ຜູ້ຖືກຫາຂາດສະຕິ ໂດດເຂົ້າໄປທຳຮ້າຍຜູ້ພິພາກສາ ເນື່ອງຈາກບໍ່ພໍໃຈຄຳຕັດສິນ.
ອີງຕາມສຳນັກຂ່າວຕ່າງປະເທດລາຍງານໃຫ້ຮູ້ວ່າ: ເມື່ອວັນທີ 1 ມັງກອນ ທີ່ຜ່ານມາ, ໄດ້ເກີດເຫດການບໍ່ຄາດຄິດຂຶ້ນພາຍໃນສານຂອງລັດເນວາດາ, ສະຫະລັດອາເມຣິກາ ໃນການຕັດສິນຄະດີໜຶ່ງ ພາຍຫຼັງທີ່ຜູ້ຖືກຫາໄດ້ຍິນຄຳຕັດສິນຂອງຜູ້ພິພາກສາຕັດສິນໃຫ້ຕົນເອງຕ້ອງຈຳຄຸກ ໄດ້ເກີດຄວາມຫົວຮ້ອນ ແລະ ບໍ່ພໍໃຈຢ່າງຍິ່ງ ພາໃຫ້ຂາດສະຕິໂດດພຸ່ງເຂົ້າໄປທຳຮ້າຍຮ່າງກາຍຜູ້ພິພາກສາຄົນດັ່ງກ່າວທັນທີ.
ເມື່ອເກີດເຫດການດັ່ງກ່າວຂຶ້ນ ເຈົ້າໜ້າທີ່ປະຈຳສານກໍໄດ້ຮີບເຂົ້າໄປກັກຕົວຜູ້ຖືກຫາຄົນດັ່ງກ່າວອອກມາໄດ້ຢ່າງວ່ອງໄວ, ໂຊກດີທີ່ ຜູ້ພິພາກສາບໍ່ໄດ້ຮັບບາດເຈັບແຕ່ຢ່າງໃດ, ແຕ່ເຈົ້າໜ້າທີ່ທ່ານໜຶ່ງທີ່ເຂົ້າໄປຫ້າມໄດ້ຮັບບາດເຈັບ ຫົວແຕກ ແລະ ບ່າໄຫຼ່ຫຼຸດ.
ສ່ວນຜູ້ຖືກຫາກໍຕ້ອງຮັບຂໍ້ຫາໃໝ່ເພິ່ມອີກຫຼາຍຂໍ້ຫາໂດຍສະເພາະແມ່ນຂໍ້ຫາທຳຮ້າຍຮ່າງກາຍຜູ້ພິພາກສາ ແລະ ເຈົ້າໜ້າ ທີ່ຂອງສານ. ກ່ອນໜ້ານີ້ຜູ້ຖືກຫາຄົນດັ່ງກ່າວເຄີຍຖືກຈັບໃນຄະດີທຳຮ້າຍຮ່າງກາຍຄົນໃນຄອບຄົວມາແລ້ວຄັ້ງໜຶ່ງ, ສ່ວນການກໍ່ເຫດຄັ້ງຫຼ້າສຸດນີ້ຄາດການວ່າ: ເກີດຈາກຜູ້ຖືກຫາມີຄວາມບໍ່ພໍໃຈຕໍ່ກັບຄຳຕັດສິນຂອງຜູ້ພິພາກສາທີ່ຕັດສິນໃຫ້ຕົນຕ້ອງຖືກຈຳຄຸກອີກຄັ້ງ ເຮັດໃຫ້ຂາດການຄວບຄຸມອາລົມ ແລະ ໃຈຮ້າຍ ໂດດເຂົ້າໄປທຳຮ້າຍຮ່າງກາຍຜູ້ພິພາກສາຄົນດັ່ງກ່າວ.