ໃນຄໍ່າຄືນຂອງວັນທີ 31 ທັນວາທີ່ຜ່ານມານະຄອນຫລວງວຽງຈັນ (ນວ) ໄດ້ຈັດງານສະເຫຼີມສະຫຼອງສົ່ງທ້າຍປີເກົ່າຕ້ອນຮັບປີໃໝ່ 2024 ທີ່ສວນປະຕູໄຊ ເຂົ້າຮ່ວມໂດຍທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີພ້ອມດ້ວຍ ພັນລະຍາ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນມີບັນດາລັດຖະມົນຕີ, ທູຕານຸທູດ ຫົວໜ້າພະແນກການອ້ອມຂ້າງ ນວ, ພ້ອມດ້ວຍມວນຊົນທັງພາຍໃນ ແລະ ຕ່າງປະເທດເຂົ້າຮ່ວມ.
ການສະເຫຼີມສະຫຼອງສົ່ງທ້າຍປີເກົ່າຕ້ອນຮັບປີໃໝ່ໃນປີນີ້ຖືວ່າມີຄວາມພິເສດ, ຄຶກຄື້ນມ່ວນຊື່ນ ແລະ ເປັນຊ່ວງເວລາອັນໜ້າຈົດຈຳທີ່ແສນພິເສດຂອງມວນຊົນຊາວລາວທົ່ວປະເທດ ເພາະມີການປະດັບປະດາເປີດໄຟແສງສີໃສ່ປະຕູໄຊ 4 ດ້ານຢ່າງສະຫງ່າງາມ, ຈຸດພຸດອກໄມ້ໄຟ ຈຳນວນ 60 ຊຸດ ທີ່ສວຍງາມປະມານ 15 ນາທີ, ຮ່ວມຮ້ອງເພງສະບາຍດີປີໃໝ່ ແລະ ໄດ້ມີການສາຍ ຈໍ LED ໃສ່ 2 ຂ້າງ ເພື່ອໃຫ້ມວນຊົນທີ່ມາຮ່ວມງານໄດ້ເຫັນ, ນອກຈາກນີ້ພາຍໃນງານຍັງມີບູ໊ດຂາຍອາຫານ, ເຄື່ອງດື່ມ,ບ່ອນນັ່ງຊົມວິວ, ມຸມຖ່າຍຮູບ,ບູ໊ດວາງສະແດງຂາຍສິນຄ້າໂອດັອບ ແລະ ເຄື່ອງທີ່ລະນຶກຈຳນວນໜຶ່ງເພື່ອສ້າງບັນຍາກາດອັນໜ້າທ່ຽວຊົມແກ່ນັກທ່ອງທ່ຽວທັງພາຍໃນ ແລະ ຕ່າງປະເທດ.
ເຊິ່ງທາງທີມຂ່າວລາວໂພສໄດ້ມີໂອກາດສຳພາດປະຊາຊົນບາງສ່ວນທີ່ໄດ້ມາຮ່ວມງານຕ່າງກໍເວົ້າເປັນສຽງດຽວກັນວ່າ: ຮູ້ສຶກຕື່ນເຕັ້ນຫຼາຍ ເພາະເປັນປີທຳອິດທີ່ມີການສະເຫຼີມສະຫຼອງ ປີໃໝ່ສາກົນ ແລະ ມີການຈູດພຸ ຢູ ທີ່ປະຕູໄຊ ຖືວ່າເປັນການສະເຫຼີມສະຫຼອງປີໃໝ່ທີ່ມີຄວາມພິເສດກວ່າປີທີ່ຜ່ານມາ ແລະຢາກໃຫ້ມີການຈັດງານແບບນີ້ຂຶ້ນມາອີກທຸກໆປີ, ສຳລັບການປັບປຸງງານແມ່ນຢາກໃຫ້ເພີ່ມບ່ອນຝາກລົດໃຫ້ເປັນລະບຽບ, ເພິ່ມຫ້ອງນ້ຳ, ຈຸດວາງຂີ້ເຫຍື້ອ,ຈຳນວນລູກພຸ ແລະ ລວດລາຍຂອງພຸໃຫ້ຫຼາກຫຼາຍຍິ່ງຂຶ້ນ.