ວັນທີ 18 ມັງກອນ 2024 ຜ່ານມາ, ທ່ານ ພົນຈັດຕະວາ ໄພວັນ ຈັນທະພົມມາ ຮອງຫົວໜ້າກົມໃຫຍ່ການເມືອງກອງທັບ ກະຊວງປ້ອງກັນປະເທດ ຕາງໜ້າຄະນະພັກ-ຄະນະນໍາກະຊວງປ້ອງກັນປະເທດ ພ້ອມດ້ວຍຄະນະ ເຄື່ອນໄຫວຢ້ຽມຢາມ ພາກສະໝາມເກັບກູ້ລະເບີດບ້ານໂພນທ່ຽງ ເມືອງກາສີ ເເຂວງວຽງຈັນ ໃນໂອກາດສະເຫລີມສະຫລອງ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ(20 ມັງກອນ 1949-20 ມັງກອນ 2024) ໂດຍມີນາຍ ແລະ ພົນທະຫານ ຝ່າຍ ສປປ ລາວ ແລະ ຣັດເຊຍ, ພ້ອມດ້ວຍປະຊາຊົນພາຍໃນບ້ານເຂົ້າຮ່ວມ ເຊິ່ງໄລຍະຜ່ານມາ, ກອງທັບປະຊາຊົນລາວ ກະຊວງປ້ອງກັນປະເທດ ຮ່ວມກັບ ໜ່ວຍງານ ເກັບກູ້ລະເບີດ ສູນກູ້ມິນສາກົນ ກໍາລັງປະກອບອາວຸດ ເເຫ່ງສະຫະພັນຣັດເຊຍ ເອົາໃຈໃສ່ຢ່າງເເຂງເເຮງໃນການກກວດກູ້ລະເບີດບໍ່ທັນເເຕກທີ່ຕົກຄ້າງຢູ່ລາວ ໂດຍສະເພາະຢູ່ 5 ບ້ານຄື: ບ້ານວຽງເເກ້ວ, ໂພນທ່ຽງ, ໂພນສີດາ, ວຽງສະໄໝ ເເລະ ບ້ານນາມົນ ເມືອງກາສີ ເເຂວງວຽງຈັນ ເພື່ອຮັບປະກັນໃຫ້ປະຊາຊົນມີການດໍາລົງຊີວິດທີ່ປອດໄພ ເເລະ ສາມາດຂະຫຍາຍເນື້ອທີ່ການຜະລິດໃຫ້ປະຊາຊົນ.

