ໜ່ວຍງານດູແລການແລກປ່ຽນສະພາບອາກາດໃນເອີຣົບ ລະບຸວ່າ ປີ 2023 ເປັນປີທີ່ໂລກຮ້ອນທີ່ສຸດເປັນປະຫວັດສາດທີ່ອຸນຫະພູມສູງໃນຮອບ 125.000 ປີ.
ໃນວັນທີ 8 ພະຈິກ 2023 ໜ່ວຍງານດູແລດ້ານການປ່ຽນແປງສະພາບອາກາດຂອງສະຫະພາບເອີຣົບ ໄດ້ຄາດການວ່າ ອຸນຫະພູມໂລກໃນປີ 2023 ເປັນປີທີ່ມີອຸນຫະພູມສູງສຸດເປັນປະຫວັດສາດ ໂດຍອ້າງອີງຈາກສະຖິຕິອຸນຫະພູມສະເລ່ຍທົ່ວໂລກໃນເດືອນຕຸລາທີ່ຜ່ານມາ ສູງຂຶ້ນ 0,4 ອົງສາ ສູງກວ່າສະຖິຕິເກົ່າທີ່ເຄີຍບັນທຶກໃນເດືອນຕຸລາ ປີ 2019 ສົ່ງຜົນໃນເດືອນຕຸລາໃນປີນີ້ ກາຍເປັນເດືອນທີ່ມີອຸນຫະພູມສູງທີ່ສຸດເທົ່າທີ່ເຄີຍບັນທຶກມາ.
Copernicus Climate Change Service (C3S) ໜ່ວຍງານດູແລດ້ານການປ່ຽນແປງສະພາບອາກາດຂອງສະຫະພາບເອີຣົບ ແຈ້ງວ່າ ປັດໄຈທີ່ເຮັດໃຫ້ອຸນຫະພູມໂລກສູງຂຶ້ນ ມີສາເຫດມາຈາກກາສກາກບອນ ຫຼື ກາສເຮືອນແກ້ວເພີ່ມຂຶ້ນຢ່າງຕໍ່ເນື່ອງ ພ້ອມກັບປາກົດເອວນິໂຢ່ ທີ່ເຮັດໃຫ້ທົ່ວໂລກຕ້ອງພົບກັບອາກາດຮ້ອນ 5 ເດືອນຕິດຕໍ່ກັນ.
ນອກນີ້ ຍັງຄາດວ່າ ອຸນຫະພູມໂລກໃນ 2 ເດືອນທ້າຍປີນີ້ ຈະບໍ່ມີການປ່ຽນແປງຫຼາຍ ແລະ ໄດ້ພະຍາກອນວ່າ ໃນເດືອນພະຈິກທົ່ວໂລກຈະຕ້ອງປະເຊີນອຸນຫະພູມທີ່ອຸ່ນກວ່າປົກກະຕິ ຂະນະທີ່ບັນຫາຄື້ນຄວາມຮ້ອນຈະແກ່ຍາວໄປຮອດປີ 2024.
ແຫຼ່ງຂ່າວ reuters