ເມື່ອບໍ່ດົນມານີ້, ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງສາລະວັນ ໄດ້ນຳຕົວໄວລຸ້ນ 4 ຄົນ ທີ່ຮ່ວມກັນປຸ້ນເອົາລົດຈັກ ມາດຳເນີນສອບສວນ, ພາຍຫຼັງທີ່ເຈົ້າໜ້າທີ່ ກັກຕົວພວກກ່ຽວໄດ້ ແລ້ວສົ່ງໂຕພວກກ່ຽວມາດຳເນີນຄະດີຕາມກົດໝາຍ.ຜູ້ຖືກຫາທັງ 4 ຄົນ ຊື່ ທ້າວ ຄຳຈັນ, ອາຍຸ 20 ປີ, ຢູ່ບ້ານນາຂ້ອຍສາວ, ທ້າວ ແອນ້ອຍ, ອາຍຸ 17 ປີ, ທ້າວ ສີສົມພອນ, ອາຍຸ 15 ປີ ທັງ ສອງຄົນນີ້ຢູ່ບ້ານນາໄຊນ້ອຍ ແລະ ທ້າວ ໂຊນິກ, ອາຍຸ 19 ປີ, ຢູ່ບ້ານສະໂປນ ເມືອງສາລະວັນ, ແຂວງສາລະວັນ.
ຜ່ານການສອບສວນ ຜູ້ຖືກຫາ ທັງ 4 ຄົນ ສາລະພາບວ່າ: ໄດ້ຮ່ວມກັນເຄື່ອນໄຫວປຸ້ນເອົາລົດຈັກ ຢູ່ຕາມເສັ້ນທາງເລກທີ 20, ເລກທີ 15 A,15B ແລະ ເສັ້ນທາງຮ່ອມບໍລິເວນອະນຸສອນສະຖານອົງແກ້ວ-ສວນສາທາລະນະ ແລະ ໄດ້ຮ່ວມກັນປຸ້ນເອົາຈັກຂອງຜູ້ເສຍຫາຍ ເປັນຍິງສາວ 3 ຄົນ ຂັບຂີ່ຊ້ອນກັນມາ, ໂດຍໃຊ້ຮູບການຂັບຂີ່ລົດຈັກແນບຂ້າງລົດຈັກເປົ້າໝາຍ, ຫຼັງຈາກນັ້ນໃຊ້ຕີນຢັນລົດຈັກຄັນດັ່ງກ່າວ ໃຫ້ເສຍຫຼັກລົ້ມລົງຂ້າງທາງ ແລ້ວກໍໃຊ້ມີດ ແລະງ້າວ ລົງໄປນາບຂູ່, ເຮັດໃຫ້ຜູ້ເສຍຫາຍທັງ 3 ຄົນ ແລ່ນລົບໜີ.ຈາກນັ້ນ, ກໍພາກັນເອົາລົດຈັກທີ່ປຸ້ນມາໄປຊຸກເຊື່ອງໄວ້ຢູ່ຖຽງນາ ຢູ່ເຮືອນທ້າວ ປ້ອມ ຢູ່ບ້ານສະໂປນ, ເມືອງສາລະວັນ. ສ່ວນລົດຈັກທີ່ປຸ້ນມາໄດ້ ແມ່ນເອົາໃຫ້ໝູ່ຈ່າວຂາຍ ເມື່ອໄດ້ເງິນມາ ກໍແບ່ງປັນກັນໃຊ້ຈ່າຍຫຼິ້ນກີນຟຸມເຟືອຍຈົນໝົດ.
ປັດຈຸບັນ, ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງສາລະວັນ ຈະໄດ້ສອບສວນຂະຫຍາຍຜົນໃຫ້ລະອຽດ ເພື່ອຕິດຕາມເກັບກູ້ລົດຈັກທີ່ພວກກ່ຽວປຸ້ນໄປຂາຍ ມາມອບຄືນໃຫ້ເຈົ້າຂອງເດີມ ແລະ ຈະໄດ້ສະຫຼຸບສຳນວນຄະດີສົ່ງໃຫ້ອົງການໄອຍະການສັ່ງຟ້ອງສານຕັດສິນລົງໂທດຕາມກົດໝາຍ.
ຂ່າວ: ຄວາມສະຫງົບ