ເດືອນມິຖຸນາເປັນເດືອນໜຶ່ງທີ່ມີເທສະການອັນສຳຄັນຂອງກຸ່ມຄົນຫຼາກຫຼາຍທາງເພດ ໃນຫຼາຍປະເທດທົ່ວໂລກ, ເຊິ່ງເອີ້ນວ່າ: Pride Month ນັ້ນເອງ, ເປັນເທສະການທີ່ມີການຍ່າງເດີນຂະບວນພາເຣດ, ກິດຈະກຳແຕ່ງຕົວສີສັນສວຍງາມ, ເພື່ອເປັນການສະເຫຼີມສະຫຼອງວັນດັ່ງກ່າວ. ເຊິ່ງຫຼາຍຄົນອາດຈະສົງໄສ ຫຼື ຍັງບໍ່ຮູ້ວ່າ ປະຫວັດຄວາມເປັນມາຂອງ Pride Month ແມ່ນເກີດມາຈາກໃສ? ເມື່ອໃດ? ແລະ ມີຄວາມໝາຍສຳຄັນແນວໃດ, ມື້ນີ້ລາວໂພສຈະໄດ້ຮວບຮວມຂໍ້ມູນມາບອກໃຫ້ຮູ້ໄປນຳກັນ.
![บรรยากาศกิจกรรม Pride Month](https://img.pptvhd36.com/thumbor/2023/05/30/3841f7a.jpg)
ເຊິ່ງມັນໄດ້ເລິ່ມຕົ້ນຂຶ້ນມາຈາກເຫດການທີ່ເກີດຂຶ້ນເມື່ອວັນທີ 28 ມິຖຸນາ ປີ 1969 ທີ່ຮ້ານກິນດື່ມ ” The Stonewall Inn ” ເມືອງນິວຢອກ, ສະຫະລັດອາເມຣິກາ, ຕຳຫຼວດໄດ້ເຂົ້າກວດຄົ້ນ ແລະ ຈັບກຸມຜູ້ຄົນທີ່ຢູ່ພາຍໃນຮ້ານ, ພ້ອມທັງແຈ້ງຂໍ້ຫາການມີພຶດຕິກຳທີ່ຂັດຕໍ່ສິນລະທຳໃນສັງຄົມຄື: ການແຕ່ງກາຍບໍ່ກົງກັບເພດກຳເນີດ, ການຄົບຫາກັນລະຫວ່າງເພດດຽວກັນ. ເຊິ່ງຖືວ່າເປັນການກະທຳຜິດກົດໝາຍຂອງສະຫະລັດອາເມຣິກາໃນເວລານັ້ນ.
![Photo by: PPTV](https://img.pptvhd36.com/thumbor/2023/05/30/4358823.jpg)
ເມື່ອເກີດເຫດການດັ່ງກ່າວຂຶ້ນ, ກໍໄດ້ມີກຸ່ມຄົນທີ່ບໍ່ເຫັນດີ ພາກັນລວມຕົວກັນຊຸມນຸມປະທ້ວງເພື່ອທວງຄວາມມີສິດເສລີພາບຂອງກຸ່ມຄົນຫຼາກຫຼາຍທາງເພດເກີດຂຶ້ນ, ເຊິ່ງກະແສການຊຸມນຸມໄດ້ແຜ່ລາມອອກໄປຢ່າງກວ້າງຂວາງ, ບໍ່ສະເພາະແຕ່ໃນເມືອງນິວຢອກເທົ່າ, ແຕ່ລາມອອກໄປເຖິງຫຼາຍເຂດ, ລາຍເມືອງໃນສະຫະລັດອາເມຣິກາ.
