ເມື່ອບໍ່ດົນມານີ້, ທ່ານ ໄພວີ ສີບົວລິພາ ລັດຖະມົນຕີ ກະຊວງຍຸຕິທໍາ ໄດ້ຕ້ອນຮັບທ່ານ Bakhodir BURKHANOV ໃນໂອກາດທີ່ມາດໍາລົງຕໍາແໜງ ເປັນຜູ້ປະສານງານອົງການສະຫະປະຊາຊາດ ປະຈໍາ ສປປ ລາວ, ພ້ອມນັ້ນ ກໍສະແດງຄວາມຂອບອົກຂອບໃຈ ຕໍ່ອົງການສະຫະປະຊາຊາດ ທີ່ໄດ້ໃຫ້ການສະໜັບສະໜູນ, ຊ່ວຍເຫຼືອ ສປປ ລາວ, ພ້ອມນີ້ໄດ້ແຈ້ງສະພາບການເຄື່ອນໄຫວວຽກງານຂອງຂະແໜງ ການຍຸຕິທໍາ, ການສ້າງລັດທີ່ປົກຄອງດ້ວຍກົດໝາຍ, ການບໍລິ ການວຽກງານຍຸຕິທໍາ ແລະ ການເຂົ້າເຖິງຄວາມຍຸຕິທໍາ, ການສ້າງຄວາມເຂັ້ມແຂງໃຫ້ທະນາຍຄວາມ, ເຊິ່ງເປັນວຽກງານໜຶ່ງທີ່ນອນຢູ່ໃນການສະໜັບສະໜູນຂອງອົງການສະຫະປະຊາຊາດ.
ທ່ານ Bakhodir BURKHANOV ໄດ້ສະແດງຄວາມຂອບໃຈ ຕໍ່ທ່ານ ລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ໄດ້ຢັ້ງຢືນເຖິງບັນດາເປົ້າໝາຍວຽກງານ ທີ່ຈະສືບຕໍ່ຈັດຕັ້ງປະຕິບັດ, ພ້ອມນັ້ນ ທ່ານ ລັດຖະມົນຕີ ແລະ ທ່ານ Bakhodir BURKHANOV ຍັງໄດ້ແລກປ່ຽນຄໍາເຫັນກ່ຽວກັບການຮ່ວມມືໃນຕໍ່ໜ້າ.
ຂ່າວ: ນັກຂ່າວກະຊວງ ຍຸຕິທຳ