ທ່ານ ພັນໂທ ສິນທະສອນ ຈັນທະວົງສາ ຮອງຫົວໜ້າພະແນກຕຳຫຼວດ ປກສ ເມືອງສີສັດຕະນາກ ຜູ້ຊີ້ນຳວຽກງານຕຳຫຼວດຈະລາຈອນ ແລະ ມອດໄຟ ໄດ້ອອກມາຊີ້ແຈງກ່ຽວກັບກໍລະນີລົດເກັງຕຳຮົ້ວ ແລະ ພໍ່ຕູ້ຄຳພັນ ອັດເຂົ້າກັບລົດວີໂກ້ ຢູ່ເສັ້ນທາງບ້ານດົງປະລານ ເມືອງສີສັດຕະນາກ ນະຄອນຫຼວງວຽງຈັນ ໃນວັນທີ 18 ມິຖຸນາ 2023 ຜ່ານມາ.
ຕາມການລາຍງານຂອງເຈົ້າໜ້າທີ່ໄດ້ລະບຸວ່າ: ຄູ່ກໍລະນີທີ່ຂັບລົດມາຕຳມີຊື່ວ່າ: ທ້າວ ວູດິ່ງວ່ຽງ ອາຍຸ 23 ປີສັນຊາດຫວຽດນາມ ອາຊີບນັກສຶກສາ ປັດຈຸບັນອາໄສ ຢູ່ຫໍພັກມະຫາວິທະຍາໄລແຫ່ງຊາດ ເມືອງໄຊທານີ ນະຄອນຫຼວງວຽງຈັນ, ເຊິ່ງຜູ້ກ່ຽວໄດ້ຂັບລົດມາແຕ່ທາງວົງວຽນດົງປະລານ ມຸ້ງໜ້າໄປທາງໄຟແດງວັດທາດຝຸ່ນ ພໍມາຮອດເຂດບ້ານດົງປະລານ ກໍໄດ້ເສຍຫຼັກຂຶ້ນຟຸດບາດໄດ້ໄປຕຳເອົາຮົ້ວເຮືອນ ແລະ ພໍ່ຕູ້ຄຳພັນ ທຳມະວົງສາ ອາຍຸ 74 ປີ ສັນຊາດລາວ ທີ່ກຳລັງຍືນລ້າງມືຢູ່ຕໍ່ໜ້າເຮືອນ ເຮັດໃຫ້ພໍ່ຕູ້ຄຳພັນໄດ້ຮັບບາດເຈັບ ຂາຫັກ 2 ເບື້ອງ ແລະ ລົດຂອງຜູ້ກ່ຽວກໍໄດ້ໄປຕຳເອົາລົດກະບະ ປ້າຍທະບຽນ ກດ 9944 ທີ່ຈອດໄວ້ຢູ່ໜ້າເຮືອນ.
ພາຍຫຼັງທີ່ເກີດອຸບັດຕິເຫດເຈົ້າໜ້າທີ່ໄດ້ນຳລົດທັງ 2 ຄັນເຂົ້າມາດຳເນີນຄະດີຕາມລະບຽບກົດໝາຍ, ສ່ວນພໍ່ຕູ້ຄຳພັນທີ່ບາດເຈັບໄດ້ຖືກນຳສົ່ງໂຮງໝໍມິດຕະພາບ 150 ຕຽງໃນໄລຍະປິ່ນປົວຄູ່ກໍໍລະນີກໍຄທ: ທ້າວ ວູດິ່ງວ່ຽງ ໄດ້ຮັບຜິດຊອບຄ່າໃຊ້ຈ່າຍຕ່າງໆທັງໝົດ ແລະ ໄດ້ເຝົ້າຄົນເຈັບ ຈົນທ່ານໝໍໄດ້ອານຸຍາດໃຫ້ພໍ່ຕູ້ຄຳພັນ ໄດ້ອອກມາປິ່ນປົວຢູ່ເຮືອນ ເຊິ່ງໃນຊ່ວງເວລາທີ່ປິ່ນປົວຢູ່ເຮືອນຄູ່ກໍລະນີກໍໄດ້ທຽວມາຢ້ຽມຢາມ ແລະ ມາຊ່ວຍເຫຼືອພໍ່ຕູ້ຄຳພັນ ແລະ ຄ່າສ້ອມແປງລົດວີໂກ້ກໍແມ່ນ ທ້າວ ວູດິ່ງວ່ຽງ ໄດ້
ຮັບຜິດຊອບສ້ອມແປງໃຫ້ຄືນສະພາບເດີມ ແລະ ສ້ອມແປງກຳແພງເຮືອນໃຫ້ກັບເປັນປົກກະຕິ.
