ເມື່ອບໍ່ດົນມານີ້, ທະນາຄານໂລກໄດ້ມີການລາຍງານກ່ຽວກັບ ສປປ ລາວ ໂດຍໄດ້ລະບຸວ່າ: ການເປີດປີທ່ອງທ່ຽວລາວ 2024 ເປັນໂອກາດສຳຄັນຕໍ່ເສດຖະກິດລາວເພາະທະນາຄານໂລກຄາດຄະເນໄວ້ວ່າ ການທ່ອງທ່ຽວລາວຈະສາມາດຂະຫຍາຍຕົວໄດ້ປະມານ 10% ຂອງ GDP ແລະ ຈະສາມາດດຶງດູດນັກທ່ອງທ່ຽວໄດ້ຢ່າງໜ້ອຍ 3 ລ້ານກວ່າຄົນ.
ບົດລາຍງານຫຼ້າສຸດຂອງທະນາຄານໂລກຍັງໄດ້ໃຫ້ຮູ້ຕື່ມອີກວ່າ: ສາມຂົງເຂດຈຸດສຸມທີ່ຕ້ອງໄດ້ປະຕິບັດ ໃນດ້ານການທ່ອງທ່ຽວລາວ ພາຍຫຼັງຜ່ານການລະບາດຂອງ COVID-19 ກໍຄື: ການຕິດຕາມຕະຫຼາດການທ່ອງທ່ຽວ, ການພັດທະນາທັກສະ ແລະ ຕະຫຼາດເປົ້າໝາຍການທ່ອງທ່ຽວແລະ ການສົ່ງເສີມການທ່ອງທ່ຽວ ເຊັ່ນ: ພັດທະນາ ແລະ ຈັດຕັ້ງປະຕິບັດຫຼັກສູດຝຶກອົບຮົມການຕ້ອນຮັບນັກທ່ອງທ່ຽວໂດຍທົ່ວໄປ ໃຫ້ແທດເໝາະກັບຄວາມຕາມຕ້ອງການ ແລະ ສ້າງຂີດຄວາມສາມາດດ້ານບຸກຄະລາກອນຂອງຂະແໜງການທ່ອງທ່ຽວ, ປັບປຸງຄວາມສາມາດຂອງອຸດສາຫະກໍາການທ່ອງທ່ຽວດ້ານການຕ້ອນຮັບນັກທ່ອງທ່ຽວດ້ວຍການສື່ສານກັບລູກຄ້າ, ຝຶກອົບຮົມດ້ານຕະຫຼາດການທ່ອງທ່ຽວຈາກປະເທດຈີນ ເພື່ອຕອບສະໜອງຕາມຄວາມຕ້ອງການຂອງຕະຫຼາດທ່ອງທ່ຽວຈາກປະເທດຈີນທີ່ກໍາລັງຂະຫຍາຍຕົວ; ໂຄສະນາການຕະຫຼາດທ່ອງທ່ຽວຜ່ານການນໍາໃຊ້ສື່ສັງຄົມອອນລາຍ ເພື່ອໂຄສະນາຕະຫລາດການທ່ອງທ່ຽວ.
ໃນປີ 2018-2019 ສປປ ລາວສາມາດດຶງດູດນັກທ່ອງທ່ຽວໄດ້ເກືອບ 5 ລ້ານຄົນ, ສ້າງລາຍໄດ້ເກືອບ 700 ລ້ານໂດລາ, ເຊິ່ງຖືວ່າເປັນລາຍຮັບອັນຕົ້ນຂອງປະເທດລາວ.