ບໍລິສັດ ພັດທະນາເສດຖະກິດສີຂຽວ ຫວຽດ-ລາວ ຈຳກັດ ເຊັນສັນຍາກ່ຽວກັບການສໍາປະທານເນື້ອທີ່ດິນຈໍານວນ 150 ເຮັກຕາ ເພື່ອປູກປ່າ (ປູກໄມ້ພໍໂລເນຍ) ພັດທະນາເສດຖະກິດສີຂຽວແບບຍືນຍົງ ຕິດພັນກັບການສ້າງສູນເຕັກນິກ ແລະ ພັດທະນາການທ່ອງທ່ຽວທາງກະສິກຳ ຢູ່ເຂດບ້ານນາແສ ເມືອງມະຫາໄຊ ແຂວງຄຳມ່ວນ ໃນວັນທີ 19 ທັນວາ 2023 ທີ່ຂະແໜງສົ່ງເສີມການລົງທຶນ ພະແນກແຜນການ ແລະ ການລົງທຶນແຂວງຄຳມ່ວນ.
[metaslider id=”150288″]
ບໍລິສັດດັ່ງກ່າວໄດ້ຮັບການອະນຸຍາດສຳປະທານຈາກອົງການປົກຄອງແຂວງຄຳມ່ວນ ໃນເນື້ອທີ່ດິນຈຳນວນ 150 ເຮັກຕາ ຢູ່ເຂດບ້ານນາແສ ເມືອງມະຫາໄຊ ເພື່ອປູກປ່າ (ປູກໄມ້ພໍໂລເນຍ) ເປັນປະເພດໄມ້ທີ່ໃຫຍ່ໄວ ເຊິ່ງໃນເນື້ອທີ່ດັ່ງກ່າວຈະປະກອບມີ ສູນເພາະຊຳ ແລະ ສວນສາທິດປູກໄມ້ ເພື່ອພັດທະນາເສດຖະກິດສີຂຽວແບບຍືນຍົງ ຕິດພັນກັບການສ້າງສູນເຕັກນິກ ແລະ ພັດທະນາການທ່ອງທ່ຽວທາງກະສິກຳ ແລະ ເພື່ອເປັນຕົວແບບໃຫ້ແກ່ການຂະຫຍາຍໂຄງການໄປຍັງບ້ານ ແລະ ເມືອງອື່ນໆຕໍ່ໄປ ໂດຍສະເພາະການສົ່ງເສີມການປູກໄມ້ໃນພາກປະຊາຊົນ ໃນຮູບແບບ 2+3 ຄື: ປະຊາຊົນມີດິນ ແລະ ແຮງງານ ສ່ວນບໍລິສັດມີທຶນ, ເຕັກໂນໂລຊີ ແລະ ການຕະຫຼາດ.
ພາຍຫຼັງເຊັນສັນຍາ ແມ່ນຈະໄດ້ເລີ່ມດຳເນີນກິດຈະການ ໂດຍໃຫ້ສອດຄ່ອງກັບເປົ້າໝາຍຂອງການຈັດຕັ້ງປະຕິບັດວຽກງານຂອງໂຄງການ ໃນນີ້, ຈະໄດ້ແບ່ງອອກເປັນ 4 ໄລຍະຄື: ໄລຍະທີ 1 ແມ່ນດຳເນີນການບຸກເບີກ ເນື້ອທີ່ດິນ ເພື່ອພັດທະນາພື້ນຖານໂຄງລ່າງ ແລະ ແບ່ງດິນສຳປະທານອອກເປັນແຕ່ລະເຂດໂຄງການ, ໄລຍະທີ 2 ແມ່ນກໍ່ສ້າງຫ້ອງການບໍລິຫານ ແລະ ພື້ນຖານໂຄງລ່າງອື່ນໆ, ໄລຍະ 3 ດຳເນີນການພັດທະນາໂຄງການ ແລະ ໄລຍະທີ 4 ແມ່ນກໍ່ສ້າງບັນດາກິດຈະການອຳນວຍຄວາມສະດວກອື່ນໆ ພ້ອມດໍາເນີນການຜະລິດ ແລະ ສ້າງຜົນຜະລິດ ເພື່ອຈໍາໜ່າຍ ໂດຍແມ່ນການລົງທຶນຂອງເອກະຊົນຕ່າງປະເທດ 100% ໃນມູນຄ່າການລົງທຶນທັງໝົດ 115,6 ຕື້ກວ່າກີບ, ມີໄລຍະການສຳປະທານ 30 ປີ ເຊິ່ງສາມາດຕໍ່ໄດ້ຕາມລະບຽບກົດໝາຍ ແລະ ໃນທຸກໆ 5 ປີ ທັງສອງຝ່າຍຈະຕ້ອງມີການທົບທວນສັນຍາຮ່ວມກັນ.
ແຫຼ່ງຂ່າວ Khammouane News