ສຳນັກຂ່າວ ເອເອັບພີ ລາຍງານໃນວັນທີ 2 ເມສາ 2024 ກ່ຽວກັບຄວາມຄືບໜ້າຄະດີ ຄາຕະກຳເພື່ອຮັກສາກຽດ ສຸດສະເທືອນໃຈໃນປາກີສະຖານ ຫຼັງຈາກຊາຍຄົນໜຶ່ງລົງມືບີບຄໍນ້ອງສາວຈົນຂາດອາກາດ ແລະ ເສຍຊີວິດ ເພາະຈັບໄດ້ວ່າລັກລົມກັບຊາຍໜຸ່ມແປກໜ້າຫຼາຍຄັ້ງ ແລະ ເບິ່ງວ່າເປັນພຶດຕິກຳທີ່ເຮັດໃຫ້ຄອບຄົວເສື່ອມເສຍຊື່ສຽງ.
ຕາມການລາຍງານຜູ້ເສຍຊີວິດຊື່ວ່່າ: ນາງ ມາເລຍ ບີບີ ອາຍຸ 22 ປີ ຖືກ ທ້າວ ມູຮາມັດ ໄຟຊານ ຜູ້ເປັນອ້າຍແທ້ໆ ລົງມືຄາຕະກຳໃນຄືນວັນທີ 17 ມີນາ 2024 ຜ່ານມາ ຫຼັງຈັບໄດ້ວ່ານ້ອງສາວລົມກັບຊາຍແປກໜ້າຫຼາຍຄັ້ງ.
ທາງດ້ານຕຳຫຼວດໄດ້ເປີດເຜີຍວ່າ: ໃນລະຫວ່າງການລົງມືຄາຕະກຳ ທ້າວ ອັບດຸນ ຊັດຕາ ຜູ້ເປັນພໍ່ກໍຢູ່ໃນເຫດການທີ່ເກີດຂຶ້ນພາຍໃນບ້ານໃກ້ເມືອງໂຕບາ ເຕັກຊິງ ແຄວ້ນປັນຈາບ ສ່ວນຄົນທີ່ບັກທຶກຄຣິບວີດີໂອ ຄື ທ້າວ ຊີບຣາດ ເປັນອ້າຍອີກຄົນຂອງຜູ້ເສຍຊີວິດ.
ທັງນີ້ ສັງຄົມປາກີສະຖານສ່ວນຫຼາຍຍັງປະຕິບັດຕາມຫຼັກການຮັກສາກຽດຢ່າງເຄັ່ງຄັດ ຜູ້ຍິງຕ້ອງໄດ້ເພຶ່ງພາການຕັດສິນໃຈຂອງພີ່ນ້ອງທີ່ເປັນຜູ້ຊາຍບທັງເລື່ອງການສຶກສາ, ການເຮັດວຽກ, ລວມທັງຊາຍທີ່ຈະແຕ່ງງານດ້ວຍ ສົ່ງຜົນໃຫ້ແຕ່ລະປີມີຜູ້ຍິງປາກີສະຖານຫຼາຍຮ້ອຍຄົນຖືກຄາຕະກຳເນື່ອງຈາກເຮັດຜິດຫຼັກການເຄົາລົບກຽດ, ທາງດ້ານຄະນະກຳມະການສິດທິມະນຸດແຫ່ງປາກີສະຖານລະບຸວ່າເມື່ອປີ 2022 ເກີດຄະດີທີ່ຜູ້ຍິງຖືກຄາຕະກຳດ້ວຍເຫດຜົນເພື່ອຮັກສາກຽດຈຳນວນ 316 ຄົນແຕ່ຄາດວ່າຕົວເລກແທ້ໜ້າຈະສູງກວ່ານີ້ເພາະຫຼາຍກໍລະນີບໍ່ໄດ້ແຈ້ງຕຳຫຼວດເນື່ອງຈາກຄອບຄົວຕ້ອງການປົກປ້ອງຄົນລົງມືເຊິ່ງມັກເປັນພີ່ນ້ອງຜູ້ຊາຍ.