![Pride Month คืออะไร ทำไมต้องมิถุนายน เหตุใด \'สีรุ้ง\' จึงเป็นตัวแทน LGBTQ+](https://image.bangkokbiznews.com/uploads/images/contents/w1024/2024/05/JTEeOz1sueqSZtL9ennJ.webp?x-image-process=style/lg-webp)
-ມາຮອດປີ 2000 ປະທານາທິບໍດີ ບິລ ຄລີນຕັນ ໄດ້ປະກາດໃຫ້ເດືອນມິຖຸນາເປັນເດືອນແຫ່ງຄວາມພາກພູມໃຈຂອງຊາວເກ ແລະ ເລສບຽນ. ໃນປີ 2009 ປະທານາທິບໍດີ ບາຣັກ ໂອບາມາ ໄດ້ປະກາດໃຫ້ເດືອນດັ່ງກ່າວເປັນເດືອນແຫ່ງຄວາມພາກພູມໃຈຂອງກຸ່ມຄົນຫຼາກຫຼາຍທາງເພດ.ຫຼັງຈາກນັ້ນ, ເມື່ອຮອດເດືອນດັ່ງກ່າວໃນທຸກໆປີ ກໍຈະມີການສະເຫຼີມສະຫຼອງຜ່ານການຍ່າງເດີນຂະບວນພາເຣດ, ຈັດກິດຈະກຳຕ່າງໆ, ການນຸ່ງເຄື່ອງຫຼາກຫຼາຍສີສັນ ເພື່ອເປັນການສະແດງອອກເຖິງການມີສິດເສລີພາບ ແລະ ການເປັນກຸ່ມຄົນຫຼາກຫຼາຍທາງເພດ.
ໃນຫຼາຍໆປີຕໍ່ມາ ຈົນມາເຖິງປັດຈຸບັນນີ້, ກິດຈະກຳດັ່ງກ່າວໄດ້ແຜ່ຂະຫຍາຍອອກມາສູ່ຫຼາຍປະເທດໃນທະວີບເອີຣົບ ແລະ ອາຊີ, ເຊິ່ງປະເທດເພື່ອນບ້ານຂອງພວກເຮົາຢ່າງປະເທດໄທ ກໍມີການຈັດງານດັ່ງກ່າວຂຶ້ນເມື່ອວັນທີ 1 ມິຖຸນາທີ່ຜ່ານມາໃນເຂດບາງກອກ. ເຖິງແມ່ນວ່າຫຼາຍໆປະເທດຈະເປີດກວ້າງເລື່ອງການສະເຫຼີມສະຫຼອງເດືອນຂອງກຸ່ມຄົນຫຼາກຫຼາຍທາງເພດແລ້ວ, ແຕ່ກໍຍັງມີບາງປະເທດທີ່ຍັງບໍ່ໄດ້ຮັບການຍອມຮັບແຕ່ຢ່າງໃດ.
![บรรยากาศกิจกรรม Pride Month](https://img.pptvhd36.com/thumbor/2023/05/30/7800517.jpg)
ນອກຈາກຈະມີເດືອນແຫ່ງການສະເຫຼີມສະຫຼອງ ກຸ່ມຄົນຫຼາກຫຼາຍທາງເພດ (Pride Month) ແລ້ວ, ຍັງມີກົດໝາຍເລື່ອງສົມລົດເທົ່າທຽມ ເປັນກົດໝາຍທີ່ຄົນເພດດຽວກັນສາມາດແຕ່ງງານ ແລະ ຈົດທະບຽນການແຕ່ງງານກັນຢ່າງຖືກກົດໝາຍໂດຍມີ 31 ປະເທດທົ່ວໂລກທີ່ອະນຸຍາດຄື: ປະເທດເນເທີແລນ, ປະເທດເບວຢ່ຽມ, ປະເທດອາຟຣິກາໃຕ້, ປະເທດໄຕ້ຫວັນ…..
![ซะเร็นไพรด์ - Surin Pride](https://ichef.bbci.co.uk/ace/ws/640/cpsprodpb/3534/production/_125702631_8a7be312-9da4-4a0d-a300-386b345e35cb.jpg.webp)
ເດືອນດັ່ງກ່າວຖືໄດ້ວ່າເປັນເດືອນໜຶ່ງທີ່ສຳຄັນຂອງກຸ່ມຄົນຫຼາກຫຼາຍທາງເພດ ທີ່ມີສິດເສລິພາບໃນການສະແດງອອກເຖິງການມີສິດ ແລະ ມີຄວາມເທົ່າທຽມໃນສັງຄົມ, ບໍ່ວ່າຈະເປັນຄົນສີຜິວແບບໃດ, ເພດໃດກໍຕາມ ກໍສາມາດມັກຮັກກັນໄດ້, ເພາະຄວາມຮັກເປັນສິ່ງສວຍງາມຂອງຄົນສອງຄົນທີ່ມີໃຫ້ຕໍ່ກັນ.
ຂໍ້ມູນຈາກ: thestandard, thaipbs