ກອງບັນຊາການ ປກສ ເມືອງບາຈຽງຈະເລີນສຸກ ທຳລາຍຕົ້ນກະທ້ອມ

0
739

ຕາມການລາຍງານຂອງເຈົ້າໜ້າທີ່ຕຳຫຼວດ ກອງບັນຊາການ ປກສ ເມືອງບາຈຽງຈະເລີນສຸກ ແຂວງຈຳປາສັກ ໃຫ້ຮູ້ວ່າ: ໃນຄັ້ງວັນທີ 11 ທັນວາ ປີ 2023 ຜ່ານມາ, ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງ ບາຈຽງຈະເລີນສຸກ ໄດ້ຮັບການລາຍງານຈາກພົນລະເມືອງດີວ່າ: ມີປະຊາຊົນປູກຕົ້ນກະທ້ອມ ຢູ່ເຂດບ້ານທີ 10 ເມືອງ ບາຈຽງຈະເລີນສຸກ ແຂວງຈຳປາສັກ.

ຈາກນັ້ນ, ເຈົ້າໜ້າທີ່ວິຊາສະເພາະຈຶ່ງໄດ້ສົມທົບກັບເຈົ້າໜ້າທີ່ ປກສ ກຸ່ມ 03 ລົງກວດກາສະຖານທີ່ດັ່ງກ່າວຈຶ່ງໄດ້ພົບເຫັນ ຕົ້ນກະທ້ອມຈຳນວນ 35 ຕົ້ນ ແລະ ເບ້ຍຕົ້ນກະທ້ອມຈຳນວນ 06 ເບ້ຍ ເຊິ່ງເປັນຂອງ ທ້າວ ອົ້ນ ແພງຖິ່ນ ອາຍຸ 28 ປີ ຊາວສວນ ບ້ານ ໂນນຫີນ ເມືອງ ໂພນທອງ ແຂວງ ຈຳປາສັກ ປະຈຸບັນຜູ້ກ່ຽວພັກເຊົາຢູ່ບ້ານທີ 10 ເມືອງ ບາຈຽງຈະເລີນສຸກ ແຂວງ ຈຳປາສັກ, ຕົກມາຮອດວັນທີ 14 ທັນວາ ປີ 2023 ກອງບັນຊາການ ປກສ ເມືອງ ບາຈຽງຈະເລີນສຸກ ນຳໂດຍທ່ານ ພັທ ສີພູມ ທອງສະໝຸດ ຫົວໜ້າກອງບັນຊາການ ປກສ ເມືອງພ້ອມຄະນະ,ມີກຳລັງວິຊາສະເພາະຂອງ ປກສ ເມືອງ, ກຳລັງກໍ່ສ້າງຮາກຖານຂອງແຂວງ, ສົມທົບກັບອໍານາດການປົກຄອງບ້ານ ລົງເຄື່ອນໄຫວທຳລາຍຕົ້ນກະທ້ອມຢູ່ຈຸດດັ່ງກ່າວ ພ້ອມທັງເຮັດບົດບັນທຶກສຶກສາອົບຮົມກ່າວເຕືອນ ທ້າວອົ້ນ ແພງຖິ່ນ ບໍ່ໃຫ້ຜູ້ກ່ຽວເຄື່ອນໄຫວກະທຳຄືເກົ່າອີກຖ້າຫາກຜູ້ກ່ຽວບໍ່ປ່ຽນແປງເຈົ້າໜ້າທີ່ຈະໄດ້ດຳເນີນການຕາມລະບຽບກົດໝາຍ.