ກອງປະຊຸມປຶກສາຫາລືກ່ຽວກັບການກະກຽມ ແລະ ດໍາເນີນການຈັດງານບຸນນະມັດສະການພະທາດຫຼວງວຽງຈັນ ແລະ ງານວາງສະແດງສິນຄ້າ ປະຈໍາປີ 2023 ຈັດຂຶ້ນເມື່ອວັນທີ 3 ພະຈິກ 2023 ທີ່ຜ່ານມາ, ທີ່ຫ້ອງວ່າການນະຄອນຫຼວງວຽງຈັນ ໂດຍການເປັນປະທານຂອງທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ມີບັນດາຫົວໜ້າພະແນກ, ຮອງເຈົ້າເມືອງ, ອະນຸກໍາມະການຕ່າງໆເຂົ້າຮ່ວມ.
ທ່ານ ຮອງເຈົ້າຄອງນະຄອນຫຼວງວຽງຈັນໄດ້ກ່າວວ່າ: ມາຮອດປະຈຸບັນ ແຕ່ລະອະນຸກໍາມະການ ແລະ ຄະນະຮັບຜິດຊອບຈັດງານໄດ້ມີການກະກຽມຄວາມພ້ອມທຸກດ້ານ ເພື່ອເຮັດໃຫ້ການຈັດງານບຸນມີຄວາມຮັບປະກັນຄວາມປອດໄພ ມີຄວາມເປັນລະບຽບຮຽບຮ້ອຍ ແລະ ມີຜົນສໍາເລັດຕາມແຜນທີ່ວາງໄວ້ເຊັ່ນ: ການກະກຽມປະດັບປະດາຄວາມເປັນລະບຽບຮຽບຮ້ອຍ, ວຽກງານຈະລາຈອນ, ການບໍລິການລົດເມສາທາລະນະ ການກະກຽມເປີດປີທ່ອງທ່ຽວລາວ 2024 ແລະ ອື່ນໆ.
ງານບຸນນະມັດສະການພະທາດຫຼວງວຽງຈັນ ຈະຈັດຂຶ້ນເປັນເວລາ 5 ວັນ, ນັບແຕ່ວັນທີ 23-27 ພະຈິກ ຢູ່ທີ່ຂອບເຂດເດີ່ນພະທາດຫຼວງ ແລະ ສູນການຄ້າລາວ-ໄອເຕັກ ເຊິ່ງບັນດາກິດຈະກໍາປະກອບມີ:
– ວັນທີ 23 ພະຈິກ , ເວລາ 16: 30 ໂມງ ສືບຕໍ່ຄົບງັນຕາມປະເພນີ
– ວັນທີ 25 ພະຈິກ, ເວລາ 16:30 ສູດປະລິຕະມົງຄຸນຢູ່ທີ່ດ້ານໃນກົມມະລຽນພະທາດຫຼວງ,
– ວັນທີ 26 ພະຈິກ 2023 ເວລາ13:30 ພິທີແຫ່ຜາສາດເຜີ້ງ, – ວັນທີ 27 ພະຈິກ, ເວລາ 07:00 ໂມງ ພິທີໃສ່ບາດຖວາຍສັງຄະທານ, ເວລາ 13:00 ໂມງ ພິທີແຂ່ງຂັນກີລາພື້ນບ້ານຕີຄີ ເວລາ 19:30 ໂມງ ພິທີວຽນທຽນ ແລະ ຈູດບັ້ງໄຟສັກກາລະບູຊາພະທາດຫຼວງ ແລະ ຄົບງັນຕາມປະເພນີ ໂດຍເປີດໃຫ້ມ່ວນຊົນເຂົ້າທ່ຽວຊົມງານເລີ່ມແຕ່ເວລາ 09:00-23:00 ໂມງ.
