ພະແນກໂຍທາທິການ ແລະ ຂົນສົ່ງ ແຂວງໄຊສົມບູນ ໄດ້ຈັດພິທີເປີດທົດລອງບໍລິການຂົນສົ່ງໂດຍສານບໍ່ເສຍຄ່າບໍລິການພາຍໃນເທດສະບານ ແຂວງໄຊສົມບູນ ໃນຕອນເຊົ້າຂອງວັນທີ 14 ພຶດສະພາທີ່ຜ່ານມາ, ຢູ່ທີ່ເດີ່ນພະແນກຂອງຕົນ ໃຫ້ກຽດເຂົ້າຮ່ວມໂດຍທ່ານ ຄຳພຸດ ແກ້ວວົງພອນ ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງໄຊສົມບູນ.
ທ່ານ ຄຳພຸດ ແກ້ວວົງພອນ ໄດ້ໃຫ້ຮູ້ວ່າ: ລົດເມຂະໜາດນ້ອຍ ທີ່ມາຮັບໃຊ້ການບໍລິການ ຈຳນວນ 20 ຄັນ ແມ່ນໄດ້ຮັບການ ຊ່ວຍເຫລືອລ້າ ຈາກບໍລິສັດບູຢອງລາວ ຈຳກັດ ແລະ ກົມຂົນສົ່ງ ກະຊວງໂຍທາທິການ ແລະ ຂົນສົ່ງ ໄດ້ຈັດສັນ, ແບ່ງປັນ ໃຫ້ແຂວງໄຊສົມບູນ, ເພື່ອນຳໃຊ້ເຂົ້າໃນການພັດທະນາລະບົບການຂົນສົ່ງ ສາທາລະນະຂອງແຂວງ ແລະ ເມືອງ ເພື່ອອຳນວຍຄວາມສະດວກສະບາຍໃຫ້ແກ່ປະຊາຊົນ, ນັກຮຽນ, ນັກສຶກສາ, ນັກທ່ອງທ່ຽວເດີນທາງສະດວກສະບາຍ, ຫຼຸດຜ່ອນການນຳໃຊ້ລົດສ່ວນຕົວ, ປະຢັດພະລັງງານເຊື້ອໄຟ ແລະ ແກ້ໄຂການສັນຈອນແອອັດ ໃຫ້ມີຄວາມສະດວກ ແລະ ວ່ອງໄວ, ພ້ອມທັງບໍລິການຂົນສົ່ງຢູ່ພາຍໃນແຂວງ ແລະ ເມືອງ.
ລົດເມດັ່ງກ່າວຈະທົດລອງຂົນສົ່ງສາທາລະນະ, ບໍລິການບໍ່ເສຍຄ່າໃນເຂດເທດສະບານແຂວງ, ບ້ານອອມ, ບ້ານອ່າວ, ບ້ານນໍ້າໂມ້ ແລະ ບ້ານນໍ້າຍອນ ເປັນເວລາ 2 ວັນຄື: ວັນອັງຄານ ແລະ ວັນພະຫັດ.
ພາບ-ຂ່າວ: ສີລິພອນ ສົງຄຳ