ເມື່ອບໍ່ດົນມານີ້, ເຈົ້າໜ້າທີ່ຕຳຫຼວດຈະລາຈອນ ປກສ ເມືອງຊໍາເໜືອ ແຂວງຫົວພັນ, ໄດ້ອອກລາດຕະເວນຕາມເສັ້ນທາງຕ່າງໆ ຂອງເທດສະບານເມືອງຊໍາເໜືອ ແລະ ໄດ້ພົບເຫັນກຸ່ມໄວລຸ້ນອາຍຸແຕ່ 14 ປີ ຫາ19 ປີ ຂັບຂີ່ລົດກວນເມືອງ ບໍ່ຖືກລະບຽບການສັນຈອນ 4 ຄົນ, ຫຼັງຈາກນັ້ນກໍໄດ້ກັກຕົວມາສຶກສາອົບຮົມ ພ້ອມຍຶດລົດຈັກຂອງພວກກ່ຽວ, ເຊິ່ງສະພາບລົດຈັກໄດ້ດັດແປງເຕັກນິກຄື: ໃສ່ທໍ່ສູດ, ໃສ່ຕີນນ້ອຍ, ໃຊ້ຄວາມດັງເກີນຂອບເຂດ, ສ້າງຄວາມເນືອງນັນ ແລະ ເຮັດໃຫ້ສັງຄົມບໍ່ມີຄວາມເປັນລະບຽບຮຽບຮ້ອຍ.
ຕໍ່ກັບເຫດການທີ່ເກີດຂຶ້ນພວກກ່ຽວໄດ້ປະຕິຍານຕໍ່ເຈົ້າໜ້າທີ່ວ່າ: ນັບແຕ່ມື້ນີ້ເປັນຕົ້ນໄປ ຈະບໍ່ເຂົ້າຮ່ວມ ແລະ ຂີ່ລົດກວນເມືອງອີກ, ຖ້າຫາກວ່າພວກກ່ຽວຍັງດື້ດ້ານຂັບຂີ່ລົດກວນເມືອງ ແລະ ດັດແປງສະພາບເຕັກນີກຂອງລົດອີກ ແມ່ນໃຫ້ເຈົ້າໜ້າທີ່ດໍາເນີນຕາມລະບຽບຂອງກົດໝາຍ ແລະ ຢຶດລົດໄວ້ເປັນຂອງລັດ.
ຂ່າວ: ປກສ ແຂວງຫົວພັນ