ນັບເປັນຂ່າວດີອີກຄັ້ງໃໝ່ ສຳລັບບັນດາອ້າຍນ້ອງແຮງງານທີ່ເຮັດວຽກຢູ່ຫົວໜ່ວຍທຸລະກິດ, ການຜະລິດ ແລະ ການບໍລິ
ການໃນຂອບເຂດທົ່ວປະເທດ ຊຶ່ງຂະນະນີ້ໜ່ວຍງານທີ່ກ່ຽວຂ້ອງກຳລັງສະເໜີຕໍ່ລັດຖະບານ ເພື່ອພິຈາລະນາການຍົກລະ
ດັບຄ່າແຮງງານຂັ້ນຕ່ຳສຸດສຳລັບແຮງງານ ຂົງເຂດທຸລະກິດຂຶ້ນເກືອບ 3 ແສນກີບ ຫຼື ຈາກ 6 ແສນກວ່າ ທີ່ປະຕິບັດໃນປະ
ຈຸບັນມາເປັນ 9 ແສນກີບຕໍ່ຄົນຕໍ່ເດືອນ.
ໃນຕົ້ນປີ 2012 ລັດຖະບານໄດ້ອອກປະກາດແຈ້ງການກ່ຽວກັບການປັບປຸງຄ່າແຮງງານຂັ້ນຕ່ຳສຸດ ຂອງຜູ້ອອກແຮງງານ
ທີ່ເຮັດວຽກໃນຂົງເຂດທຸລະກິດທົ່ວປະເທດຈາກ 4 ແສນກວ່າກີບໃນເມື່ອກ່ອນມາເປັນ 626.000 ກີບຕໍ່ຄົນຕໍ່ເດືອນ ແລະ
ຖ້າຄິດໄລ່ເປັນວັນແມ່ນບໍ່ໃຫ້ຕ່ຳກວ່າ 24.076 ກີບຕໍ່ຄົນຕໍ່ວັນ ຫຼື ຖ້າຄິດໄລ່ເປັນຊົ່ວໂມງແມ່ນບໍ່ໃຫ້ຫຼຸດ 3.009 ກີບຕໍ່ຄົນຕໍ່
ຊົ່ວໂມງ.
ໂດຍການປັບເທື່ອນັ້ນ ກະຊວງແຮງງານ ແລະ ສະຫວັດດີການສັງຄົມລະບຸວ່າ: ແມ່ນແນໃສ່ປັບປຸງການດຳລົງຊີວິດຂັ້ນພື້ນ
ຖານຂອງຜູ້ອອກແຮງງານ ໃຫ້ດີຂຶ້ນສອດຄ່ອງກັບລະດັບອັດຕາການຂະຫຍາຍຕົວຂອງເສດຖະກິດ- ສັງຄົມໃນໄລຍະນັ້ນທັງ
ສອດຄ່ອງກັບຄວາມຮຽກຮ້ອງຕ້ອງການທາງດ້ານວັດຖຸ ແລະ ຈິດໃຈ ລວມທັງຜົນປະໂຫຍດດ້ານສະຫວັດດີການສັງຄົມຕະ
ຫຼອດຮອດຄ່າຄອງຊີບຕ່າງໆ ເພື່ອກະຕຸກຊຸກຍູ້ໃຫ້ຜູ້ອອກແຮງງານມີວຽກເຮັດງານທຳຢ່າງໝັ້ນຄົງ ແລະ ມີປະສິດທິພາບ.
ຢ່າງໃດກໍຕາມ ແຮງງານຖືໄດ້ວ່າແມ່ນກ້ອນກຳລັງອັນສຳຄັນເປັນຕົວຂັບເຄື່ອນການພັດທະນາເສດຖະກິດ-ສັງຄົມຂອງຊາດ
ໃຫ້ສືບຕໍ່ຂະຫຍາຍຕົວໄດ້ຢ່າງແຂງແຮງ ອັນສົ່ງຜົນໄປໃນທິດທາງບວກ ແລະ ແອບແຝງຕາມດ້ວຍທາງລົບຕໍ່ສະພາບ ໂດຍ
ລວມໜຶ່ງໃນນັ້ນແມ່ນໄດ້ດຶງເອົາລາຄາສິນຄ້າສະບຽງອາຫານຫຼາຍປະເພດ ຖີບຕົວສູງຂຶ້ນໄປຕາມໆກັນສ້າງພາລະແບກຫາບ
ຫຼາຍຂຶ້ນແກ່ບັນດາຜູ້ອອກແຮງງານ ກໍຄືປະຊາຊົນຜູ້ທີ່ມີລາຍໄດ້ຕ່ຳໃນຂອບເຂດທົ່ວປະເທດ.
