ອົງການຄົນພິການອາຊີເພື່ອການພັດທະນາ ໄດ້ຈັດພິທີມອບ-ຮັບ ແລະ ເປີດນຳໃຊ້ສູນຂໍ້ມູນຂ່າວສານການທ່ອງທ່ຽວເມືອງວຽງໄຊ, ທີ່ເມືອງວຽງໄຊ,ແຂວງຫົວພັນ ໃນວັນທີ 7 ກຸມພາທີ່ຜ່ານມາ, ໂດຍມີ ທ່ານ ຄຳແພງ ໄຊສົມແພງ ເຈົ້າແຂວງໆຫົວພັນ, ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະ ນະທຳ ແລະ ທ່ອງທ່ຽວ, ທ່ານ ໂຄບະຢະຊິ ເຄນອິຈິ ເອກອັກຄະລັດຖະທູດຢີ່ປຸ່ນ ປະຈຳ ສປປ ລາວ, ມີພາກສ່ວນກ່ຽວຂ້ອງຂັ້ນກະຊວງ, ຂັ້ນແຂວງ, ເມືອງວຽງໄຊ ແລະ ພະນັກງານອົງການຄົນ ພິການອາຊີເພຶ່ອການພັດທະນາເຂົ້າຮ່ວມ.
ຈຸດປະສົງໃນການກໍ່ສ້າງເພຶ່ອເປັນການສະໜອງຂໍ້ມູນການທ່ອງທ່ຽວທີ່ສຳຄັນຕ່າງໆ ຢູ່ ສປປ ລາວ ໂດຍສະເພາະແມ່ນແຂວງຫົວພັນ, ພ້ອມທັງພັດທະນາ, ຍົກລະດັບການທ່ອງທຽ່ວ ພາຍໃນແຂວງຫົວພັນໃຫ້ມີຄວາມສະດວກ, ເປັນຕົ້ນແມ່ນແຫຼ່ງທ່ອງທ່ຽວທາງດ້ານປະຫວັດສາດ, ວັດທະນະທຳ ແລະ ທຳມະຊາດ ພິເສດແມ່ນທ່ຽວຊົມຖ້ຳທ່ານຜູ້ນຳຕ່າງໆ, ດອກຄາຍປ່າ ແລະ ດອກສະກຸລະ, ພ້ອມທັງເປັນການໂຄສະນາ, ດືງດູດນັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ເຂົ້າມາແຂວງຫົວພັນໃຫ້ນັບມື້ຫຼາຍຂື້ນ. ໃນໂອກາດດຽວກັນນີ້ ບັນດາທ່ານແຂກທີເຂົ້າ ຮ່ວມພິທີຍັງໄດ້ຮ່ວມຕັດແຖບຜ້າ ແລະ ຍ່າງມະລາທອນທ່ຽວຊົມເມືອງວຽງໄຊຕື່ມອີກ.
ໂຄງການກໍ່ສ້າງສູນຂໍ້ມູນຂ່າວສານການທ່ອງທ່ຽວເມືອງວຽງໄຊ ແມ່ນໄດ້ລົງມືກໍ່ສ້າງມາແຕ່ວັນທີ 31 ມີນາ 2023 ແລະ ໄດ້ສຳເລັດໃນວັນທີ 31 ມັງກອນ 2024, ເປັນອາຄານກໍ່ຊັ້ນດຽວມີ 2 ຫ້ອງ, ກ້ວາງ 5 ແມັດ, ຍາວ 10 ແມັດ, ເຄື່ອງເຟີນີເຈີຄົບຊຸດ, ລວມມູມຄ່າກໍ່ສ້າງທັງໝົດແມ່ນ 300 ລ້ານກວ່າກີບ, ເຊິ່ງແມ່ນທຶນຊ່ວຍເຫຼືອຈາກອົງການຄົນພິການອາຊີເພຶ່ອການພັດທະນາ.
ຂ່າວ-ພາບ: ອຸທິດາ