ສູນຂ່າວສານການແພດສຸຂະສຶກສາ ລາຍງານໃຫ້ຮູ້ວ່າ: ມາຮອດປະຈຸບັນ, ມີຜູ້ປ່ວຍໄຂ້ຍຸງລາຍສະສົມແລ້ວ 33.738 ກໍລະນີ, ໃນນັ້ນ ມີຜູ້ປ່ວຍໄຂ້ຍຸງລາຍຫຼາຍກວ່າໝູ່ແມ່ນນະຄອນຫຼວງວຽງຈັນ 5.668 ກໍລະນີ ແລະ ມີຈຳນວນຜູ້ເສຍຊີວິດແລ້ວ 20 ຄົນ ໃນທົ່ວປະເທດ (ນະຄອນຫຼວງວຽງຈັນ 3 ຄົນ, ແຂວງຄໍາມ່ວນ 1 ຄົນ, ສະຫວັນນະເຂດ 2 ຄົນ, ບໍລິຄໍາໄຊ 5 ຄົນ, ວຽງຈັນ 3 ຄົນ, ໄຊຍະບູລີ 2 ຄົນ, ອຸດົມໄຊ 1 ຄົນ, ອັດຕະປຶ 2 ຄົນ ແລະ ເຊກອງ 1 ຄົນ).
ໃນນັ້ນ ເສຍຊິວິດໃໝ່ເພີ່ມຂື້ນ 1 ຄົນ ຢູ່ທີ່ ນະຄອນຫຼວງວຽງຈັນ ແລະ ມີຜູ້ຕິດເຊື້ອໃໝ່ ພຽງແຕ່ 21 ກໍລະນີ ໃນທົ່ວປະເທດ ໃນວັນທີ 18 ພະຈິກ 2023 ຜ່ານມານີ້
ພະຍາດໄຂ້ຍຸງລາຍ ເກີດຈາກເຊື້ອຈຸລະໂລກ ຫຼື ເຊື້ອໄວຣັສ ຕິດຕໍ່ໂດຍຍຸງລາຍ ຊຶ່ງມີອາການສະແດງ: ມີໄຂ້ສູງຕະຫຼອດ 2-7 ວັນ, ເຈັບຫົວ, ປວດຮາກ, ປວດເມື່ອຍຕາມ ກ້າມຊີ້ນ, ມີຜື່ນແດງທີ່ຜີວໜັງ, ມີຈຸດຊໍ້າເລືອດອອກ, ມີເລືອດອອກ ຕາມເຟັນແຂ້ວ, ຮາກອອກເລືອດ ຫຼື ຖ່າຍດໍາ, ບາງຄົນອາດຊ໋ອກ ໂຕເຢັນ ງ້ວງຊຶມ ໝົດສະຕິ ແລະ ອາດເສຍຊີວິດໄດ້.
ເພີ່ມທະວີການຈັດຕັ້ງປະຕິບັດຫລັກການ 5 ປ ຂອງກະຊວງສາທາລະນະສຸກ ວາງອອກຢ່າງເຄັ່ງຄັດ ຄື:
– ປ ປິດ (ປົກປິດພາຊະນະທີ່ກັກເກັບນ້ຳທັງໃນ ແລະ ນອກເຮືອນບໍ່ໃຫ້ຍຸງລາຍມາໄຂ່ໃສ່).
– ປ ປ່ຽນ (ປ່ຽນນ້ຳໃນພາຊະນະທີ່ກັກເກັບນ້ຳ ເຊັ່ນເຕົ້າດອກໄມ້, ນ້ຳຮອງຕີນຕູ້ ແລະ ອື່ນໆ).
– ປ ປ່ອຍ (ປ່ອຍປາຫາງນົກຍຸງກິນໜອນນ້ຳ).
– ປ ປັບປຸງ(ປັບປຸງສິ່ງແວດລ້ອມອ້ອມ ເຮືອນໃຫ້ສະອາດເປັນປະຈຳທຸກອາທິດ).
– ປ ປະຕິບັດ ໃຫ້ເປັນນິໃສທຸກອາທິດ.
ທີ່ມາ: Lao Youth Radio