ພິທີປະກາດຮັບຮອງເອົາວັດພຣະທາດພະບາດ-ໂພນສັນເປັນມໍລະດົກແຫ່ງຊາດທາງດ້ານວັດທະນະທໍາ ແລະ ພິທີເປີດປີທ່ອງທ່ຽວລາວ 2024ຂອງແຂວງບໍລິຄໍາໄຊ ຈັດຂຶ້ນໃນວັນທີ 23 ມັງກອນ ທີ່ຜ່ານມານີ້, ໂດຍການເຂົ້າຮ່ວມຂອງທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ, ທ່ານ ວັນສີ ກົ່ວມົ່ວ ຮອງລັດຖະມົນຕີກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ, ເຈົ້າແຂວງໜອງຄາຍຂອງໄທ, ພ້ອມດ້ວຍບັນດາພະແນກການທີ່ກ່ຽວຂ້ອງຈາກສູນກາງ, ແຂວງ, ເມືອງອ້ອມຂ້າງເຂົ້າຮ່ວມ.
ທ່ານ ສົນທອງ ວີບຸນກວ້າງ, ຫົວໜ້າພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ຄະນະຮັບຜິດຊອບຊີ້ນໍາຈັດປີທ່ອງທ່ຽວລາວ 2024 ຂອງແຂວງບໍລິຄໍາໄຊກ່າວວ່າ: ວັດພຣະບາດ-ໂພນສັນເປັນວັດໜຶ່ງທີ່ເກົ່າແກ່ທີ່ສຸດຂອງແຂວງບໍລິຄຳໄຊມີຕໍານານເລົ່າຂານກັນມາເປັນເວລານານກວ່າ 2.500 ປີມາແລ້ວ,ຍ້ອນມີຄວາມເຫຼື້ອມໃສສັດທາ ແລະເປັນບ່ອນກາບໄຫວ້ສັກກາລະບູຊາຂອງປວງຊົນຊາວບໍລິຄຳໄຊ ກໍ່ຄືປວງຊົນຊາວລາວທັງຊາດ, ພາຍຫຼັງການຫ້າງຫາກະກຽມທາງດ້ານນິຕິກຳ ແລະ ຄວາມພ້ອມດ້ານຕ່າງໆເພື່ອສະເໜີຫາກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວອະນຸຍາດ ແລະ ໄດ້ຈັດພິທີປະກາດຮັບຮອງເອົາວັດພຣະທາດພະບາດ-ໂພນສັນເປັນມໍລະດົກລະດັບຊາດທາງດ້ານວັດທະນະທໍາຂື້ນຢ່າງເປັນທາງການ. ສໍາລັບຄໍາຂວັນປີທ່ອງທ່ຽວບໍລິຄຳໄຊປີນີ້ແມ່ນ: “ທ່ອງທ່ຽວລາວ-ທ່ອງທ່ຽວບໍລິຄໍາໄຊອົບອຸ່ນໄປກັບ ວັດທະນະທໍາ, ຊື່ນໃຈໄປນໍາທໍາມະຊາດ” ໂດຍໄດ້ກຳນົດເອົາ 13 ກິດຈະກໍາ, ໃນນີ້ມີ 1 ກິດຈະກຳລະດັບຊາດ ເເລະ 6 ກິດຈະກໍາລະດັບເເຂວງ, 6 ກິດຈະກໍາລະດັບເມືອງ, ເພື່ອສ້າງຂະບວນການໃຫ້ຟົດຟື້ນໃນຂອບເຂດທົ່ວແຂວງ ຕະຫຼອດຮອດຂັ້ນເມືອງທ່າເເຮງຂອງການທ່ອງທ່ຽວຂອງບັນດາເມືອງເພື່ອເຊີນຊວນໃຫ້ນັກທ່ອງທ່ຽວເຂົ້າໄປທ່ຽວຊົມໃຫ້ບັນລຸຄາດໝາຍວາງໄວ້.
ພິທີປະກາດຮັບຮອງເອົາວັດພຣະທາດພະບາດ-ໂພນສັນເປັນມໍລະດົກແຫ່ງຊາດ ລະດັບຊາດ ທາງດ້ານວັດທະນະທໍາແລະ ພິທີເປີດປີທ່ອງທ່ຽວລາວ-ທ່ອງທ່ຽວລາວ2024 ຂອງແຂວງບໍລິຄໍາໄຊປີ້ນີ້ໄດ້ດໍາເນີນເປັນເວລາ 4 ວັນ ລະຫວ່າງວັນທີ 22 ຫາ 25 ມັງກອນນີ້ ໂດຍໄດ້ຈັດຫຼາຍກິດຈະກໍາເຊັ່ນ: ການປະກວດສິລະປະວັນນະຄະດີ, ການແຂ່ງຂັນຮ້ອງເພງ ແລະ ການຟ້ອນຂອງນ້ອງນັກຮຽນຈາກໂຮງຮຽນຕ່າງໆພາຍໃນເມືອງທ່າພະບາດພ້ອມທັງການປະກວດຂັບລໍາທ້ອງຖິ່ນ, ເດີນແບບຊົນເຜົ່າພາຍໃນເມືອງ ແລະ ຊົມການສະແດງກາຍະສິນຈາກສູນກາງ ເພື່ອເປັນການໂຄສະນາເຜີຍແຜ່ວັດທະນະທໍາອັນດີງາມຂອງຊາດລາວ, ງານວາງສະແດງສິນຄ້າ.
ຂ່າວຈາກ: ວິທະຍຸກະຈາຍສຽງແຫ່ງຊາດລາວ ( ວສລ )