ເມື່ອບໍ່ດົນມານີ້, ຫ້ອງການອຸດສາຫະກຳ ແລະ ການຄ້າເມືອງວິລະບູລີ, ແຂວງສະຫວັນນະເຂດໄດ້ຈັດພິທີທໍາລາຍສິນຄ້າເສື່ອມຄຸນນະພາບ (ສິນຄ້າໝົດອາຍຸ) ໂດຍການເຂົ້າຮ່ວມຂອງທ່ານ ສີຄູນ ບານມະນີວົງ ຮອງເຈົ້າເມືອງວິລະບູລີ ຜູ້ຊີ້ນໍາວຽກງານວັດທະນະທຳ-ສັງຄົມ ແລະ ມີພາກສ່ວນກ່ຽວຂ້ອງເຂົ້າຮ່ວມ.
ທ່ານ ບົວລະຄອນ ພົມມະວົງ ຮອງຫົວໜ້າຫ້ອງການອຸດສາຫະກໍາ ແລະ ການຄ້າເມືອງວິລະບູລີ ໄດ້ລາຍງານວ່າ: ໃນໄລຍະ 1 ປີທີ່ຜ່ານມາ ເຈົ້າໜ້າທີ່ກວດກາການຄ້າເມືອງວິລະບູລີໄດ້ຈັດຕັ້ງເຄື່ອນໄຫວຕິດຕາມ, ກວດກາການຈໍາໜ່າຍສິນຄ້າເສື່ອມຄຸນນະພາບ, ໝົດອາຍຸສິນຄ້າເກືອດຫ້າມ-ລອກຮຽນແບບຢູ່ຕາມທ້ອງຕະຫຼາດ ແລະ ບັນດາຫ້າງຮ້ານຕ່າງໆ ທັງຂອງຄົນລາວ ແລະ ຊາວຕ່າງປະເທດທີ່ເຄື່ອນໄຫວທຸລະກິດຄ້າຂາຍຢູ່ແຕ່ລະຈຸດສຸມ, ກຸ່ມບ້ານຕ່າງໆໃນຂອບເຂດທົ່ວເມືອງໄດ້ທັງໝົດ 5 ຄັ້ງ, ມີຫ້າງຮ້ານທີ່ຖືກກວດກາທັງໝົດ 75 ຮ້ານ, ກວດພົບສິນຄ້າຈຳໜ່າຍທີ່ບໍ່ຖືກຕ້ອງມີ 13 ຮ້ານ, ເຊິ່ງເຈົ້າໜ້າທີ່ໄດ້ເຮັດບົດບັນທຶກກ່າວເຕືອນ ແລະ ສຶກສາອົບຮົມເຈົ້າຂອງຮ້ານ, ພ້ອມທັງຢຶດສິນຄ້າດັ່ງກ່າວໄວ້ໄດ້ທັງໝົດ 14 ລາຍການ, ໃນນີ້ມີສິນຄ້າເສື່ອມຄຸນ-ໝົດອາຍຸ 13 ລາຍການ, ສິນຄ້າຫ້າມຈຳໜ່າຍມີ 1 ລາຍການ ຈຶ່ງໄດ້ນຳເອົາສິນຄ້າເສື່ອມຄຸນ-ໝົດອາຍຸດັ່ງກ່າວທຳລາຍຖິ້ມ ເພື່ອສ້າງຄວາມປອດໄພໃຫ້ແກ່ປະຊາຊົນຜູ້ບໍລິໂພກ.
ຂ່າວ-ພາບ: ປະຊາຊົນ