ຈົນມາຮອດວັນທີ 27 ກໍລະກົດ 2023 ທາງກົມຕຳຫຼວດຈະລາຈອນໄດ້ເຊີນຄູ່ກໍລະນີທັງສອງຝ່າຍ ເຂົ້າຮັບຟັງການອະທິບາຍຊີ້ແຈງກ່ຽວກັບກົດຈະລາຈອນຂອງຄູ່ກໍລະນີ ເຊິ່ງທັງສອງຝ່າຍກໍເຫັນດີເປັນເອກະພາບກັນ ແລະ ພ້ອມກັນເຊັນບົດບັນທຶກ ຫຼັງຈາກນັ້ນຄູ່ກໍລະນີຍັງໄດ້ໂອ້ລົມກັນຕື່ມແຕ່ທັງສອງຝ່າຍຍັງຕົກລົງກັນບໍ່ໄດ້ ເຈົ້າໜ້າທີ່ຈຶ່ງໄດ້ແຈ້ງຄູ່ກໍລະນີທັງສອງຝ່າຍໃຫ້ສະຫຼຸບສຳນວນຄະດີ ທີ່ອົງການໄອຍະການປະຊາຊົນເຂດ 3 ເປັນຜູ້ສຶບຕໍ່ດຳເນີນຕາມຂະບວນການຍຸດຕິທຳຕໍ່ໄປ.
ອຸບັດເຫດດັ່ງກ່າວໄດ້ເກີດຂຶ້ນມາໄດ້ປະມານ 6 ເດືອນແລ້ວ ຕົກມາຮອດວັນທີ 18/12/2023 ທາງຜູ້ເປັນລູກຊາຍໄດ້ລະບຸວ່າ: ພາຍຫຼັງທີ່ເກີດອຸບັດເຫດ ພໍ່(ຜູ້ເສຍຊີວິດ) ໄດ້ກາຍເປັນຜູ້ປ່ວຍຕິດຕຽງ ແລະ ບໍ່ໄດ້ຮັບເງິນຄ່າປິ່ນປົວແຕ່ຢ່າງໃດ ຈົນເລື່ອງໄດ້ຮອດສານປະຊາຊົນ ເຂດ3 ເມືອງສີສັດຕະນາກ ແລ້ວສານກໍຕັດສິນວ່າ: ຄູ່ກໍລະນີຕ້ອງມອບເງິນຢຽວຢາໃຫ້ 2.000.000ກີບ ແຕ່ກໍຍັງບໍ່ໄດ້ ຈົນເຖິງປັດຈຸບັນແມ່ນພໍ່ກໍເສຍຊີວິດລົງແລ້ວ ງານປະນາກິດສົບໄດ້ຈັດໃນວັນທີີ 20/12/2023, ດັ່ງນັ້ນ ຜູ້ເປັນລູກຊາຍ ຈຶ່ງໄດ້ອອກມາໂພສຂໍຄວາມຍຸດຕິທຳ.
ຂໍໃຫ້ພາກສ່ວນທີ່ກ່ຽວຂ້ອງຄົ້ນຄວ້າເບິ່ງຄືນຕື່ມ ເພື່ອໃຫ້ຄວາມເປັນທຳແກ່ຄອບຄົວຂອງພໍ່ຕູ້ຄຳພັນ.