ໃນໂອກາດວັນຊາດທີ 2 ທັນວາ ຄົບຮອບ 48 ປີ ທີ່ຈະມາເຖິງນີ້, ທ່ານ ອາດສະພັງທອງ ສີພັນດອນ, ກຳມະການສູນກາງພັກ, ເຈົ້າຄອງນະຄອນຫລວງວຽງຈັນ ໄດ້ໃຫ້ສໍາພາດຕໍ່ສື່ມວນຊົນໃນວັນທີ 27 ພະຈິກ 2023 ນີ້. ທ່ານໄດ້ຍົກໃຫ້ຜົນງານພົ້ນເດັ່ນໃນການພັດທະນາເສດຖະກິດ-ສັງຄົມຂອງນະຄອນຫລວງວຽງຈັນ ຕະຫລອດໄລຍະ 48 ປີ ຜ່ານມາ. ໃນນີ້ ສະເພາະດ້ານການພັດທະນາຊົນນະບົດ ແລະ ແກ້ໄຂຄວາມທຸກຍາກ ທ່ານໄດ້ຍົກໃຫ້ເຫັນວ່າ: ມາຮອດປັດຈຸບັນ ນະຄອນຫລວງວຽງຈັນ ສາມາດປະເມີນມາດຕະຖານພົ້ນທຸກ ແລະ ມາດຕະຖານການພັດທະນາ ໄດ້ທັງໝົດ 481 ບ້ານ (ຈໍານວນບ້ານທັງໝົດທີ່ມີຢູ່ໃນນະຄອນຫລວງວຽງຈັນ), ຈໍານວນ 153.738 ຄອບຄົວ.

ທ່ານຢືນຢັນວ່າ: ຜ່ານການປະເມີນທັງ 481 ແມ່ນບັນລຸມາດຕະຖານບ້ານພົ້ນທຸກໄດ້ໝົດທຸກບ້ານແລ້ວ. ພ້ອມນີ້, ຍັງບັນລຸບ້ານພັດທະນາ 315 ບ້ານ, ແກ້ໄຂຄອບຄົວທີ່ມີເງື່ອນໄຂບໍ່ຄົບຖ້ວນຕາມມາດຕະຖານພົ້ນທຸກໃໝ່ໃຫ້ເປັນຄອບຄົວພົ້ນທຸກໄດ້ 2.388 ຄອບຄົວ, ເທົ່າກັບ 53,30% ຂອງມະຕິສະພາ (4.480 ຄອບຄົວ), ນອກຈາກນີ້, ຜ່ານການຈັດຕັ້ງປະຕິບັດ 6 ຄາດໝາຍ ແລະ ມີຄວາມຄືບໜ້າດີທັງໝົດ ຄາດວ່າຈະບັນລຸຕາມແຜນການທີ່ວາງໄວ້.

​ສ່ວນທາງດ້ານພື້ນຖານໂຄງລ່າງ, ທ່ານໄດ້ຍົກໃຫ້ເຫັນວ່າ: ນະຄອນຫລວງວຽງຈັນ ໄດ້ເອົາໃຈໃສ່ປັບປຸງຍົກລະດັບ ແລະ ກໍ່ສ້າງເສັ້ນທາງສາຍຕ່າງໆ ເຮັດໃຫ້ການຄົມມະນາຄົມຂົນສົ່ງ ສັນຈອນໄປມາສະດວກສະບາຍດີຂຶ້ນກວ່າເກົ່າ, ປັບປຸງບູລະນະສວນປະຕູໄຊ ແລະ ສວນສາທາລະນະພາກຂະຫຍາຍ, ໄດ້ສຳເລັດການວາງແຜນຍຸດທະສາດຄຸ້ມຄອງນໍ້າເປື້ອນຢູ່ໃນຕົວເມືອງດ້ວຍທຶນຊ່ວຍເຫຼືອລ້າຂອງອົງການໄຈກາທີ່ຕິດພັນກັບການດໍາເນີນໂຄງການບໍາບັດນໍ້າເປື້ອນດ້ວຍທຶນກູ້ຢືມບໍ່ມີດອກເບ້ຍ ຈາກລັດຖະບານ ຮົງກາລີ ຊຶ່ງໄດ້ກຳນົດເອົາເຂດພື້ນທີ່ຮອງຮັບນໍ້າເປື້ອນຈາກຮ່ອງແກ, ຮ່ອງແຊງ ໄປບຳບັດຢູ່ໂຮງງານບຳບັດນໍ້າເປືອນເຂດບ້ານນາສ້າງໄພ, ເມືອງໄຊເສດຖາ ແລະ ໄດ້ເລີ່ມກໍ່ສ້າງໃນປີ 2021 ເປັນຕົ້ນມາ.

ນອກຈາກນີ້, ໄດ້ສຳເລັດການປະດັບປະດາຕົວເມືອງ ແຕ່ລະເສັ້ນທາງຕ່າງໆຕາມແຜນກຳນົດໄວ້, ເພື່ອຕ້ອນຮັບວັນສໍາຄັນຕ່າງໆ; ຄຸ້ມຄອງການເກັບມ້ຽນຂີ້ເຫຍື້ອ ດ້ວຍການເຮັດສັນຍາເກັບມ້ຽນຂີ້ເຫຍື້ອ ໄດ້ 275 ບ້ານ, ປັບປຸງອານາໄມລ່ວງຮ່ອງລະບາຍນໍ້າ ແລະ ຂຸມພັກນໍ້າບາງຊ່ວງ ຕາມເສັ້ນທາງສາຍຫຼັກ, ສຳເລັດການປັບປຸງສາທາລະນະ ແຄມທາງຖະໜົນລ້ານຊ້າງໃຫ້ເປັນເຂດຂຽວ ແລະ ອື່ນໆ.