ໃນລະຫວ່າງວັນທີ 30-31 ມັງກອນ 2024 ຜ່ານມາ, ພະແນກກວດກາ ແລະ ຄວບຄຸມຢາເສບຕິດ ປກສ ແຂວງຫຼວງນ້ຳທາ ສົມທົບກັບ 2 ກຳລັງປ້ອງກັນຊາດ, ປ້ອງກັນຄວາມສະຫງົບ ເມືອງຫຼວງນ້ຳທາ ແລະ ພາກສ່ວນທີ່ກ່ຽວຂ້ອງລົງທຳລາຍສວນຢາຝິ່ນ ທີ່ປະຊາຊົນລັກລອບປູກ ຢູ່ເຂດບ້ານນ້ຳຂຸ້ນ ເມືອງຫຼວງນ້ຳທາ ແຂວງຫຼວງນ້ຳທາ ຈຳນວນ 5 ຕອນ ມີເນື້ອທີ່ປະມານ 2.590 ຕາແມັດ.
ພາຍຫຼັງທຳລາຍແລ້ວ ກໍໄດ້ເຮັດບົດບັນທຶກຕໍ່ເຈົ້າຂອງສວນ ພ້ອມທັງສຶກສາອົບຮົມກ່າວເຕືອນ ແລະ ຊີ້ແຈງຜົນຮ້າຍຄວາມອັນຕະລາຍຂອງຢາຝິ່ນ ໃຫ້ຮັບຮູ້ ແລະ ເຂົ້າໃຈຢ່າງເລິກເຊິງ ຢາຝິ່ນເປັນສານກະຕຸ້ນທີ່ອອກລິດຢ່າງຮຸນແຮງຕໍ່ລະບົບປະສາດເປັນສານຕັ້ງຕົ້ນໃນການຜະລິດຢາເສບຕິດ ປະເພດຢາບ້າ ເຣໂລອິນ ແລະ ເປັນສ່ວນປະສົມໃນການຜະລິດສານເສບຕິດປະເພດອື່ນໆ ທີ່ຜິດຕໍ່ລະບຽບກົດໝາຍ ແລະ ຕ້ອງຫ້າມໃນ ສປປ ລາວ.
ຢາຝິ່ນເປັນບັນຫາຕົ້ນຕໍໂດຍກົງທາງດ້ານສຸຂະພາບຮ່າງກາຍ ແລະ ພາໃຫ້ເກີດປະກົດການຫຍໍ້ທໍ້ຕ່າງໆເຊັ່ນ: ຂີ້ລັກງັດແງະ ປຸ້ນຈີ້, ຊິງຊັບ, ລັກຊັບ, ຄາຕະກຳ ເຊິ່ງມັນໄດ້ສ້າງຄວາມບໍ່ເປັນລະບຽບຮຽບຮ້ອຍ ແລະ ສ້າງຄວາມບໍ່ສະຫງົບໃຫ້ກັບສັງຄົມ ດັ່ງນັ້ນຈຶ່ງຮຽກຮ້ອງທຸກພາກສ່ວນໃນສັງຄົມ ປະກອບສ່ວນເຂົ້າໃນການຕ້ານ ແລະ ສະກັດກັ້ນບັນຫາຢາເສບຕິດ ຊ່ວຍເປັນຫູເປັນຕາໃຫ້ກັບເຈົ້າໜ້າທີ່ ຫາກພົບເຫັນ ລັກລອບປູກ ຄ້າຂາຍ ຂົນສົ່ງຢາຝິ່ນ ຫຼື ຢາເສບຕິດປະເພດອື່ນໆ ທີ່ແຕະຕ້ອງເຖິງລະບຽບກົດໝາຍ ໃຫ້ຮີບຮ້ອນແຈ້ງເຈົ້າໜ້າທີ່ເພື່ອແກ້ໄຂໃຫ້ທັນເວລາ ທັງນີ້ກໍເພື່ອເຮັດໃຫ້ການຈັດຕັ້ງປະຕິບັດຕາມວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃຫ້ຫຼຸດໜ້ອຍຖອຍລົງຈາກສັງຄົມໄປເທື່ອລະກ້າວ.
ແຫຼ່ງຂ່າວ: ປກສ ແຂວງຫຼວງນ້ຳທາ