ພິດຊ່າຮັດ (Pizza Hut) ຮ້ານພິດຊ່າສັນຊາດອາເມຣິກາໄດ້ຮ່ວມມືກັບຮ້ານອາຫານຮົງກົງເກົ່າແກ່ ເຊີ ຫວາງ ເຟິ່ນ (Ser Wong Fun) ທີ່ມີຊື່ສຽງເລື່ອງການເຮັດອາຫານຈາກຊີ້ນງູໃນຮົງກົງ ທີ່ມີຕົ້ນກຳເນີດແຕ່ປີ 1895 ເພື່ອນຳສະເໜີເມນູໃໝ່ ພິຊ່າໜ້າງູ ໂດຍວາງຈຳໜ່າຍຈົນເຖິງວັນທີ 22 ພະຈິກ 2023 ນີ້.
ຜະລິດຕະພັນໃໝ່ນີ້ ປະກອບໄປດ້ວຍຊີ້ນງູ ເຫັດກຳ ແລະ ແຮັມແຫ້ງ ນີ້ເປັນແຜນການຕະຫຼາດຂອງພິດຊ່າຮັດເພື່ອສ້າງກະແສໃນໂລກອອນລາຍ.
ທັ້ງນີ້ ປະຊາຊົນທາງພາກໃຕ້ຂອງປະເທດຈີນໄດ້ກິນງູມາດົນແລ້ວ ໂດຍສະເພາະໃນຊ່ວງເດືອນທີ່ມີອາກາດໜາວເຢັນ ຕາມສຸພາສິດໃນພາສາກວາງຕຸ້ງທ້ອງຖິ່ນກ່າວວ່າ “ເວລາທີ່ດີທີ່ສຸດໃນການກິນງູຄື ເມື່ອລົມລະດູໃບໄມ້ລົ່ນເລີ່ມພັດ” ເຊິ່ງເປັນເວລາທີ່ພວກມັນກິນອາຫານເພື່ອກຽມພ້ອມສຳລັບການຈຳສິນຂອງງູ ຫຼາຍຄົນເຊື່ອວ່າຊີ້ນງູມີຄຸນສົມບັດເປັນຢາ ຊ່ວຍປັບປຸງສະພາບຜິວ ແລະ ເຮັດໃຫ້ຮ່າງກາຍອົບອຸ່ນ ນອກຈາກນັ້ນ ວັດທະນະທຳການເຮັດອາຫານໂດຍໃຊ້ງູ ສາມາດພົບໄດ້ທົ່ວໄປໃນສ່ວນອື່ນໆຂອງອາຊີຕາເວັນອອກສຽງໃຕ້ເຊັ່ນ ຫວຽດນາມ ໄທ ແລະ ລາວ ເປັນຕົ້ນ.
ພິດຊ່າຮັດຮົງກົງ ໄດ້ກ່າວກ່ອນທີ່ເມນູນີ້ຈະວາງຈຳໜ່າຍໃນອາທິດກ່ອນ ວ່າ: ເມື່ອຈັບຄູ່ກັບຊີດ ແລະ ໄກ່ ຊີ້ນງູກໍຈະມີລົດຊາດທີ່ເຂັ້ມຂົ້ນຍິ່ງຂຶ້ນ, ພ້ອມກ່າວອີກວ່າ ຊີ້ນງູ ຈະຊ່ວຍໃນການໄຫຼວຽນຂອງເລືອດໄດ້ດີ ເຊິ່ງເປັນຄວາມເຊື່ອໃນທາງການແພດແຜນຈີນ ແລະ ກ່າວຕື່ມອີກວ່າ ເມນູນີ້ຖືເປັນຄວາມກ້າວໜ້າຈາກແນວຄິດການຮັກສາສຸຂະພາບ ແລະ ຄວາມທ້າທ້າຍຕໍ່ຕ່ອມຮັບລົດຊາດ.
ຜູ້ຈັດການທົ່ວໄປຂອງຮ້ານພິດຊ່າຮັດຮົງກົງ ແລະ ມາເກົ້າ ກ່າວວ່າ ບໍລິສັດໄດ້ໃຊ້ຄວາມຊ່ຽວຊານຂອງຮ້ານ ເຊີ ຫວາງ ເຟິ່ນ ເພື່ອກຽມເມນູນີ້ ໂດຍໃຊ້ຊີ້ນງູສິງ ງູສາມຫຼ່ຽມລາຍ ແລະ ງູແຖບຂາວ.
ແຫຼ່ງຂ່າວ CNN