ສຳນັກຂ່າວຕ່າງປະເທດລາຍງານວ່າ: ເມື່ອເວລາປະມານ 5 ໂມງເຊົ້າຂອງວັນທີ 22 ມັງກອນທີ່ຜ່ານມາເກີດເຫດດິນຖະຫຼົ່ມທີ່ເມືອງຈ້າວຕົງ ໃນມົນທົນຢູນານ, ປະເທດຈີນ, ດີນໄດ້ຖະຫຼົ່ມທັບບ້ານເຮືອນຂອງປະຊາຊົນຢ່າງໜ້ອຍ 18 ຫຼັງ, ມີປະຊາຊົນທີ່ຕິດຢູ່ໃຕ້ຊາກອາຄານຈຳນວນ 47 ຄົນ, ນອກນີ້ຍັງຕ້ອງໄດ້ອົບພະຍົບປະຊາຊົນອອກຈາກພື້ນທີ່ຫຼາຍກວ່າ 500 ຄົນໂດຍດ່ວນເພື່ອຄວາມປອດໄພ.

ພາຍຫຼັງທີ່ເກີດເຫດການຂຶ້ນ ປະທານນາທິບໍດີ ສີຈິນຜິງ ໄດ້ອອກຄຳສັ່ງໃຫ້ເຈົ້າໜ້າທີ່ເກືອບ 1,000 ຄົນ ລົງສຸມກຳລັງຊ່ວຍເຫຼືອຜູ້ປະສົບເຫດເພື່ອຄົ້ນຫາຜູ້ລອດຊີວິດຢ່າງຮີບດ່ວນ. ຕາມການລາຍງານຂອງສື່ທ້ອງຖິ່ນ CCTV ໄດ້ໃຫ້ຮູ້ວ່າ: ເຈົ້າໜ້າທີ່ໄດ້ພົບຜູ້ເສຍຊີວິດແລ້ວຢ່າງໜ້ອຍ 8 ຄົນ, ໃນຂະນະນີ້ສາມາດຊ່ວຍເຫຼືອຜູ້ທີ່ຕິດຢູ່ໃຕ້ຊາກອາຄານ 4 ຄົນ ແລະ ຍັງຈະມີການຄົ້ນຫາຜູ້ສູນຫາຍຕື່ມອີກ, ສ່ວນສາເຫດທີ່ເຮັດໃຫ້ເກີດເຫດການດັ່ງກ່າວຂຶ້ນແມ່ນຍັງບໍ່ທັນໄດ້ຮັບການລາຍງານຈາກເຈົ້າໜ້າທີ່ແຕ່ຢ່າງໃດ ເພາະຍັງຢູ່ໃນຂະບວນການສືບຫາສາເຫດທີ່ເກີດຂຶ້ນ. ສຳລັບພື້ນທີ່ບໍລິເວນດັ່ງກ່າວກໍເຄີຍເກີດເຫດການແບບນີ້ຂຶ້ນມາແລ້ວໃນເດືອນມັງກອນປີ 2013, ໃນຄັ້ງນັ້ນມີຍອດຜູ້ເສຍຊີວິດ 18 ຄົນ.