຸບັດເຫດສ່ວນໃຫຍ່ແມ່ນເກີດຂຶ້ນແຕ່ເວລາ 10 ໂມງ ຫາ 12 ໂມງ ແລະ ອຸບັດເຫດທີ່ເກີດຂຶ້ນແມ່ນຢູ່ໃນກຸ່ມພະນັກງານ-ລັດຖະກອນ, ກໍາມະກອນ ແລະ ກຸ່ມນັກຮຽນ-ນັກສຶກສາ.
ເຊິ່ງຫຼາຍກວ່າໝູ່ແມ່ນຢູ່ເມືອງສາມັກຄີໄຊ ເກີດຂຶ້ນ 72 ຄັ້ງ, ເສຍຊີວິດ 5 ຄົນ, ຮອງລົງມາແມ່ນເມືອງ ໄຊເສດຖາ ເກີດຂຶ້ນ 36 ຄັ້ງ, ເສຍຊີວິດ 7 ຄົນ, ເມືອງ ຊານໄຊ ເກີດຂຶ້ນ 23 ຄັ້ງ, ເສຍຊີວິດ 3 ຄົນ, ເມືອງ ພູວົງ ເກີດຂຶ້ນ 25 ຄັ້ງ, ເສຍຊີວິດ 3 ຄົນ ແລະ ເມືອງ ສະໜາມໄຊ ເກີດຂຶ້ນ 20 ຄັ້ງ, ເສຍຊີວິດ 2 ຄົນ.
ຂ່າວ: ປະເທດລາວ