ກຸ່ມບໍລິສັດ ຕັງຈະເລີນ ຈໍາກັດ ບໍລິສັດຮັບເໝົາປັບປຸງ ແລະ ສ້ອມແປງທາງ 13 ເໜືອ ໄລຍະແຕ່ສີໄຄ-ສີເກີດ ມີຄວາມຍາວ 6 ກິໂລແມັດ ໄດ້ຢືນຢັນວ່າ ໂຄງການດັ່ງກ່າວ, ຈະສໍາເລັດຕາມແຜນການທີ່ວາງໄວ້ຕືໃນເດືອນມີນາ 2025, ພ້ອມທັງຮັບປະກັນຄຸນນະພາບ. ປັດຈຸບັນ, ກໍາລັງສຸ່ມໃສ່ວຽກລະບົບລະບາຍນໍ້າ, ຈາກນັ້ນຈະສືບຕໍ່ຈົກຄອງລະບາຍ ນໍ້າ ເພື່ອບໍ່ໃຫ້ມີນໍ້າອັ່ງອໍໃນລະດູຝົນທີ່ຈະມາເຖິງ, ພ້ອມທັງປະສານສົມທົບກັບພາກສ່ວນກ່ຽວຂ້ອງ ສຸມໃສ່ວຽກ ຍົກຍ້າຍສິ່ງກີດຂວາງໃຫ້ສໍາເລັດ ເພື່ອສະດວກໃນການກໍ່ສ້າງ.
ທ່ານ ລັດສະໝີ ອະລິຍະວົງສິງ ຮອງຫົວໜ້າກົມຂົວທາງ ກະຊວງໂຍທາທິການ ແລະ ຂົນສົ່ງ (ຍທຂ) ຫົວໜ້າໂຄງການປັບປຸງ ແລະ ສ້ອມແປງທາງ 13 ເໜືອ ໄລຍະສີໄຄ-ສີເກີດ ໄດ້ໃຫ້ສຳພາດຕໍ່ສື່ມວນຊົນ ໃນໂອກາດ ທີ່ທ່ານເຈົ້າເມືອງນາຊາຍທອງ, ເມືອງສີໂຄດຕະບອງ ແລະ ຫົວໜ້າພະແນກ ຍທຂ ນະຄອນຫລວງວຽງຈັນ ແລະ ພາກສ່ວນກ່ຽວຂ້ອງ ເຄື່ອນໄຫວຕິດຕາມ ແລະ ຊຸກຍູ້ໂຄງການດັ່ງກ່າວ ວັນທີ 23 ກຸມພາ 2024 ວ່າ: ໂຄງການ ປັບປຸງ ແລະ ສ້ອມແປງທາງ 13 ເໜືອ ໄດ້ຮັບທຶນຈາກທະນາຄານໂລກ, ທະນາຄານການລົງທຶນໂຄງລ່າງອາຊີ, ກອງ ທຶນນໍດິກ ເພື່ອການພັດທະນາ ແລະ ທຶນສົມທົບຈາກລັດຖະບານລາວ ຮັບເໝົາກໍ່ສ້າງໂດຍກຸ່ມບໍລິສັດ ຕັງຈະເລີນ ຈໍາກັດ ໂດຍມີ ບໍລິສັດ Dongsung KEC ແລະ Dasan ຈາກ ສ ເກົາຫລີ ຮ່ວມກັບ Lao Consulting Group ຈາກ ສປປ ລາວ ເປັນທີ່ປຶກສາຄຸມງານ ແລະ ຕິດຕາມການກໍ່ສ້າງ, ໄລຍະກໍ່ສ້າງ 1,5 ປີ (1 ຕຸລາ 2023-31 ມີນາ 2025), ໄລຍະບູລະນະຮັກສາ-ສ້ອມແປງ 3 ປີ (1 ເມສາ 2025-31 ມີນາ 2028) ມູນຄ່າສັນຍາ 10,29 ລ້ານໂດລາສະຫະລັດ. ສໍາລັບ ວຽກປັບປຸງ-ສ້ອມແປງສຸກເສີນ ແລະ ວຽກເພີ່ມຖ້າມີໃນໄລຍະກໍ່ສ້າງ ແມ່ນນໍາໃຊ້ເງິນຂອງທະນາຄານໂລກ ແລະ ທະນາຄານການລົງທຶນໂຄງລ່າງອາຊີ; ວຽກໄກ່ເກ່ຍສິ່ງກີດຂວາງກັບປະຊາຊົນທີ່ຖືກຜົນກະທົບຈາກໂຄງການ ແລະ ວຽກຍົກຍ້າຍສາທາລະນຸປະໂພກ ແມ່ນນໍາໃຊ້ເງິນຂອງ ກອງທຶນນໍດິກເພື່ອການພັດທະນາ ແລະ ທຶນສົມທົບຂອງ ລັດຖະບານລາວ; ວຽກບູລະນະຮັກສາ-ສ້ອມແປງ ຫລັງຈາກສໍາເລັດການກໍ່ສ້າງ ແມ່ນນໍາໃຊ້ເງິນຂອງລັດຖະບານ ລາວ.
