ວັນທີ 9 ມັງກອນ 2024, ທີ່ສະພາການຄ້າ ແລະອຸດສາຫະກຳແຫ່ງຊາດລາວ (ສຄອຊ) ໄດ້ຈັດພິທີຖະແຫລງຂ່າວ ກຽມຈັດງານເທສະການອາຫານລາວ 2024 ໂດຍໃຫ້ກຽດເຂົ້າຮ່ວມຂອງທ່ານ ລາວັນ ສຸດທິສານ ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ, ທ່ານ ມະໂນທອງ ວົງໄຊ ຮອງລັດຖະມົນ ກະຊວງອຸດສາຫະກໍາ ແລະການຄ້າ, ທ່ານ ດາວວອນ ພະຈັນທະວົງ ຮອງປະທານ ສຄອຊ, ທ່ານ ປ້າ ມະໂນລາ ດາລາວົງ ປະທານທີ່ປຶກສາ ສທຍ ພ້ອມດ້ວຍບໍລິສັດຫ້າງຮ້ານທີ່ໃຫ້ການສະຫນັບສະຫນູນໂດຍສະເພາະແມ່ນ ບໍລິສັດເບຍລາວຈຳກັດ, ບໍລິສັດດາວເຮືອງຈໍາກັດ ແລະພາກສ່ວນອື່ນໆອີກ.
ທ່ານ ນາງ ຈັນທະຈອນ ວົງໄຊ ປະທານຄະນະບໍລິຫານສະມາຄົມນັກທຸລະກິດແມ່ຍິງ, ປະທານຄະນະກຳມະການຈັດງານ ເທສະການອາຫານລາວຄັ້ງທີ 19 ປະຈຳປີ 2024 ກ່າວວ່າ: ງານຄັ້ງນີ້ ຈະເປີດຂຶ້ນໃນວັນທີ 23-27/01/2024, ທີ່ສວນເຈົ້າອະນຸວົງ ພາຍໃຕ້ຄໍາຂວັນ: “ຊີມອາຫານລາວ ທ່ອງທ່ຽວລາວປີ 2024” (Tasting Lao food visit Laos year 2024). ເພື່ອແນໃສ່ການອະນຸລັກອາຫານພື້ນເມືອງທີ່ເປັນເອກະລັກຂອງລາວ, ພືດຜັກຜົນຜະລິດກະສິກໍາປອດສານພິດໃຫ້ໄດ້ຈໍາໜ່າຍອອກສູ່ສັງຄົມໄດ້ກິນຢູ່ແບບສະອາດ ແລະປອດໄພ, ໃນປີທ່ອງທ່ຽວລາວຕາມທິດທາງຂອງລັດຖະບານ ທີ່ກະກຽມເປັນເຈົ້າພາບໃນການຈັດກອງປະຊຸມອາຊຽນ ແລະ ກອງປະຊຸມປິ່ນອ້ອມໃນປີ 2024 ນີ້ເອງ. ຈຸດປະສົງຄື: 1) ເພື່ອສືບຕໍ່ອະນຸລັກ ແລະ ສົ່ງເສີມວັດທະນະທໍາ ດ້ານອາຫານລາວໃຫ້ຄົງຢູ່ຄູ່ກັບກັບສັງຄົມລາວ, ທັງເປັນການໂຄສະນາອາຫານລາວໃຫ້ເປັນທີ່ຮູ້ຈັກທັງພາຍໃນ, ຕ່າງປະເທດ ແລະ ກ້າວຂຶ້ນຂາຍໃນລະບົບອອນລາຍ; 2) ເພື່ອສ້າງລາຍໄດ້ໃຫ້ແກ່ ຜູ້ປະກອບການທາງດ້ານອາຫານ ກ້າວໄປເຖິງສາມາດສ້າງເປັນ ແບຣນ(BRAND)ອາຫານເອກະລັກແບບລາວໆ ຈໍາໜ່າຍອອກສູ່ສາກົນໄດ້; 3) ເພື່ອສ້າງຄວາມເຂັ້ມແຂງ ແລະ ຄວາມສາມັກຄີ ໃຫ້ແກ່ກັບສະມາຊິກພາຍໃນ ສທຍ ແລະຜູ້ປະກອບການດ້ວຍກັນທົ່ວປະເທດ; 4) ສ້າງວຽກເຮັດງານທໍາໃຫ້ແມ່ຍິງທີ່ມີພອນສະຫວັນໃນການປຸງແຕ່ງອາຫານ.
ພາຍໃນງານຈະມີຮ້ານອາຫານລາວ, ອາຫານປະຍຸກ ແລະ ອາຫານນາໆຊາດມາວາງຂາຍ ເຖິງ 180 ຮ້ານໃນນັ້ນ ອາຫານເອກກະລັກຈາກທຸກແຂວງໃນທົ່ວປະເທດ ແລະຈາກຜູ້ສະໜັບສະໜູນງານລວມ 165 ຮ້ານ, ຂາຍເຄື່ອງຫັດຖະກໍາ ແລະ ກະສິກໍາ 15 ຮ້ານ. ຄາດຄະເນເມັດເງິນໝູນວຽນປະມານ 6 ຕື້ກີບ. ນອກຈາກນີ້ຍັງມີກິດຈະກໍາສະແດງສິລະປະພື້ນເມືອງລາວ, ຂາຍອາຫານລາວເອກະລັກຂອງ 18 ແຂວງໃນລາວ, ສາທິດການເຮັດເຂົ້າໜົມລາວ, ສໍາມະນາການບໍລິຫານທຸລະກິດຂະໜາດນ້ອຍ(ການວາງແຜນການຕະຫລາດ), ປະກວດ ແກະສະຫລັກໝາກໄມ້ນາໆພັນ ພ້ອມຂາຍເຂົ້າໜົມແບບລາວໆ, ສະແດງສິລະປະ ພື້ນເມືອງລາວ ແບບມວນຊົນ ແລະ ໄລ້ສົດ(Live)ອາຫານຈາກແຕ່ລະແຂວງ ແລະ ບັນຍາກາດໃນງານທຸກໆວັນ.
ທີ່ມາ: ເສດຖະກິດສັງຄົມ