W.I.G NAGA ໃນຮຸ່ນອາຍຸບໍ່ເກີນ 10 ປີ ທີມເຍົາວະຊົນລາວສ້າງຜົນປະຫວັດສາດໜ້າໃໝ່ໃນລາຍການ TAR Asia Qualifiers ທີ່ປະເທດໄທ ເພື່ອຄັດເລືອກໄປຮອບສຸດທ້າຍທີ່ປະເທດສະເປນ ໂດຍຮອບຄັດເລືອກຈະແຂ່ງຂັນລະຫວ່າງວັນທີ 15-17 ທັນວາ 2023 ທີ່ນະຄອນຫຼວງບາງກອກ ປະເທດໄທ.
ລາຍການ TAR Asia Qualifiers ເປັນການແຂ່ງຂັນເພື່ອເປັນຕົວແທນອາຊີໄປແຂ່ງກັບທີມເອີຣົບທີ່ສະເປນ ບໍ່ວ່າຈະ ຢູ 10 ບາເຊໂລນາ , ຣີລ ມາດຣິດ ແລະ ທີມຊັ້ນນໍາໃນເອີຣົບ.
ເຊິ່ງໃນຮອບຄັດເລືອກມີເຖິງ 56 ທີມເຂົ້າຮ່ວມຊີງໄຊໃນຮຸ່ນອາຍຸບໍ່ເກີນ 10 ປີ, ແບ່ງອອກເປັນ 8 ກຸ່ມໆລະ 7 ທີມ ໂດຍມີທີມຈາກ ໄທ ເຈົ້າພາບຮອບຄັດເລືອກ, ສປ ຈີນ, ຍີ່ປຸ່ນ, ມາເລເຊຍ, ອິນໂດເນເຊຍ, ສິງກະໂປ, ລາວ ແລະ ໄຕຫວັນ, ສໍາລັບ WIG NAGA ຢູ່ກຸ່ມ C ຮ່ວມກັບ ທີມຈາກໄທ 5 ທີມ ແລະ ທີມຈາກ ສປ ຈີນ 1 ທີມ.
ຜ່ານການແຂ່ງຂັນຜົນປາກົດວ່າ: ຮອບຄັດເລືອກ WIG NAGA ຊະນະ 5 ແລະ ສະເໝີ 1 ຜ່ານເຂົ້າຮອບ 32 ທີມກໍສາມາດຊະນະລວດຈົນເຖິງຮອບຊີງຊະນະເລີດພົບກັບ ທີມອິນໂດເນເຊຍ ກໍສາມາດເອົາຊະນະໄປຂາດລອຍ 4-1 ຄວ້າແຊັມໄປຄອງ ພ້ອມສິດໄປແຂ່ງຂັນຮອບສຸດທ້າຍທີ່ປະເທດແອັດສະປາຍ ໃນປີ 2024 ໃນຖານະສະໂມສອນຕົວແທນຈາກອາຊີ ໄປຮ່ວມແຂ່ງກັບ ບາເຊໂລນາ ເຈົ້າພາບ, ຣີລ ມາດຣິດ ແລະ ສະໂມສອນຊັ້ນນໍາໃນເອີຣົບ.
ທີ່ມາ: ເສດຖະກິດ-ການຄ້າ