ພັຕ ບຸນພອນ ຈິດຕະວົງ ຮອງຫົວໜ້າພະແນກຕຳຫຼວດເສດຖະກິດ ນະຄອນຫຼວງວຽງຈັນ ໄດ້ລາຍງານໃຫ້ຮູ້ວ່າ: ໃນວັນທີ 8 ກຸມພາ ທີ່ຜ່ານມາ, ໄດ້ຮັບແຈ້ງຂໍ້ມູນຈາກພົນລະເມືອງດີວ່າມີການຈັດສົ່ງໝາກກະໂພກຢູ່ຄິວລົດສາຍໃຕ້, ສະນັ້ນ, ເຈົ້າໜ້າທີ່ຈຶ່ງໄດ້ລົງກວດກາຕົວຈິງພົບເຫັນເປົ້າໝາຍ ລົດຮຸນໄດ ສີຟ້າ ໝາຍເລກທະບຽນ ອກ 0607, ເຈົ້າໜ້າທີ່ໄດ້ເຂົ້າກວດກາ, ຜ່ານການກວດກາພົບເຫັນໝາກກະໂພກຈຳນວນ 948 ກິໂລກຣາມ, ເຈົ້າໜ້າທີ່ໄດ້ກັກຕົວຄົນຂັບລົດ ເພື່ອສືບສວນສອບສວນ.
ມາຮອດວັນທີ 15 ກຸມພາທີ່ຜ່ານມາ ໄດ້ຈັດພິທີທຳລາຍໝາກກະໂພກຈຳນວນດັ່ງກ່າວ, ສ່ວນການດຳເນີນຄະດີເຈົ້າໜ້າທີ່ກຳລັງສືບຕໍ່ຂະຫຍາຍຜົນດຳເນີນຕາມຂັ້ນຕອນທາງກົດໝາຍ.
ສຸດທ້າຍນີ້ຢາກຝາກເຖິງພໍ່ແມ່ປະຊາຊົນຫ້າມຊື້-ຈຳໜ່າຍໝາກກະໂພກ, ຖ້າພົບເຫັນໃຫ້ຮີບແຈ້ງຕໍ່ເຈົ້າໜ້າທີ່ ເພື່ອສະກັດກັ້ນ, ເພາະບັນຫາກະໂພກນີ້ເປັນທາດລະເບີດ, ທາດແຕກ ເຮັດໃຫ້ຈະກໍ່ການເກີດອັກຄີໄພ ແລະ ມີຜົນເສຍຫາຍຕໍ່ສັງຄົມ.
ຂ່າວ: ປ້ອງກັນຄວາມສະຫງົບນະຄອນຫຼວງວຽງຈັນ.