ສຳລັບ ການກໍ່ສ້າງໄດ້ແບ່ງປັນ 3 ຕອນຍ່ອຍ, ຕອນລະ 2 ກິໂລແມັດ, ມາຮອດເດືອນກຸມພາ 2024 ການ ຈັດຕັ້ງປະຕິບັດໂຄງການ ມີຄືບໜ້າ 5,18%, ຫຼຸດແຜນການ 12,07% ໂດຍວຽກໄກ່ເກ່ຍສິ່ງກີດຂວາງ ໄດ້ເບີກ ຈ່າຍແລ້ວ 560 ຄອບຄົວ ເທົ່າກັບ 95% ຂອງຄອບຄົວທັງໝົດ ແລະ ກໍາລັງດໍາເນີນການເບີກຈ່າຍ 30 ຄອບຄົວ ວຽກຍົກຍ້າຍລະບົບສາທານຸປະໂພກ ເຊັ່ນ: ໄຟຟ້າ ໄດ້ເຊັນສັນຍາແລ້ວ ແລະ ຢູ່ໃນໄລຍະດໍາເນີນງານ; ນໍ້າປະປາ ສາຍໄຍແກ້ວ, ກ້ອງວົງຈອນປິດ, ສາຍເຄເບິນໂທລະທັດ, ສາຍໂທລະສັບ ແມ່ນກໍາລັງກຽມເຊັນສັນຍາ.
ທ່ານ ໂພທິສັກ ເພຍໄຊວົງສັກ ຜູ້ຈັດການການກໍ່ສ້າງກຸ່ມບໍລິສັດ ຕັງຈະເລີນ ຈໍາກັດ ໄດ້ໃຫ້ຮູ້ວ່າ: ປັດຈຸບັນ, ພວກເຮົາກໍາລັງເລັ່ງປະຕິບັດການກໍ່ສ້າງ ໂດຍສະເພາະວຽກລະບົບລະບາຍນໍ້າ ໃຫ້ສໍາເລັດທ້າຍເດືອນພຶດສະພາ 2024 ເຊິ່ງວຽກງານຮີບດ່ວນແມ່ນການຈົກຄອງລະບາຍນໍ້າ 9-10 ຈຸດ ໃຫ້ສາມາດລະບາຍອອກ ເພື່ອບໍ່ໃຫ້ ມີນໍ້າ ອັ່ງອໍໃນລະດູຝົນທີ່ຈະມາເຖິງ. ສ່ວນວຽກຍົກຍ້າຍສິ່ງກີດຂວາງ ເຊັ່ນ: ຍົກຍ້າຍເສົາໄຟຟ້າ, ນໍ້າປະປາ, ສາຍໂທລະສັບ ແລະ ອື່ນໆ ແມ່ນກໍາລັງປະສານກັບໜ່ວຍງານທີ່ຮັບຜິດຊອບ ເພື່ອສະດວກໃນການກໍ່ສ້າງ.
ແຫຼ່ງຂ່າວ: ເສດຖະກິດ-ການຄ້າ