5 ເດືອນຕົ້ນປີ 2024 ທົ່ວປະເທດເກີດອັກຄີໄພ ທັງໝົດ 96 ຄັ້ງ

0
541

ໄລຍະ 5 ເດືອນຕົ້ນປີ 2024 ນີ້, ທົ່ວປະເທດເກີດອັກຄີໄພ ທັງໝົດ 96 ຄັ້ງ, ມີຜູ້ເສຍຊີວິດ 6 ຄົນ, ບາດເຈັບ 2 ຄົນ, ອາຄານທີ່ຢູ່ອາໄສເສຍຫາຍ 62 ຫລັງ, ວັດ 2 ຫລັງ, ໂຮງເລື່ອຍ 2 ຫລັງ, ຫໍຄອຍເດີ່ນບິນເກົ່າ 1 ຫລັງ, ແຄ້ມກຳມະກອນ 1 ຫລັງ ແລະ ອື່ນໆ ລວມມູນຄ່າຄວາມເສຍຫາຍທັງໝົດ 38 ຕື້ກວ່າກີບ.

ທ່ານ ພັນເອກ ວິລະພອນ ວົງຄຳມູນຕີ ຫົວໜ້າກົມຕຳຫລວດສະກັດກັ້ນ ແລະ ຕ້ານອັກຄີໄພ ກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບ ໃຫ້ສຳພາດໃນວັນທີ 22 ພຶດສະພາ 2024 ວ່າ: 5 ເດືອນຕົ້ນປີ 2024 ສະພາບອັກຄີໄພໃນຂອບເຂດທົ່ວປະເທດ ມີທ່າອ່ຽງຫລຸດລົງ ຖ້າສົມທຽບໃນໄລຍະດຽວກັນຂອງປີຜ່ານມາ ເຖິງ 27 ຄັ້ງ ເນື່ອງຈາກສະພາບໄຟໄໝ້ລາມປ່າໃນປີນີ້ນ້ອຍລົງ. ໃນໄລຍະຜ່ານມາ, ອັກຄີໄພເກີດຂຶ້ນສ່ວນໃຫຍ່ແມ່ນເກີດຈາກໄຟຟ້າລັດວົງຈອນ, ເລິນເລີ້ຂາດສະຕິໃນການຊົມໃຊ້ຟື້ນ-ໄຟ, ລະບົບເຕັກນິກຂັດຂ້ອງ ແລະ ອື່ນໆ, ອັກຄີໄພທີ່ເກີດຂຶ້ນສ້າງຄວາມເສຍຫາຍຫລາຍກວ່າໝູ່ແມ່ນເຫດການໄຟໄໝ້ສາງເກັບມ້ຽນເຄື່ອງຂອງຄົນຈີນ ເຊິ່ງເປັນສະຖານທີ່ເກັບມ້ຽນເຄື່ອງຫລິ້ນເກົ່າ ຢູ່ເຂດບ້ານຮ່ອງຄ້າ ເມືອງຈັນທະບູລີ ນະຄອນຫລວງວຽງຈັນ ສ້າງຄວາມເສຍຫາຍຫລາຍກວ່າ 10 ລ້ານກວ່າຢວນ (ສະກຸນເງິນຈີນ) ແລະ ເຫດການໄຟໄໝ້ລາມປ່າຈາກປະຊາຊົນຈູດໄຮ່ ເພື່ອທຳການຜະລິດເຮັດໃຫ້ມີຜູ້ເສຍຊີວິດ 2 ຄົນ ຢູ່ເມືອງປາກແບງ ແຂວງອຸດົມໄຊ ແລະ ກໍລະນີອື່ນໆ.

