ຕາມການລາຍງານຂອງສື່ປະເທດໄທ ໃນວັນທີ 28 ພະຈິກ 2023 ນີ້ກ່ຽວກັບເລື່ອງລາວທີ່ເປັນກະແສໃນສື່ສັງຄົມອອນລາຍ ເມື່ອເຈົ້າຂອງຫ້ອງເຊົ່າແຫ່ງໜຶ່ງ ໄດ້ອອກມາເຜີຍແຜ່ພາບ: ຫ້ອງທີ່ເຕັມໄປດ້ວຍຂີ້ເຫຍື້ອສູງເກືອບຮອດເພດານ ແຖມຍັງພົບງູ, ໜູ ແລະ ໜອນ ພ້ອມລະບຸຂໍ້ຄວາມວ່າ: ລົບກວນໝູ່ເພື່ອນ ມີວິທີຊ່ວຍຈັດການກັບກິ່ນຂອງຂີ້ເຫຍື້ອແບບໃດແດ່ ເນື່ອງຈາກເປັນຫ້ອງຂອງຜູ້ເຊົ່າ.
ເຈົ້າຂອງຫ້ອງເຊົ່າ ທີ່ເປີດມາດົນກວ່າ 30 ປີ ໄດ້ເປີດເຜີຍວ່າ: ຫ້ອງທີ່ເກີດເຫດ ມີຜູ້ຍິງອາຍຸປະມານ 42 ປີ ມາເຊົ່າຢູ່ດົນກວ່າ 10 ປີໃນລາຄາເດືອນະ 1500 ບາດ ຫຼື ປະມານ 540,000 ກີບ, ເຊິ່ງຜູ້ເຊົ່າໄດ້ຈ່າຍຄ່າຫ້ອງຕາມກຳນົດທຸກເດືອນ, ຈົນໄລນະ 2 ປີ ຜ່ານມາ, ຜູ້ເຊົ່າຄົນດັ່ງກ່າວບໍ່ໄດ້ກັບມາອາໄສ ແຕ່ຍັງຄົງຈ່າຍຄ່າເຊົ່າເປັນປະຈຳທຸກເດືອນ ເຊິ່ງໃນເວລາທີ່ຕົນເອງອອກມາອະນາໄມບໍລິເວນໜ້າຫ້ອງກໍບໍ່ໄດ້ກິ່ນຫຍັງ.
ເຫດການດ່ັງກ່າວເກີດຂຶ້ນເມື່ອ 4 ເດືອນທີ່ຜ່ານມາ ຜູ້ເຊົ່າຫ້ອງຂ້າງໆໄດ້ມາແຈ້ງຄົນດູແລຫ້ອງເຊົ່າວ່າມີໜູແລ່ນອອກມາຈາກຫ້ອງ ເພື່ອຫາກິນ ແລະ ມີງູເລືອອອກມານຳອີກ ຈຶ່ງຕັດສິນໃຈຕັດກະແຈຫ້ອງອອກ ຈຶ່ງພົບກັບກອງຂີ້ເຫຍື້ອ ແລະ ກິ່ນເໝັນໄປທົ່ວບໍລິເວນ.
ເຈົ້າຂອງຫ້ອງໄດ້ເລົ່າຕໍ່ອີກວ່າ: ພໍ່ຂອງຜົວກັບຕົນເຖິງຂັ້ນຮ້ອງໃຫ້ເພາະທີ່ຜ່ານມາພົບເຫັນຈາກບ່ອນອື່ນ ບໍ່ຄິດວ່າຊິເກີດຂຶ້ນກັບໂຕເອງ ນອກຈາກນີ້ຕົນຍັງໄດ້ລົງທຶນຊື້ ຖົງເກັບຂີ້ເຫຍື້ອເກືອບ 3000 ບາດ ຫຼື ປະມານ 1 ລ້ານກີບມາເກັບຂີ້ເຫຍື້ອທີ່ຢູ່ໃນຫ້ອງ ແລະ ໄດ້ນັບລວມໄດ້ 250 ຖົງຂະໜາດໃຫຍ່.
ເລື່ອງລາວດັ່ງກ່າວໄດ້ເກີດຂຶ້ນທີ່ປະເທດໄທ ແຕ່ບໍ່ໄດ້ລະບຸສະຖານທີ່ຊັດເຈນ ພຽງແຕ່ຢາກອອກມາເຕືອນໃຫ້ເຈົ້າຂອງຫ້ອງເຊົ່າມີການກວດກາຄວາມສະອາດຢູ່ເປັນປະຈຳອາດຈະ 2 ເດືອນເທື່ອ 1 ເພື່ອບໍ່ໃຫ້ເກີດຄືກັບເຫດການຂ້າງເທິງນີ້.
ທີ່ມາ: ຂ່າວສົດ