ງານບຸນຄັ້ງນີ້, ໄດ້ກໍານົດເອົາຂອບເຂດກົມມະລຽນດ້ານໃນເປັນບ່ອນສັກກາລະບູຊາໄຫວ້ພະທາດຫຼວງ ເປັນບ່ອນເຮັດພິທີທາງສາສະໝາ ແລະ ຮີດຄອງປະເພນີ ກໍານົດເຂດກົມມະລຽນດ້ານນອກບໍ່ມີການຂາຍສິນຄ້າທຸກປະເພດ ຍົກເວັ້ນດອກໄມ້ ທູບທຽນບູຊາ ແລະ ກິດຈະກໍາທີ່ຄະນະກໍາມະການອະນຸຍາດ ສະເພາະເຂດສະໜາມຫຼວງແບ່ງອອກເປັນ 4 ເຂດຄື:
ເຂດ A ດ້ານເໜືອນັບແຕ່ແຈຕິດຖະໜົນໄກສອນ ພົມວິຫານຫາທາງເຂົ້າສະພາແຫ່ງຊາດດ້ານເໜືອແມ່ນເປັນບ່ອງວາງສະແດງ-ຈໍາໜ່າຍສິນຄ້າປະເພດບໍລິສັດຂາອອກ-ຂາເຂົ້າ ສິນຄ້າໃຊ້ສອຍທົ່ວໄປ ທັງເປັນບ່ອນຈອດລົດຂອງຄະນະກໍາມະການ ແລະ ເຄື່ອງຫຼິ້ນທົ່ວໄປ.
ເຂດ B ຕໍ່ໜ້າສະພາແຫ່ງຊາດຫຼັງໃໝ່ມີລານສາຍຮູບເງົາ ເວທີສະແດງກິດຈະກໍາຂອງໄວໜຸ່ມ ວາງລໍ້ເຄື່ອງດື່ມ ອາຫານເບົາແບບຍຸກໃໝ່ສໍາລັບໄວໜຸ່ມ(ບໍ່ມີເຄື່ອງດື່ມທີ່ເປັນທາດເຫຼົ້າ).
ເຂດ C ນັບແຕ່ແຈສະພາແຫ່ງຊາດດ້ານໃຕ້ຫາປະຕູທາງເຂົ້າສວນອານຸສາວະລີເຈົ້າໄຊເສດຖາທິລາດ ພື້ນທີ່ຟຸດບາດທາງແມ່ນວາງສະແດງສິນຄ້າຜະລິດຕະພັນພາຍໃນ ແລະ ສິນຄ້າຄອບຄົວຕົວແບບຂອງ ນວ ສໍາລັບພື້ນທີ່ທາງກາງເດີ່ນສະໝາມຫຼວງແມ່ນຕົບແຕ່ງເປັນເຂດວາງສະແດງການທ່ອງທ່ຽວ ວາງສະແດງສິນຄ້າ ແລະ ຜະລິດຕະພັນບັນດານະຄອນທັງພາຍໃນ ແລະ ຕ່າງປະເທດທີ່ຖືກເຊີນ(ເພື່ອເປັນເຂດໃຫ້ແຂກເຂົ້າຊົມທາງການ).
ເຂດ D ນັບແຕ່ທາງເຂົ້າປະຕູສວນອານຸສາວະລີເຈົ້າໄຊເສດຖາ ຫາກໍາແພງຮົ້ວສະຖານີໄຟຟ້າເຂດທາດຫຼວງແມ່ນເປັນບ່ອນຕັ້ງຜາມກໍາມະການ ແລະການວາງສະແດງຂາຍເບັ້ຍໄມ້ກະສິກໍາເນັ້ນເປັນສວນຕົ້ນໄມ້ປະດັບ ແຄມຮົ້ວຟາກກົງກັນຂ້າມແມ່ນວາງສະແດງຈໍາໜ່າຍສິນຄ້າປະເພດອຸດສາຫະກໍາປຸງແຕ່ງພາຍໃນ ກາງເດີ່ນເປັນບ່ອນຕັ້ງເວທີສິນລະປະມວນຊົນ(ເວທີກາງ) ແລະ ບ່ອນຕີຄີໃນງານບຸນ.
ສ່ວນງານວາງສະແດງຂາຍສິນຄ້າຢູ່ສູນການຄ້າລາວ-ໄອເຕັກ ໄດ້ກໍານົດຂາຍສິນຄ້າປະເພດຫັດຖະກໍາ ສິນຄ້າອຸດສາຫະກໍາ ແລະ ເຄື່ອງໃຊ້ສອຍທົ່ວໄປທັງພາຍໃນ ແລະ ຕ່າງປະເທດກໍານົດ 5 ວັນເຊັ່ນດຽວກັນ.
ຂ່າວ: ວຽງຈັນໃໝ່, ພາບ: JCLAOS