ຈາກກໍລະນີທີ່ສື່ສັງຄົມອອນລາຍເພຈ News Times ໄດ້ແຊວີດີໂອຈາກເຟສບຸກຊື່ນາງ ເກດ ວົງຄຳຊາວ, ບ້ານໂສດ, ເມືອງໂຂງ ແຂວງຈຳປາສັກ, ໂດຍໃສ່ຫົວຂໍ້ວ່າ: ນ້ຳຂອງຖ້ວມບ້ານໂສດ, ເມືອງໂຂງ ແຂວງຈຳປາສັກ ລົງໃນເພຈຂອງຕົນ ໃນວັນທີ 27 ພຶດສະພາທີ່ຜ່ານມາ, ເຮັດໃຫ້ສັງຄົມສັບສົນ ຫຼື ເຂົ້າໃຈຜິດວ່າ: ບ້ານໂສດ ແມ່ນຖືກນ້ຳຂອງຖ້ວມແທ້.
ນາຍບ້ານໂສດ ໄດ້ໃຫ້ຮູ້ວ່າ: ໃນຕອນເຊົ້າວັນທີ 25 ພຶດສະພາທີ່ຜ່ານມາ, ໄດ້ເກີດມີສະພາບຝົນຕົກໜັກ ເປັນເຫດເຮັດໃຫ້ນ້ຳປ່າທີ່ໄຫຼມາຈາກຕົ້ນແມ່ນ້ຳກໍຄືຫ້ວຍໂສດ ໄຫຼມາເປັນຈຳນວນຫຼາຍແລ້ວລົ້ນຝັ່ງເຂົ້າໃສ່ພື້ນທີ່ບ້ານເຮືອນຂອງປະຊາຊົນກະທັນຫັນ ທີ່ຕັ້ງຢູ່ລຽບຕາມແຄມແມ່ນ້ຳ, ພ້ອມທັງໄຫຼຂ້າມທາງຄວາມຍາວປະມານ 100 ແມັດ; ແຕ່ສະພາບນ້ຳຖ້ວມ 2-3 ຊົ່ວໂມງນ້ຳກໍ່ຫຼຸດລົງ, ເຮັດໃຫ້ການສັນຈອນໄດ້ເປັນປົກກະຕິ.