ໃນວັນທີ 20 ກຸມພາ 2024 ນີ້ ແຂວງສະຫວັນນະເຂດ ໄດ້ຈັດພິທີຖະແຫຼງຂ່າວການກຽມຄວາມພ້ອມເປີດປີທ່ອງທ່ຽວລາວ 2024 ທີ່ສະລາແຄມຂອງ ນະຄອນໄກສອນພົມວິຫານ ໂດຍໃຫ້ກຽດເຂົ້າຮ່ວມ ຂອງທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ,ມີຮອງເລຂາພັກແຂວງ, ຮອງເຈົ້າແຂວງ, ປະທານ-ຮອງປະທານຈັດງານປີທ່ອງທ່ຽວລາວ2024 , ມີຄະນະປະຈຳພັກແຂວງ,ກໍາມະການພັກແຂວງ, ມີຕາງໜ້າກົງສູນໃຫຍ່ແຫ່ງ ສ.ສ ຫວຽດນາມ,ຕາງໜ້າກົງສູນໃຫຍ່ແຫ່ງຣາຊະອານາຈັກໄທ, ທ່ານເຈົ້ານະຄອນໄກສອນພົມວິຫານ ເຈົ້າເມືອງ 14 ເມືອງ,ຫົວໜ້າພະແນກການອ້ອມຂ້າງແຂວງ, ນັກທຸລະກິດຜູ້ປະກອບການທັງພາຍໃນ ແລະ ຕ່າງປະເທດເຂົ້າຮ່ວມ.
ທ່ານ ນາງຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ທັງເປັນປະທານຈັດງານປີທ່ອງທ່ຽວລາວ 2024 ທີ່ແຂວງສະຫວັນນະເຂດ ກໍໄດ້ລາຍງານການກະກຽມຄວາມພ້ອມເປີດປີທ່ອງທ່ຽວລາວ 2024 ຕິດພັນກັບງານເທສະການສະຫວັນສຸກສັນຫັນສາແມ່ນ ກຽມຄວາມພ້ອມຮອບດ້ານ ໂດຍສະເພາະແມ່ນຖະໜົນຫົນທາງ, ເຮືອນພັກໂຮງແຮມ, ຮ້ານອາຫານເຄື່ອງດື່ມ ຕະຫຼອດຮອດການຈັດສັນປະດັບປະດາແສງສີສຽງອື່ນໆ ແມ່ນກຽມຄວາມພ້ອມທຸກຢ່າງ ເພື່ອຄວາມສວຍງາມ. ມາຮອດປັດຈຸບັນຕາມວົງວຽນຕ່າງໆກໍ່ມີການປະດັບປະດາ ຢ່າງງົດງາມ ຕາມເສັ້ນທາງກໍ່ຂຶ້ນປ້າຍໂຄສະນາເຊິ່ງສະແດງໃຫ້ເຫັນເຖິງແຫຼ່ງທ່ອງທ່ຽວຂອງແຂວງ
ມື້ເປີດງານທ່ອງທ່ຽວ ທີ່ຕິດພັນກັບກິດຈະກໍາ ສະຫວັນ ສຸກສັນ ຫັນສາ ສະຖານທີ່ ຂອບເຂດເທສະບານຕົວເມືອງເກົ່າ, ນະຄອນໄກສອນ ພົມວິຫານ ເຊິ່ງປີນີ້ແມ່ນຈະຈັດຂື້ນຍ່າງຍິ່ງໃຫຍ່ກວ່າຄັ້ງຜ່ານໆມາ, ເຊິ່ງເລີ່ມແຕ່ວັນທີ 10-17 ມີນາ 2024 ລວມ 8 ມື້ 7 ຄືນ,ໃນງານມີກິດຈະກໍາຫຼາກຫຼາຍ, ໃນວັນທີ 10 ມີນາ 2024 ຈະເປັນມື້ເປີດຢ່າງເປັນທາງການ ໄດ້ນໍາເອົາລາຍການສະແດງຂັບລໍາ 4 ຈັ່ງຫວະ, ບົດເພງຈາກສິລະປິນຈໍານວນ 8 ທ່ານ, ແລະ ກ້ອນກໍາລັງມາສະແດງ, ກ້ອນພາເລດ ຈາກພາກສ່ວນຂອງແຂວງ ມີ 10 ກ້ອນ.
ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດໄດ້ແຈ້ງໃຫ້ຮູ້ຕື່ມອີກວ່າ: ມາທ່ຽວສະຫວັນນະເຂດ ສະເໜີໃຫ້ເຮັດກິດຈະກຳ 3 ໄຫວ້, 4 ເບິ່ງ ແລະ 5 ຊົມ ດັ່ງນີ້:
- ກາບໄຫວ້ 3 ໄຫວ້: ກາບໄຫວ້ ພຣະທາດອີງຮັງ;ກາບໄຫວ້ ພຣະທາດໂຜ່ນ;ກາບໄຫວ້ ຫໍພຣະໄຕປີດົກ.
- ທ່ອງທ່ຽວ ເບິ່ງ 4 ເບິ່ງ: ທ່ຽວເບິ່ງ ຫໍພິພິທະພັນແຂວງ;ທ່ຽວເບິ່ງ ຫໍພິພິທະພັນໄດໂນເສົາ; ທ່ຽວເບິ່ງ ຫໍພິພິທະພັນຮ່ວມສໍາພັນສູ້ຮົບ ລາວ-ຫວຽດນາມ; ທ່ຽວເບິ່ງ ມໍລະດົກສະຖານໜອງເຮືອທອງ.
- ທ່ອງທ່ຽວຊົມ 5 ຊົມ: ທ່ຽວຊົມ ຕົວເມືອງເກົ່າປະຫວັດສາດ-ໜອງຫຼົ່ມປ່າສະຫງວນດົງນາຕາດ ນະຄອນໄກສອນ; ທ່ຽວຊົມ ລີງ-ປາຝາ-ຝາຍສຸຍ ຈໍາພອນ; ທ່ຽວຊົມ ໂອ່ງ-ມັ່ງ, ນົກຍາງຂາວ, ແຫຼ່ງຂຸດຄົ້ນກະດູກໄດໂນເສົາ ຊົນນະບູລີ; ທ່ຽວຊົມ ໂນນຫີນດ້າງ, ໂພນຊ້າງສານ, ສີສະເກດສວນຕານ, ຜາສາດຫີນ ໄຊພຸູທອງ; ທ່ຽວຊົມ ພຣະທາດນາງລາວ-ພຣະເຈົ້າອົງແສນ-ຫີນ 3 ເສົ້າ-ນໍ້າເກົ້າແຄວ ວິລະບູລີ.
ພ້ອມດຽວກັນນີ້ທ່ານເຈົ້າແຂວງກໍຍັງເຊີນຊວນພີ່ນ້ອງຊາວແຂວງສະຫວັນນະເຂດ ຈົ່ງຮ່ວມມືສາມັກຄີເປັນປຶກແຜ່ນຮ່ວມກັນເປັນເຈົ້າພາບທີ່ດີ ເພື່ອຕ້ອນຮັບນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າມາທ່ອງທ່ຽວພາຍໃນແຂວງ ໃຫ້ມີຄວາມພາກພູມໃຈ ຕໍ່ນໍ້າໃຈຊາວແຂວງສະຫວັນນະເຂດ ມາທ່ຽວແລ້ວ ຢາກມາທ່ຽວອີກຄັ້ງໃໝ່.
ຂ່າວ: Media Laos