ວັນທີ 23 ກຸມພາ 2024 ນີ້ ເພຈຂ່າວໜັງສືພິມຄວາມສະຫງົບ ລາຍງານວ່າ: ເວລາປະມານ 18:00 ໂມງຂອງວັນທີ 17 ມັງກອນ 2024 ຜ່ານມາ ເຈົ້າໜ້າທີ່ ປກສ ເມືອງໄຊເສດຖາ ສົມທົບກັບ ປກສ ກຸ່ມ 6 ບ້ານນາຄວາຍ ຊື່ທ້າວ ລັດຕະນະໄຊ ຫຼື ເນັ່ງ ອາຍຸ 19 ປີ ຢູ່ບ້ານແກ້ງປາຢ້າງ ຫາດຊາຍຟອງນະຄອນ ຫຼວງວຽງຈັນ ໃນຂໍ້ກ່າວຫາການສໍ້ໂກງຊັບ ໄປດໍາເນີນຄະດີ ຍ້ອນກໍ່ເຫດສ້າງເຟສບຸກປອມເປັນສະມາຄົມຊ່ວຍເຫຼືອຜູ້ທຸກຍາກແອບອ້າງເອົາເງິນປະຊາຊົນ.
ຜ່ານການສອບສວນ ຜູ້ກ່ຽວສາລະພາບ ວ່າ: ປີ 2019 ໄດ້ພົວພັນກັບຢາເສບຕິດ ແລະ ໄດ້ເປີດບັນຊີ ອອກຊື່ທ້າວ ລັດຕະນະໄຊ ເພື່ອເຄື່ອນໄຫວສໍ້ໂກງຊັບ, ໄດ້ປະມານ 1 ປີ ໄດ້ຂາຍບັນຊີໃຫ້ທ້າວ ຫຼ້າ ຢູ່ບ້ານທາດຂາວ ເມືອງສີສັດຕະນາກ 1.800.000 ກີບ.
ປີ 2020 ເລີ່ມຮູ້ຈັກກັບທ້າວ ໂກສົນ ຢູ່ບ້ານແກ້ງປາຢ້າງ ຈົນໄດ້ເປັນອ້າຍຮັກ ແລະ ໃນປີດຽວກັນ (ປີ 2022) ທ້າວ ລັດຕະນະໄຊ ໄດ້ຈ້າງທ້າວ ໂກສົນ ຈໍານວນ 1.300.000 ກີບ ເພື່ອໄປເປີດບັນຊີໃຫ້ຜູ້ກ່ຽວໂດຍອອກຊື່ ທ້າວ ໂກສົນ ແລ້ວສ້າງເຟສປອມຂຶ້ນມາໂດຍແອບອ້າງຊື່: ສະມາຄົມຊ່ວຍເຫຼືອຄົນທຸກຍາກ ແລະ ພາຍຫຼັງທີ່ສ້າງເຟສປອມຂຶ້ນ ໄດ້ຄັດລອກເອົາຮູບຄົນເຈັບຂອງໜ່ວຍກູ້ໄພ 1624 ທີ່ບໍ່ມີເງິນປິ່ນປົວ, ເດັກນ້ອຍ, ຄົນອະນາຖາ, ຄອບຄົວຂາດເຂີນ, ຄົນຕາຍທີ່ເປັນສົບອະນາຖາ ໂພສລົງ ເພື່ອຂໍຮັບບໍລິຈາກພ້ອມເລກບັນຊີ 0951213899311 ອອກຊື່ KOSON LEEVONGSA MR ພ້ອມເບີໂທ 020 55155586 ແລະ 020 54000089 ມີຫລາຍຄົນຫຼົງເຊື່ອໂອນເງິນເຂົ້າ ຈໍານວນຫຼາຍຄັ້ງ ໂດຍໄດ້ຮັບເງິນຄັ້ງລະ 3.000.000ກີບ ຫາ 4.000.000 ກີບຕໍ່ຄັ້ງ ແລະ ເມື່ອໄດ້ເງິນມາແຕ່ລະຄັ້ງກໍເອົາເງິນຈໍານວນດັ່ງກ່າວໄປຊື້ຢາບ້າມາເສບ ແລະ ຫຼິ້ນເກມຈົນໝົດ.