ສຳນັກຂ່າວຕ່າງປະເທດລາຍງານວ່າ: ເມື່ອບໍ່ດົນມານີ້ເກີດເຫດລົດພຸ່ງຕໍາກຳແພງທະລຸມາໃສ່ຫ້ອງສຸກເສີນ ຂອງໂຮງໝໍແຫ່ງໜຶ່ງໃນລັດເທັກຊັດ, ປະເທດອາເມຣິກາ, ເຮັດໃຫ້ມີຜູ້ເສຍຊີວິດ 1 ຄົນ ແລະ ໄດ້ຮັບບາດເຈັບ 5 ຄົນ, ພາຍຫຼັງເກີດເຫດການເຈົ້າໜ້າທີ່ແພດໄດ້ທຳການດຶງຕົວຄົນຂັບອອກຈາກລົດ ແລະທຳການປະຖົມພະຍາບານເພື່ອກູ້ຊີບຊ່ວຍຊີວິດ, ແຕ່ກໍບໍ່ສາມາດຊ່ວຍຊີວິດຄົນຂັບໄວ້ໄດ້. ນອກນີ້, ໜຶ່ງໃນຜູ້ໄດ້ຮັບບາດເຈັບແມ່ນເປັນເດັກນ້ອຍ 1 ຄົນ, ເຊິ່ງເປັນຜູ້ປ່ວຍມາເຂົ້າຮັບການຮັກສາໃນໂຮງໝໍດັ່ງກ່າວ, ແລະ ຍັງມີຜູ້ໃຫຍ່ອີກ 2 ຄົນ ແລະ ເດັກນ້ອຍອີກ 2 ຄົນ ທີ່ໄດ້ຮັບບາດເຈັບໜັກຕ້ອງຖືກສົ່ງໄປຮັກສາຕົວທີ່ໂຮງໝໍອື່ນ, ເນື່ອງຈາກໂຮງໝໍດັ່ງກ່າວໄດ້ຮັບຄວາມເສຍຫາຍຈາກອຸບັດຕິເຫດຄັ້ງນີ້.

ສຳລັບສາເຫດທີ່ພາໃຫ້ອຸບັດຕິເຫດໃນຄັ້ງນີ້ເກີດຂຶ້ນ, ເຈົ້າໜ້າທີ່ຍັງຢູ່ໃນລະຫວ່າງການສືບສວນສອບສວນ ຈຶ່ງຍັງບໍ່ໄດ້ມີການເປີດເຜີຍສາເຫດແນ່ຊັດ.