ທາງການຈີນ ຈັບກຸມທ່ານ ໂຈວ ຢົ່ງຄັງ ອະດີດເຈົ້າໜ້າທີ່ລະດັບສູງຂອງຈີນ ເພື່ອສອບສວນດຳເນີນຄະດີໃນຂໍ້ຫາສໍ້ລາດ
ບັງຫລວງ.
ສຳນັກຂ່າວຕ່າງປະເທດລາຍງານ ໃນວັນທີ 6 ທັນວາຜ່ານມານີ້ວ່າ ທ່ານ ໂຈວ ຢົ່ງຄັງ ກຳມະການກົມການເມືອງສູນກາງພັກ
ກອມມູນິດຈີນ ໄດ້ຖືກຂັບໄລ່ອອກຈາກສະມາຊິກພັກ ແລະ ຖືກຈັບກຸມແລ້ວ ເພື່ອດຳເນີນການສືບສວນສອບສວນ ໃນຄະດີ
ທີ່ກ່ຽວພັນໃນເລື່ອງການສໍ້ລາດບັງຫລວງ.
ສຳນັກງານອົງການໄອຍະການປະຊາຊົນສູງສຸດຈີນ ໄດ້ອອກຖະແຫລງການຢືນຢັນການຈັບກຸມຕົວຂອງທ່ານ ໂຈວ ໃນຄືນ
ວັນສຸກທີ 5 ທັນວາ 2014 ຜ່ານມາ ແລະ ໄດ້ລະບຸວ່າ ຈະດຳເນີນການສອບສວນທ່ານ ໂຈວ ໃນຂໍ້ຫາສໍ້ລາດບັງຫລວງ ຢ່າງ
ເປັນທາງການ ເຊັ່ນດຽວກັນກັບອະດີດຜູ້ຊ່ວຍ ແລະ ຍາດຕິພີ່ນ້ອງຂອງເຂົາ ທີ່ໄດ້ຖືກຈັບກຸມເພື່ອສືບສວນໃນຂໍ້ຫາດຽວ
ກັນມາແລ້ວໃນກ່ອນໜ້ານີ້.
ທັງນີ້ ທ່ານ ໂຈວ ຢົ່ງຄັງ ອາຍຸ 70 ປີ ໄດ້ຖືກກ່າວຫາໃນຄວາມຜິດຫລາຍຂໍ້ເຊັ່ນ ລະເມີດກົດລະບຽບຂອງພັກຢ່າງຮ້າຍແຮງ,
ຮັບເງິນສິນບົນຈຳນວນມະຫາສານ, ເປີດເຜີຍຄວາມລັບຂອງພັກກອມມູນິດຈີນ ແລະ ຂອງຊາດ ຕະຫລອດເຖິງຂໍ້ຫາຄົບ
ຊູ້ພົວພັນກັບຍິງສາວຫລາຍຄົນ.
ປະທານາທິບໍດີ ສີ ຈິ້ນຜິງ ໄດ້ດຳເນີນນະໂຍບາຍກວາດລ້າງການສໍ້ລາດບັງຫລວງພາຍໃນພັກ ແລະ ລັດຖະບານຢ່າງແຂງ
ແຮງ ນັບຕັ້ງແຕ່ເຂົາໄດ້ກ້າວຂຶ້ນສູ່ຕຳແໜ່ງເລຂາທິການໃຫຍ່ພັກ ແລະ ປະທານາທິບໍດີ ແຫ່ງ ສປ ຈີນ ໃນປີ 2012 ເປັນ
ຕົ້ນມາ ເຊິ່ງໄດ້ເຮັດໃຫ້ມີການດຳເນີນຄະດີກັບເຈົ້າໜ້າທີ່ລະດັບສູງຫລາຍຄົນ ເຊັ່ນ: ພົນເອກ ຊູ ໄຊ່ໂຫວ ອະດີດກຳມະການ
ກົມການເມືອງສູນກາງພັກ ແລະ ທ່ານ ປົວ ຊີໄຫລ ເລຂາຄະນະພັກເທດສະບານນະຄອນສົງຊິ່ງ ດັ່ງນີ້ເປັນຕົ້ນ.
