ວັນທີ 12 ມັງກອນ 2024, ລັດຖະບານຍີ່ປຸ່ນໄດ້ໃຫ້ທຶນ 326.200 ໂດລາສະຫະລັດ ເພື່ອ ສະໜັບສະໜູນໂຄງການສົ່ງເສີມການມີສ່ວນຮ່ວມຂອງຄົນພິການໃນ ສປປ ລາວ ໂດຍສະເພາະແມ່ນສົ່ງເສີມການມີສ່ວນຮ່ວມຂອງກຸ່ມຄົນພິການໃນສັງຄົມຢູ່ ແຂວງອຸດົມໄຊ ດ້ວຍການເຮັດວຽກແບບຄູ່ຂະໜານກັນເຊັ່ນ: ການສ້າງຄວາມສາມາດໃຫ້ຄົນພິການ ແລະ ສ້າງສິ່ງອຳນວຍຄວາມສະດວກທາງດ້ານສະພາບແວດລ້ອມໃນຊຸມຊົນ ເພື່ອເຮັດໃຫ້ຄົນພິການສາມາດເຂົ້າຮອດເຂົ້າເຖິງໄດ້.
“ໂຄງການສົ່ງເສີມການມີສ່ວນຮ່ວມຂອງຄົນພິການໃນປະເທດລາວ” ໄດ້ຈັດຕັ້ງປະຕິບັດກິດຈະກຳຂອງໂຄງການ, ມີການພົວພັນຮ່ວມມືຢ່າງໃກ້ຊິດກັບ ກະຊວງແຮງງານ ແລະ ສະຫວັດດີການສັງຄົມ ໂດຍຜ່ານການຈັດຕັ້ງປະຕິບັດກິດຈະກຳຕ່າງໆຮ່ວມກັນ ໃນໄລຍະການດຳເນີນໂຄງການ ແລະ ທັງມີການອອກແບບບັນດາກິດຈະກຳໃຫ້ແທດເໝາະກັບຄົນພິການ ໂດຍອາໄສຄວາມຊ່ຽວຊານ ແລະ ປະສົບການ ຈາກການຈັດຕັ້ງປະຕິບັດກິດຈະກຳທີ່ຜ່ານມາຂອງອົງການ.
ຮ່ວມລົງນາມໃນການໃຫ້ທຶນສະໜັບສະໜູນໂຄງການສົ່ງເສີມການມີສ່ວນຮ່ວມຂອງຄົນພິການໃນ ສປປ ລາວຄັ້ງນີ້ ມີທ່ານ ນາກາໂນະ ຈຸນຢະ, ອຸປະທູດຍີ່ປຸ່ນປະຈໍາ ສປປ ລາວ ແລະ ທ່ານ ຢາມາໂມໂຕະ ໂຢຊິໂນບຸ, ຜູ້ຕາງໜ້າໂຄງການປະຈໍາຫ້ອງການນະຄອນຫລວງວຽງຈັນຂອງອົງການຊ່ວຍເຫຼືອ ແລະ ບັນເທົາທຸກແຫ່ງປະເທດຍີ່ປຸ່ນ (AAR Japan).
ທີ່ມາ: ໜັງສືພິມວຽງຈັນທາຍ