ດັ່ງທີ່ຮູ້, ຜ້າລາຍນາກ ເປັນຜ້າທີ່ຢູ່ຄຽງຄູ່ກັບຄົນລາວມາຍາວນານ ແລະ ເປັນເອກະລັກຢ່າງໜຶ່ງຂອງແມ່ຍິງລາວໃນການນຸ່ງຖືເຊັ່ນ: ສິ້ນໄໝ, ຜ້າບ່ຽງ ເພື່ອສະແດງເຖິງວັດທະນະທຳອັນສວຍງາມ ແລະ ຊົງຄຸນຄ່າ.
ຫຼ້າສຸດ, ມີຂ່າວດີໃຫ້ຄົນລາວເຮົາຊື່ນໃຈ ໂດຍໃນວັນທີ 6 ທັນວາ 2023 ນີ້, ອົງການ UNESCO ປະກາດການຮັບຮອງ “ລາຍນາກ” ໃນຜ້າພື້ນເມືອງຂອງ ສປປ ລາວ ເປັນມໍລະດົກທາງວັດທະນະທຳ ທີ່ບໍ່ສາມາດຈັບຕ້ອງໄດ້.
ທັງນີ້, ຜ້າພຶ້ນເມືອງລາວ (ລາຍນາກ) ຍັງໄດ້ຖືກນຳໄປສະແດງເທິງເວທີການປະກວດສາກົນ ກໍຄື ເວທີນາງງາມຈັກກະວານ ຫຼື Miss Universe ທີ່ ປາເປົ້າ ໄພມະນີ Miss Universe Laos 2023 ໄດ້ນຸງສະແດງໃນຮອບຊຸດປະຈຳຊາດ ຜ່ານມາ.
ຖືວ່າເປັນຂ່າວດີສົ່ງທ້າຍປີຂອງລາວເຮົາ ເພາະຫຼາຍປະເທດກໍຈະຮູ້ຈັກລາວເພີ່ມຂຶ້ນ ກໍຄືວັດທະນາທຳອັນເກົ່າແກ່, ຮີດຄອງປະເພນີອັນດີງາມ ແລະ ສີໄມ້ລາຍມືຂອງຄົນລາວເຮົາທີ່ດີເລີດ.