ການພັດທະນາເສດຖະກິດຂອງແຂວງເຊກອງໃນປີ 2023 ເຖິງວ່າຈະປະເຊີນກັບຄວາມຫຍຸ້ງຍາກຫຼາຍດ້ານ ແຕ່ເສດຖະກິດຍັງສືບຕໍ່ຂະຫຍາຍຕົວດ້ວຍຈັງຫວະເຕີບໂຕສູງ ສະເລ່ຍໃນລະດັບ 5,5% ທຽບໃສ່ແຜນປີລື່ນແຜນ 0,5% ມູນຄ່າ GDP ບັນລຸໄດ້ 2.709 ຕື້ກີບ ສະເລ່ຍຕໍ່ຫົວຄົນເທົ່າກັບ 19,8 ລ້ານກີບ. ໃນນີ້, ຂະແໜງກະສິກໍາ-ປ່າໄມ້ ກວມເອົາ 59,89%; ຂະແໜງອຸດສາຫະກໍາ ກວມເອົາ 24,6% ແລະ ຂະແໜງບໍລິການ ກວມເອົາ 15,4% ຂອງ GDP.
ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ ລາຍງານໃຫ້ຮູ້ ໃນກອງປະຊຸມຄົບຄະນະບໍລິຫານງານພັກແຂວງ ເປີດກວ້າງຄັ້ງທີ 9 ສະໄໝທີ X ໃນວັນທີ 13 ທັນວາ 2023 ຜ່ານມາວ່າ: ໃນປີ 2023 ສາມາດເກັບລາຍຮັບເຂົ້າງົບປະມານໄດ້ທັງໝົດ 284,53 ຕື້ກີບ ທຽບໃສ່ແຜນດັດແກ້ເທົ່າກັບ 141,43%. ໃນນີ້, ພູດສູນກາງ (ປະຕິບັດຢູ່ທ້ອງຖິ່ນ) ເກັບໄດ້ 18,37 ຕື້ກີບ ເທົ່າກັບ 183,73% ແລະ ພຸດຂອງແຂວງເກັບໄດ້ 266,11 ຕື້ກີບ ເທົ່າກັບ 139,19%; ຜະລິດເຂົ້າກິນໄດ້ 43.222 ໂຕນ ເທົ່າກັບ 88%; ພືດສະບຽງອາຫານ 38.538 ໂຕນ ເທົ່າກັບ 114,06%; ພືດເປັນສິນຄ້າ 396.489 ໂຕນ ເທົ່າກັບ 168,65%; ມີສັດລ້ຽງປະເພດຄວາຍ 26.551 ໂຕ, ງົວ 45.311 ໂຕ, ໝູ 150.148 ໂຕ, ແບ້ 20.030 ໂຕ ແລະ ສັດປີກ 1.247.000 ໂຕ; ການສົ່ງອອກສິນຄ້າປະຕິບັດໄດ້ 233,46 ລ້ານໂດລາສະຫະລັດ ທຽບໃສ່ແຜນເທົ່າກັບ 628,42% ແລະ ການນໍາເຂົ້າປະຕິບັດໄດ້ 8,97 ໂດລາສະຫະລັດ ທຽບໃສ່ແຜນເທົ່າກັບ 28,37%; ການຈໍລະຈອນສິນຄ້າຂາຍຍົກ-ຂາຍຍ່ອຍ (ສິນຄ້າປະເພດກະສິກໍາ-ສິນຄ້າທົ່ວໄປ) ບັນລຸໄດ້ 93,37 ຕື້ກີບ ແລະ ການຄ້າຂາຍຍົກ-ຂາຍຍ່ອຍ ແລະ ບໍລິການສ້ອມແປງບັນລຸໄດ້ 120,64 ຕື້ກີບ.
ຢ່າງໃດກໍຕາມ ເພື່ອສືບຕໍ່ຜັນຂະຫຍາຍມະຕິ XI ຂອງພັກ, ມະຕິ X ອົງຄະນະພັກແຂວງ ກໍຄື ຈຸດໝາຍລວມ ແລະ ເປົ້າໝາຍແຜນພັດທະນາເສດຖະກິດ-ສັງຄົມຂອງແຂວງ 5 ປີ (2021-2025) ໃນປີ 2024 ແຂວງຈະສູ້ຊົນ ເຮັດໃຫ້ເສດຖະກິດຂະຫຍາຍຕົວເພີ່ມຂຶ້ນໃນລະດັບ 6% ຂຶ້ນໄປ, ມູນຄ່າ GDP ບັນລຸ 3.057 ຕື້ກີບ, ສະເລ່ຍຕໍ່ຫົວຄົນເທົ່າກັບ 21,9 ລ້ານກີບ; ໃນນັ້ນຂະແໜງກະສິກຳ ກວມເອົາ 59%, ຂະແໜງອຸດສາຫະກຳ ກວມເອົາ 25,32% ແລະ ຂະແໜງບໍລິການ ກວມເອົາ 15,68% ຂອງ GDP; ສູ້ຊົນເກັບລາຍຮັບເຂົ້າງົບປະມານໃຫ້ໄດ້ 232,90 ຕື້ກີບ ແລະ ການສົ່ງອອກສິນຄ້າໃຫ້ໄດ້ 256 ລ້ານໂດລາສະຫະລັດ.
ແຫຼ່ງຂ່າວ Media Laos