2021-2023 ປກສ ແຂວງ ຈໍາປາສັກ ມີຜົນສໍາເລັດຫຼາຍດ້ານໃນການແກ້ໄຂຢາເສບຕິດ

0
592

ກອງບັນຊາການ ປກສ ແຂວງ ຈໍາປາສັກ ໄດ້ສຸມໃສ່ຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ 2021-2023 ມີຜົນສໍາເລັດໂດຍພື້ນຖານ ແລະ ສາມາດຍາດໄດ້ຜົນງານຫຼາຍດ້ານ.

ພັອ ບຸນສົງ ຈັນທະວົງສັກ ຮອງຫົວໜ້າກອງບັນຊາການ ປກສ ແຂວງ ຈໍາປາສັກ ໄດ້ກ່າວວ່າ: ກອງບັນຊາການ ປກສ ແຂວງ ຈໍາປາສັກ ໄດ້ເປັນເຈົ້າການຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຢ່າງແຂງແຮງ ແລະ ເປັນຂະບວນການກ້ວາງຂວາງ ເຊີ່ງນັບແຕ່ປີ 2021-2023 ໃນນີ້ ໄດ້ສຸມໃສ່ໂຄສະນາເຜີຍແຜ່ກົດໝາຍ ແລະ ຜົນຮ້າຍຂອງຢາເສບຕິດຢູ່ບັນດາໂຮງຮຽນ, ສະຖາບັນການສຶກສາ, ກຸ່ມບ້ານ ແລະ ພາກສ່ວນຕ່າງໆໄດ້ 140 ກວ່າຄັ້ງ, ມີຜູ້ເຂົ້າຮ່ວມຮັບຟັງ 46.422 ເທື່ອຄົນ, ພ້ອນນີ້ຍັງໄດ້ໂຄສະນາຜ່ານທາງໂທລະໂຄງຂອງແຕ່ລະບ້ານ, ຕິດຕັ້ງປ້າຍໂຄສະນາ 818 ປ້າຍ, ສາມາດສ້າງບ້ານປອດຢາເສບຕິດໄດ້ 480 ບ້ານ, ສ້າງບ້ານປ້ອງກັນຄວາມສະຫງົບດີໄດ້ 565 ບ້ານ, ຂຶ້ນບັນຊີເປົ້າໝາຍພົວພັນກັບຢາເສບຕິດໄດ້ 8.303 ຄົນ ຍິງ 292 ຄົນ, ໃນນີ້ເປົ້າໝາຍຄ້າຂາຍຢາເສບຕິດລາຍໃຫຍ່ 170 ຄົນ ຍິງ 21 ຄົນ, ລາຍຍ່ອຍ 1.301 ຄົນ ຍິງ 89 ຄົນ, ເປົ້າໝາຍເສບ 6.832 ຄົນ ຍິງ 182 ຄົນ.

ນັບແຕ່ 2021-2023, ປກສ ແຂວງຈຳປາສັກ ສາມາດມ້າງເປົ້າໝາຍໄດ້ທັງໝົດ 5.764 ຄົນ ຍິງ 242 ຄົນ, ໃນນີ້ ເປົ້າໝາຍຄ້າຂາຍລາຍໃຫຍ່ 117 ຄົນ ຍິງ 12 ຄົນ, ລາຍຍ່ອຍ 1.016 ຄົນ, ຍິງ 67 ຄົນ ແລະ ເປົ້າໝາຍເສບ 4.631 ຄົນ, ຍິງ 163 ຄົນ, ຍຶດຂອງກາງຢາບ້າ 1.952.144 ເມັດ, ຢາໄອ໌ 277 ກວ່າກິໂລກຼາມ, ໂຄເຄນ 689,52 ກິໂລກຼາມ, ຢາສູບໄຟຟ້າ 120 ອັນ, ໃບກະທ້ອມ 127 ກ່ວາກິໂລກຼາມ, ອາວຸດເສິກ 58 ກະບອກ, ລູກປືນ 229 ລູກ, ໝາກແຕກ 1 ໜ່ວຍ ແລະ ເຄື່ອງຂອງກາງທີ່ພົວພັນກັບຄະດີອີກຈໍານວນໜຶ່ງ.