ທ່ານ ພັນໂທ ມາກຊິມ ເຕີຄາເຊັນ ຫົວໜ້າໜ່ວຍງານເກັບກູ້ລະເບີດ ສູນກູ້ມິນສາກົນ ກຳລັງປະກອບອາວຸດແຫ່ງສະຫະພັນຣັດເຊຍ ໄດ້ລາຍງານວ່າ: ປັດຈຸບັນ, ໜ່ວຍງານເກັບກູ້ລະເບີດຂອງສູນກູ້ມິນສາກົນ ກໍາລັງປະກອບອາວຸດ ແຫ່ງ ສະຫະພັນ ຣັດເຊຍ ກໍາລັງປະຕິບັດໜ້າທີ່ຢູ່ພື້ນທີ່ ໝາຍເລກ 1, ມີເນື້ອທີ່ລວມທັງໝົດ 9,4 ເຮັກຕາ ແລະ ພື້ນທີ່ໝາຍເລກ 2 ມີເນື້ອທີ່ລວມທັງໝົດ 1,9 ເຮັກຕາ ໂດຍໜ່ວຍງານເກັບກູ້ລະເບີດ ໄດ້ແບ່ງດິນທີ່ຈະກວດກູ້ອອກເປັນລັອກ 25×25 ແມັດ ໂດຍນໍາໃຊ້ອຸປະກອນກວດກູ້ລະເບີດຄື: ອຸປະກອນກວດຫາບົມ (ກວດເລິກ) ອີແອັມແປ-ແປ2, ອຸປະກອນກວດຫາລະເບີດ (ກວດຕື້ນ) ອີແອັມແປ-3, ອຸປະກອນກວດຫາລະເບີດໜ້າດິນ ແປແປໂອ-2ອີ. ໃນນັ້ນ, ພື້ນທີ່ສໍາລັບການຜະລິດກະສິກຳ ໄດ້ກວດຫາວັດຖຸລະເບີດເລິກ 25 ຊັງຕີແມັດ ແລະ ພື້ນທີ່ສໍາລັບການຂະຫຍາຍຜັງເມືອງແມ່ນໄດ້ກວດຫາວັດຖຸລະເບີດເລິກ 2,5 ແມັດ. ການເຮັດວຽກໃນຄັ້ງນີ້, ແມ່ນເຮັດຮ່ວມກັບກອງເກັບກູ້ລະເບີດເພື່ອມະນຸດສະທໍາ 58 ກອງທັບປະຊາຊົນລາວ, ມາຮອດວັນທີ 18 ມັງກອນ 2024 ສາມາດເກັບກູ້ພື້ນທີ່ສໍາເລັດ 10,1 ເຮັກຕາ, ກວດພົບລະເບີດ 656 ໜ່ວຍ, ພື້ນທີ່ໝາຍເລກ 1 ກວດກູ້ສໍາເລັດ 9,1 ເຮັກຕາ. ໃນນັ້ນໜ່ວຍງານເກັບກູ້ລະເບີດຣັດເຊຍ ກວດກູ້ສໍາເລັດ 6 ເຮັກຕາ ແລະ ກອງເກັບກູ້ລະເບີດເພື່ອມະນຸດສະທໍາ 58 ກອງທັບປະຊາຊົນຊາວ ກວດກູ້ສໍາເລັດ 3,1 ເຮັກຕາ; ພື້ນທີ່ໝາຍເລກ 2 ກວດກູ້ສໍາເລັດແລ້ວ 1 ເຮັກຕາ ພົບວັດຖຸລະເບີດ 3 ໜ່ວຍ.

ທ່ານ ພົນຈັດຕະວາ ໄພວັນ ຈັນທະພົມມາ ໄດ້ກ່າວວ່າ: ວ່າການປະຕິບັດໜ້າທີ່ຂອງ ໜ່ວຍງານເກັບກູ້ລະເບີດເພື່ອມະນຸດສະທໍາ 58 ກະຊວງປ້ອງກັນປະເທດ ແລະ ໜ່ວຍງານເກັບກູ້ລະເບີດຂອງສູນກູ້ມິນສາກົນ ກໍາລັງປະກອບອາວຸດ ແຫ່ງ ສະຫະພັນ ຣັດເຊຍ ແມ່ນມີຜົນສຳເລັດໃນການເກັບກູ້ເປັນລຳດັບ ເຊິ່ງຜົນສຳເລັດດັ່ງກ່າວ ສະແດງໃຫ້ເຫັນຄວາມຕັ້ງໃຈ, ຄວາມເອົາໃຈໃສ່ຂອງທີມງານທັງສອງຝ່າຍ ທີ່ສາມາດເກັບກູ້ໄດ້ສໍາເລັດຕາມຄາດໝາຍທີ່ວາງໄວ້. ປັດຈຸບັນ, ເນື້ອທີ່ທີ່ຍັງເຫລືອ ແມ່ນຈະປະຕິບັດໃຫ້ສໍາເລັດໃນໄວໆນີ້ ເພື່ອສາມາດປິດສະໜາມ ແລະ ມອບດິນຄືນໃຫ້ປະຊາຊົນ ໄດ້ທໍາການຜະລິດດ້ວຍຄວາມປອດໄພ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນເປັນກ້າວໆ.

ທີ່ມາ: ປະເທດລາວ