ໃນວັນທີ 3 ມັງກອນ 2023 ສຳນັກຂ່າວໄທ ລາຍງານວ່າ: ເຈົ້າໜ້າທີ່ຕຳຫຼວດ ແຂວງລະຍອງ ປະເທດໄທ ໄດ້ຮັບແຈ້ງຄວາມຈາກ ນາງ ວັນດີ ອານໍຍຸ 60 ປີ ວ່າຊັບສິນທອງຄຳ ລາຄາ 2 ລ້ານບາດ ຫຼື ປະມານ 1.280.000.000 ກີບສູນຫາຍ ໂດຍເອົາໃສ່ກະເປົ໋າໄວ້ ແຕ່ຫຼານເຂົ້າໃຈຜິດຄິດວ່າເປັນຂີ້ເຫຍື້ອຈຶ່ງນຳເອົາໄປຖິ້ມຢູ່ຖັງຂີ້ເຫຍື້ອນອກບ້ານ.

ນາງ ວັນດີ ກ່າວວ່າ: ວັນທີ່ຄຳເສຍ ແມ່ນວັນທີ 1 ມັງກອນ 2023 ຜ່ານມາ, ຕົນເອງໄດ້ເອົາຄຳໃສ່ໄວ້ຖົງຢາງແລ້ວຫ້ອຍໄວ້ບໍລິເວນໃນເຮືອນ ເຊິ່ງພາຍໃນຖົງຢາງປະກອບມີ: ທອງຄຳແທ່ງ 6 ແທ່ງ, ສາຍຄໍຄຳ 6 ເສັ້ນ, ສາຍແຂນຄຳ 5 ເສັ້ນ, ພຣະລ່ຽມຄຳ 5 ອົງ, ແຫວນເພັດ 3 ວົງ, ແຫວນພອຍ 1 ວົງ, ຈີ້ເພັດ 1 ອັນ, ແຫວນຄຳ 8 ວົງ, ຕຸ້ມຫູຄຳ 1 ຄູ່, ຕຸ້ມຫູເພັດ 1 ຄູ່ ແລະ ປະລັກແຂນເພັດ 1 ວົງ ທີ່ໃສ່ຖົງດຳຊ້ອນກັນ ຫຼັງຈາກນັ້ນຫານຈຶ່ງເອົາອອກໄປຖິ້ມເພາະຄິດວ່າເປັນຂີ້ເຫຍື້ອ ຈາກນັ້ນໄດ້ມີຜູ້ຍິງຂັບລົດມາຄົ້ນຂີ້ເຫຍື້ອ ແລ້ວພົບຊັບສິນດັງກ່າວ ຈາກນັ້ນຈຶ່ງເກັບເອົາແລ້ວຂັບລົດອອກໄປ.

ຕໍ່ມາເຈົ້າໜ້າທີ່ຕຳຫຼວດຈຶ່ງໄດ້ສືບສວນຈຶ່ງໄດ້ຮູ້ບ້ານຂອງຜູ້ຍິງທີ່ໄດ້ເກັບຄຳໄປ, ຍິງຄົນດັ່ງກ່າວ ມີອາຍຸ 46 ປີ ເປັນຄົນເກັບຂອງເກົ່າ ໄດ້ບອກວ່າ: ຕົນເອງໄດ້ຂີ່ລົດເລາະເກັບຂີ້ເຫຍື້ອຕາມສະຖານຍທີ່ຕ່າງໆ ຈົນມາຮອດບ່ອນເກີດເຫດຕົນເອງເຫັນຄຳຢູ່ໃນຖັງຂີ້ເຫຍື້ອຈຶ່ງນຳກັບບ້ານ ເມື່ອມາຮອດບ້ານຈຶ່ງເອົາໃຫ້ຜົວຕົນເບິ່ງ ແຕ່ກໍພາກັນຫົວແລະເຊື່ອວ່າເປັນຂອງປອມ ຈົນເຈົ້າໜ້າທີ່ໄດ້ມາແຈ້ງວ່າເປັນຂອງແທ້ ແຕ່ຕຳຫຼວດບອກວ່າບໍ່ມີຄວາມຜິດເພາະບໍ່ໄດ້ລັກມາ ຫຼັງຈາກນັ້ນເຈົ້າໜ້າທີ່ ພ້ອມຄົນຊາຍຂອງເກົ່າຈຶ່ງນຳຄຳທັງໝົດສົ່ງຄືນເຈົ້າຂອງ.