ແນວໃດກໍດີ ຕໍ່ກັບສະພາບຄືດັ່ງກ່າວ ເພື່ອໃຫ້ສອດຄ່ອງກັບການພັດທະນາເສດຖະກິດ-ສັງຄົມເວລານີ້ ໃນກອງປະຊຸມສະພາ
ວັນທີ 9 ທັນວາຜ່ານມາ ທ່ານ ນາງ ອ່ອນຈັນ ທຳມະວົງ ລັດຖະມົນຕີວ່າການກະຊວງແຮງງານ ແລະ ສະຫວັດດີການສັງຄົມ
ໄດ້ລາຍງານສະພາບການຈັດຕັ້ງປະຕິບັດວຽກງານແຮງງານໃຫ້ຮູ້ວ່າ: ປະຈຸບັນຂະແໜງແຮງງານ ແລະ ສະຫວັດດີການສັງ
ຄົມໄດ້ສຳເລັດການສ້າງແຜນຍຸດທະສາດການພັດທະນາສີມືແຮງງານ ແລະ ແຜນງານແຫ່ງຊາດ ວ່າດ້ວຍການປົກປ້ອງ ແລະ
ລົບລ້າງການນຳໃຊ້ແຮງງານເດັກໄລຍະແຕ່ປີ 2014 ຫາ 2020.
ພ້ອມດຽວກັນນັ້ນ ກໍໄດ້ປັບປຸງກົດໝາຍວ່າດ້ວຍແຮງງານ, ສ້າງດຳລັດ 2 ສະບັບ, ສ້າງຂໍ້ຕົກລົງ ແລະ ຄຳແນະນຳຂອງກະ
ຊວງ 8 ສະບັບ ທັງໄດ້ສົມທົບກັບກັບອົງການໄຕພາຄີປັບປຸງດຳລັດ ວ່າດ້ວຍຄ່າແຮງງານຂັ້ນຕ່ຳສຸດສຳລັບຜູ້ອອກແຮງງານ
ທີ່ເຮັດວຽກຢູ່ ໃນຫົວໜ່ວຍທຸລະກິດ, ການຜະລິດ ແລະ ການບໍລິການແລ້ວ 5 ຄັ້ງ ແລະ ຄັ້ງທີ 6 ກຳລັງສະເໜີຕໍ່ລັດຖະບານ
ພິຈາລະນາຍົກລະດັບຈາກ 626.000 ກີບ ມາເປັນ 900.000 ກີບ ຫຼື ເທົ່າກັບ 112 ໂດລາສະຫະລັດຕໍ່ຄົນຕໍ່ເດືອນ, ທ່ານ ນາງ
ອ່ອນຈັນ ທຳມະວົງ ກ່າວ.
ຂະນະທີ່ປະຈຸບັນ ທ່ານລັດຖະມົນຕີລະບຸວ່າ: ຢູ່ລາວມີຫົວຫນ່ວຍແຮງງານທັງໝົດ 124.000 ແສນແຫ່ງປະກອບມີແຮງງານ
ທັງໝົດ 573.000 ແສນຄົນ ໃນນີ້ ຫົວໜ່ວຍແຮງງານທີ່ມີການນຳໃຊ້ແຮງງານແຕ່ 10 ຄົນຫາ 99 ຄົນມີ 5.777 ພັນກວ່າຫົວ
ໜ່ວຍ ແລະ ອີກ 306 ຫົວໜ່ວຍແມ່ນມີແຮງງານຕັ້ງແຕ່ 100 ຄົນຂຶ້ນໄປ ໂດຍໂຄງປະກອບຂອງກຳລັງແຮງງານໄດ້ມີການ
ປ່ຽນແປງໄປຕາມທິດຫັນເປັນ ອຸດສາຫະກຳທັງຄອຍຕອບສະໜອງການພັດທະນາເສດຖະກິດ-ສັງຄົມເທື່ອລະ ກ້າວໃນປີ
2014 ຂົງເຂດກະສິກຳ-ປ່າໄມ້ແມ່ນໄດ້ຫຼຸດລົງເປັນ 69%, ອຸດສາຫະກຳເພີ່ມເປັນ 7,8% ແລະ ບໍລິການເພີ່ມເປັນ 23,4% ທັງ
ສາມາດຮັກສາອັດຕາການວ່າງງານຢູ່ໃນລະດັບ 2%.
ແຫລ່ງຂ່າວ: ເສດຖະກິດ – ສັງຄົມ