ສຳລັບທິດທາງແຜນການໃນຕໍ່ໜ້າ, ກົມຕຳຫລວດສະກັດກັ້ນ ແລະ ຕ້ານອັກຄີໄພ ຈະສືບຕໍ່ເອົາໃຈໃສ່ຊຸກຍູ້ຕິດຕາມ, ກວດກາ, ນຳພາ-ຊີ້ນຳ ບັນດາພະແນກສະກັດກັ້ນ ແລະ ຕ້ານອັກຄີໄພ ປກສ ແຂວງ, ນະຄອນຫລວງ ໃຫ້ເຄື່ອນໄຫວວຽກງານ ວິຊາສະເພາະຕາມພາລະບົດບາດຢ່າງແຂງແຮງ ເພື່ອຮັບປະກັນຄວາມປອດໄພດ້ານອັກຄີໄພ ແລະ ປະຕິບັດໜ້າທີ່ວຽກງານໃຫ້ມີປະສິດທິຜົນສູງ; ລົງເຄື່ອນໄຫວຕົວຈິງຕາມພື້ນຖານຕ່າງໆ ໃນການກວດກາຄວາມປອດໄພດ້ານອັກຄີໄພ, ໂຄສະນາເຜີຍແຜ່ກົດໝາຍ, ນິຕິກໍາຕ່າງໆ, ຝຶກອົບຮົມວິຊາສະເພາະໃຫ້ແຕ່ລະພື້ນຖານ ມີຄວາມຮັບຮູ້ເຂົ້າໃຈເພື່ອຄວາມປອດໄພດ້ານອັກຄີໄພ; ປະຈຳການກຽມພ້ອມສູ້ຮົບຕະຫລອດ 24 ຊົ່ວໂມງ, ບຳລຸງຮັກສາພາຫະນະ-ອຸປະກອນ, ປ້ອງກັນວັນສຳຄັນຕ່າງໆ ຂອງພັກ-ລັດ, ກອງປະຊຸມສຸດຍອດອາຊຽນ ແລະ ອື່ນໆ ໃຫ້ມີຄວາມປອດໄພ; ສ້າງບັນດານິຕິກຳ (ດຳລັດ, ມາດຕະການຄວາມປອດໄພດ້ານອັກຄີໄພ, ຂໍ້ຕົກລົງ, ຂໍ້ກຳນົດເພື່ອຮັບໃຊ້ວິຊາສະເພາະ.

ໂອກາດນີ້, ທ່ານ ພັນເອກ ວິລະພອນ ວົງຄຳມູນຕີ ຍັງຝາກເຖິງພໍ່-ແມ່ປະຊາຊົນໃນຂອບເຂດທົ່ວປະເທດ ຈົ່ງມີສະຕິຕໍ່ວຽກງານສະກັດກັ້ນ ແລະ ຕ້ານອັກຄີໄພເພື່ອຄວາມປອດໄພໃຫ້ແກ່ສຸຂະພາບ, ຊິວິດ ແລະ ຊັບສິນຕ່າງໆ ບໍ່ໃຫ້ເສຍຫາຍຍ້ອນການເກີດອັກຄີໄພ; ເອົາໃຈໃສ່ກວດກາລະບົບໄຟຟ້າ, ອຸປະກອນເຄື່ອງໃຊ້ໄຟຟ້າຕ່າງໆໃຫ້ຢູ່ໃນສະພາບສົມບູນ, ຖ້າເຫັນວ່າເກົ່າແກ່, ເປ່ເພບໍ່ຮັບປະກັນ ຕ້ອງສ້ອມແປງ ຫລື ປ່ຽນໃໝ່, ທຸກຄັ້ງທີ່ໃຊ້ອຸປະກອນເຄື່ອງໃຊ້ໄຟຟ້າສຳເລັດແລ້ວຕ້ອງປິດ ແລະ ຖອດປັກສຽບອອກ; ການຈູດທູບ, ໄຕ້ທຽນບູຊາ ຕ້ອງມີການຕິດຕາມພາຍຫລັງສຳເລັດຕ້ອງມອດໃຫ້ລະອຽດ, ຮ້ານບູຊາຕ້ອງເຮັດດ້ວຍວັດຖຸທີ່ໄຟໄໝ້ຍາກ, ຫ່າງໄກຈາກວັດຖຸໄວໄຟ ແລະ ໄໝ້ງ່າຍ; ການຄຸ້ມຄອງ, ການນຳໃຊ້, ການຂົນສົ່ງ ແລະ ຈຳໜ່າຍວັດຖຸໄວໄຟ-ທາດເຄມີ ຕ້ອງປະຕິບັດຕາມມາດຕະຖານເຕັກນິກຄວາມປອດໄພທາງດ້ານອັກຄີໄພຢ່າງເຂັ້ມງວດ.

ແຫຼ່ງຂ່າວ: ປະເທດລາວ