ໃນວັນທີ 17 ມັງກອນ2024,ພິທີເຊັນບົດບັນທຶກຄວາມເຂົ້າໃຈລະຫວ່າງ ກະຊວງສາທາລະນະສຸກ ຕາງໜ້າໂດຍ ສູນການແພດຟື້ນຟູໜ້າທີ່ການ ແລະ ອົງການເພື່ອມະນຸດສະທໍາ ແລະ ການມີສ່ວນຮ່ວມ ສໍາລັບໂຄງການຟື້ນຟູໜ້າທີ່ການຂັ້ນພື້ນຖານໃນຊຸມຊົນໄດ້ຈັດຂຶ້ນທີ່ໂຮງແຮມແລນມາກ ນະຄອນຫຼວງວຽງຈັນ ຕາງໜ້າຝ່າຍລາວ ໂດຍທ່ານ ດຣ. ທອງເພັດ ສິດທິວັນ, ຫົວໜ້າສູນການແພດຟື້ນຟູໜ້າທີ່ການແລະ ທ່ານ ເຣເນຍ໌ ຄາຣາໄບ,ຜູ້ຈັດການປະຈໍາປະເທດລາວ ອົງການເພື່ອມະນຸດສະທໍາ ແລະ ການມີສ່ວນຮ່ວມ ປະຈໍາ ສປປ ລາວ. ໂດຍການເຂົ້າຮ່ວມຂອງທ່ານສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ, ຜູ້ຕາງໜ້າກະຊວງການຕ່າງປະເທດ, ກະຊວງສຶກສາທິການ ແລະ ກິລາ. ພ້ອມດ້ວຍຜູ້ຕາງໜ້າພາກສ່ວນກ່ຽວຂ້ອງ ຈາກແຂວງ ແລະ ເມືອງ ເປົ້າໝາຍຂອງໂຄງການ ເຊັ່ນ: ແຂວງ ຫົວພັນ ແລະ ຈຳປາສັກ.

ໂຄງການຟື້ນຟູໜ້າທີ່ການຂັ້ນພື້ນຖານໃນຊຸມຊົນໄດ້ຮັບທຶນສະໜັບສະໜູນຈາກກະຊວງການຕ່າງປະເທດ ຂອງປະເທດລຸກຊໍາບວກ ໃນມູນຄ່າ 800,000 ເອີໂຣ ແລະ ມີໄລຍະເວລາຈັດຕັ້ງປະຕິບັດ ນັບແຕ່ມື້ທີ່ໄດ້ຮັບອະນຸມັດ ເຖິງ ວັນທີ 31 ທັນວາ 2027.ເຊິ່ງຈະຈັດຕັ້ງປະຕິບັດ ຢູ່15 ບ້ານ ໃນ 3ເມືອງ ຂອງ ແຂວງຫົວພັນ ຄື: ເມືອງຫົວເມືອງ, ຊໍາເໜືອ ແລະ ວຽງໄຊ, ແລະ 10ບ້ານ ໃນ 2 ເມືອງ ຂອງແຂວງຈຳປາສັກ ຄື: ນະຄອນປາກເຊ ແລະ ເມືອງບາຈຽງຈະເລີນສຸກ ມີຈຸດປະສົງ ເພື່ອຍົກລະດັບຄຸນນະພາບການບໍລິການດ້ານການແພດຟື້ນຟູໜ້າທີ່ການ ເພື່ອເຮັດໃຫ້ຄົນພິການສາມາດເຂົ້າເຖິງການບໍລິການທີ່ມີຄຸນນະພາບ ແນໃສ່ປັບປຸງປັບຊີວິດການເປັນຢູ່ຂອງຄົນພິການໃຫ້ດີຂຶ້ນ ແລະ ມີສ່ວນຮ່ວມໃນສັງຄົມ.