ລູກໃຈຮ້າຍ ຂໍເງິນໄປຊື້ເຫຼົ້າ ພໍ່ຈົກເງິນໃຫ້ຊ້າ ຊົກໜ້າພໍ່ຫົວຟາດຂອບໂຕະເສຍຊີວິດ

0
389

ເຈົ້າໜ້າທີ່ຕຳຫຼວດໄທລາຍງານໃນວັນທີ 25 ເມສາ 2024 ນີ້ ໄດ້ຮັບແຈ້ງເຫດລູກທຳຮ້າຍຮ່າງກາຍພໍ່ແທ້ໆຈົນເສຍຊີວິດ ທີ່ບ້ານ ດອນຮັກ ເມືອງ ທ່າມະກາ ແຂວງ ການຈະນະບູລີ ຈາກການກວດສອບຂອງເຈົ້າໜ້າທີ່ເບື້ອງຕົ້ນພົບສົບຊາຍອາຍຸ 53 ປີ ນອນເສຍຊີວິດຢູ່ກ້ອງໂຕະ ບໍລິເວນດ້ານຫຼັງຫົວມີຮອຍແຕກ ຕຳຫຼວດຈຶ່ງຄວບຄຸມໂຕຜູ້ກໍ່ເຫດໄວ້ກໍຄືຊາຍອາຍຸ 31 ປີເປັນລູກຊາຍຂອງຜູ້ເສຍຊີວິດ.

ຜູ້ກໍ່ເຫດເລົ່າວ່າ: ໄດ້ຜິດຖຽງກັນກັບພໍ່ ແລະ ຜູ້ເປັນພໍ່ຈະຊົກຕົນເອງກ່ອນ ຕົນຈຶ່ງໄດ້ຊົກໜ້າພໍ່ 3 ບາດຈົນພໍ່ລົ້ມລົງຫົວຟາດກັບຂອບໂຕະ ທາງດ້ານເມຍໃໝ່ຂອງຜູ້ເສຍຊີວິດໄດ້ເລົ່າເຫດການວ່າ: ລູກຊາຍໄດ້ນັ່ງຖ້າຢູ່ບ້ານ ແລ້ວຍ່າງມາຂໍເງິນເພື່ອຈະໄປຊື້ເຫຼົ້າຂາວ ແຕ່ເປັນຈັງຫວະທີ່ຜູ້ຕາຍລົມໂທລະສັບ ກັບເມຍເກົ່າເພື່ອທີ່ຈະຂໍເງິນໃຫ້ກັບລູກຊາຍ ຊ່ວງເວລານັ້ນຈຶ່ງເຮັດໃຫ້ລູກຊາຍບໍ່ພໍໃຈວ່າເປັນຫຍັງຄືຈົກເງິນໃຫ້ຊ້າ ຈຶ່ງໄດ້ຜິດຖຽງກັນຈົນຕ້ອງລົງມືຕີກັນ.

ທາງດ້ານເຈົ້າໜ້າທີ່ໄດ້ຄວບຄຸມໂຕໄປສືບສວນສອບສວນ ພ້ອມແຈ້ງຂໍ້ກ່າວຫາທຳຮ້າຍຮ່າງກາຍຈົນເປັນເຫດເຮັດໃຫ້ຜູ້ອື່ນຕ້ອງເສຍຊີວິດ ກ່ອນສົ່ງໃຫ້ພະນັກງານສອບສວນດຳເນີນຄະດີຕາມກົດໝາຍຕໍ່ໄປ.