ທ່ານ ອ່ອນພັນ ທອງທິດາ, ເຈົ້າເມືອງໆຊໍາເໜືອ, ແຂວງຫົວພັນໃຫ້ສໍາພາດວ່າ: ນັບແຕ່ປີ 2021-2023 ຜ່ານມາ ເມືອງຊໍາເໜືອ ສາມາດຈັດເກັບລາຍຮັບງົບປະມານໄດ້ຫລາຍກວ່າ 11 ຕື້ 150 ລ້ານກີບ, ກວມເອົາ 98,66 ສ່ວນຮ້ອຍຂອງແຜນການປີ 11 ຕື້ 300 ລ້ານກີບ, ສະເພາະປີ 2023 ຜ່ານມາ, ສາມາດເກັບລາຍຮັບເຂົ້າງົບປະມານໄດ້ຫລາຍກວ່າ 6 ຕື້ 100 ລ້ານກີບ, ທຽບໃສ່ແຜນການຈັດຕັ້ງປະຕິບັດໄດ້ຮ້ອຍສ່ວນຮ້ອຍ.
ທ່ານ ອ່ອນພັນ ທອງທິດາ ໃຫ້ຮູ້ຕື່ມວ່າ: ອົງການປົກຄອງເມືອງຊໍາເໜືອ ໄດ້ເນັ້ນໜັກໃສ່ 4 ວຽກຈຸດສຸມບູລິມະສິດເພື່ອແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນເປັນຕົ້ນສົ່ງເສີມການຜະລິດເພື່ອທົດແທນການນໍາເຂົ້າ, ໂດຍສຸມໃສ່ສົ່ງເສີມການຜະລິດເປັນສິນ ຄ້າເພື່ອສົ່ງອອກ ແລະ ສ້າງລາຍຮັບໃຫ້ປະຊາຊົນຕາມທ່າແຮງຂອງແຕ່ລະທ້ອງຖີ່ນ, ສ້າງຄວາມເຂັ້ມແຂງດ້ານການເກັບລາຍຮັບ, ປັບປຸງບັນດານິຕິກຳກ່ຽວກັບການເກັບລາຍຮັບໃຫ້ສອດຄ່ອງກັບສະພາບຄວາມເປັນຈິງ ແລະ ຫັນເປັນລະບົບທັນສະໄໝຜ່ານປະຕູດຽວ, ເຮັດໃຫ້ການເກັບລາຍຮັບເພີ່ມຂື້ນ ແລະ ລື່ນຄາດໝາຍທີ່ວາງໄວ້, ຍົກສູງປະສິດທິພາບປະສິດທິຜົນໃນການປະຢັດມັດທະຢັດເພື່ອຕ້ານການຟູມເຟື່ອຍ, ເພີ່ມທະວີປະສິດທິພາບໃນການຄຸ້ມຄອງລັດຄຸ້ມຄອງສັງຄົມໃຫ້ເຂົ້າສູ່ລະບຽບກົດໝາຍເທື່ອລະກ້າວ.
ຜ່ານການຈັດຕັ້ງປະຕິບັດຕົວຈິງເຫັນວ່າວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນຍັງມີຫລາຍດ້ານຕ້ອງສືບຕໍ່ປັບປຸງແກ້ໄຂເປັນຕົ້ນດ້ານພູມສັນຖານເນື້ອທີ່ທຳການຜະລິດຍັງຈໍາກັດ, ທືນຮອນເພື່ອຕອບສະໜອງໃຫ້ແກ່ກຸ່ມການຜະລິດຍັງບໍ່ພຽງພໍກັບຄວາມຕ້ອງການຕົວຈິງ ແລະ ອື່ນໆ.
ຂ່າວ: ວິທະຍຸກະຈາຍສຽງແຫ່ງຊາດລາວ.