ປະຊາຊົນຖືກແກ້ງຕົ້ມຕຸ໋ນສໍ້ໂກງຊັບໄປໄດ້ 1 ຕື້ກີບ ທີ່ເຄື່ອນໄຫວແລກປ່ຽນເງິນຕາ.
ໃນວັນທີ 23 ຕຸລາ 2023 ເຈົ້າໜ້າທີ່ ປກສ ເມືອງຄຳ ແຂວງຊຽງຂວາງ ຈັບແກ້ງຕົ້ມຕຸ໋ນ 6 ຄົນ ປະກອບມີຊາຍສັນຊາດຈີນ 2 ຄົນ ພ້ອມກັບຄົນລາວອີກ 4 ຄົນ ຢູ່ເມືອງຍອດອູ ຜົ້ງສາລີ ທີ່ເຄື່ອນໄຫວກໍ່ເຫດຕົ້ມຕຸ໋ນຄົນລາວ ດ້ວຍການຊື້ຂາຍ ແລກປ່ຽນເງິນຕາ ເຮັດໃຫ້ເກີດຄວາມເສຍຫາຍ 1 ຕື້ກວ່າກີບ.
ຜ່ານການສືບສວຍສອບສວນ ພວກກ່ຽວໄດ້ຮັບການສາລະພາບວ່າ ພວກກ່ຽວໄດ້ສໍ້ໂກງແທ້ ໂດຍໃຊ້ກົນອຸບາຍວ່າເປັນພໍ່ຄ້າຊື້ ງົວ-ຄວາຍ ແລະ ເກັບຊື້ຊາ ນຳປະຊາຊົນ ພ້ອມທັງແລກປ່ຽນເງິນຢວນເປັນເງິນກີບ ໂດຍມີອັດຕາແລກປ່ຽນ 1 ຢວນ=2.900 ກີບ, ພາຍຫຼັງໄດ້ຕົກລົງແລກປ່ຽນເງິນສຳເລັດແລ້ວ ກໍໄດ້ໂອນເງິນເຂົ້າບັນຊີທັງສອງຝ່າຍເປັນປົກກະຕິ.
ແຕ່ເມື່ອຜູ້ເສຍຫາຍຈະໄປຖອນເງິນ ບັນຊີກໍຖືກປິດລະງັບການນຳໃຊ້ ຈາກການສືບສວນໄດ້ຮູ້ວ່າ ມີຜູ້ເສຍຫາຍທັງໝົດ ຈຳນວນ 4 ຄົນ ມູນຄ່າເສຍຫາຍຈຳນວນ 1 ຕື້ກວ່າກີບ.
ດັ່ງນັ້ນ ຂໍໃຫ້ປະຊາຊົນທຸກຄົນ ຈົ່ງມີສະຕິໃນການແລກປ່ຽນຊື້-ຂາຍເງິນຕາ ເພາະມັນບໍ່ພຽງແຕ່ຜິດກົດໝາຍ ມັນຍັງມີຄວາສ່ຽງຫຼາຍທີ່ຈະຖືກສໍ້ໂກງອີກດ້ວຍ.
ທີ່ມາ: ປກສ ແຂວງຊຽງຂວາງ
