ສືບຕໍ່ກະກຽມໃສ່ງານບຸນນະມັດສະການພະທາດຫຼວງວຽງຈັນ

0
1769

ພາຍຫຼັງສຳເລັດບຸນອອກພັນສາປະວໍລະນາ ແລະ ບຸນຊ່ວງເຮືອປະຈຳປີ 2023 ທີ່ທ່າວັດຈັນເມືອງຈັນ ທະບູລີແລ້ວ ນະຄອນຫຼວງວຽງຈັນ (ນວ) ໄດ້ສືບຕໍ່ກະກຽມໃສ່ງານບຸນນະມັດສະການພະທາດຫຼວງວຽງຈັນ ທີ່ຈະໄດ້ຈັດຂຶ້ນທ້າຍເດືອນພະຈິກນີ້ ເພື່ອເຮັດໃຫ້ງານບຸນປະເພນີມີຄວາມສວຍງາມ ແລະ ເປັນລະບຽບຮຽບຮ້ອຍ ຄະນະກະກຽມຮັບຜິດຊອບປະດັບປະດາສະຖານທີ່ງານບຸນນະມັດສະການພະທາດ ຫຼວງວຽງຈັນປະຈຳປີ 2023 ໄດ້ມີການກະກຽມຄວາມພ້ອມດ້ານສະຖານທີ່ຈັດງານໃນນັ້ນໄດ້ເຮັດຮົ້ວນໍາໃຊ້ ໄມ້ໄຜ່ອ້ອມສວນສະພັງເລນ ສວນໄຊເສດຖາ ແລະ ສວນດາວແດງ ປັດຈຸບັນກຳລັງຈັດຕັ້ງປະຕິບັດເພື່ອໃຫ້ ສຳເລັດກ່ອນຮອດງານບຸນ.

ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ນວ ໃຫ້ສຳພາດວັນທີ 30 ຕຸລາ 2023 ວ່າ: ຈາກການຖອດຖອນບົດຮຽນງານບຸນນະມັດສະການ ພະທາດຫຼວງວຽງຈັນປີຜ່ານມາທີ່ເຮັດຮົ້ວອ້ອມດ້ວຍຜ້າໄວນີ້ວເຫັນວ່າມີສີສັນສວຍງາມຂຶ້ນຕື່ມດັ່ງນັ້ນງານບຸນ ປີນີ້ຈຶ່ງໄດ້ມາປຶກສາຫາລືກັນກັບຫຼາຍພາກສ່ວນໂດຍເຫັນດີເປັນເອກະພາບກັນປ່ຽນແປງຮູບແບບໃໝ່ເຮັດ ຮົ້ວອ້ອມດ້ວຍນໍາໃຊ້ວັດຖຸດິບໄມ້ໄຜ່ທີ່ພາຍໃນເຮົາມີເພື່ອເຮັດໃຫ້ສະຖານທີ່ເຂດນີ້ມີຄວາມສວຍສົດງົດງາມ ເປັນການຕ້ອນຮັບກອງປະຊຸມອາຊຽນ ແລະ ປີທ່ອງທ່ອງທ່ຽວລາວ 2024 ການເຮັດຮົ້ວໄມ້ໄຜ່ແມ່ນມີ ຄວາມຍາວ 800 ແມັດ ແລະ ມີຄວາມສູງ 120-150 ຊັງຕີແມັດ ການເຮັດຮົ້ວແມ່ນເຮັດແບບຊົ່ວຄາວໃນ ໄລຍະບຸນນອກຈາກຄວາມສວຍງາມແລ້ວຍັງເປັນການປ້ອງກັນບໍ່ໃຫ້ຄົນທີ່ມາທ່ຽວງານບຸນຢຽບຫຍ້າຢຽບ ດອກໄມ້ຢູ່ໃນສວນ ແລະ ຂາຍເຄື່ອງຊະຊາຍຂອງຊາວຄ້າຂາຍຕື່ມອີກ ຮູບແບບຮົ້ວໄດ້ກຳນົດ 3 ຮູບແບບ ຄື: ແບບລຽບທົ່ວໄປ ແບບຮູບຈອມທາດ ແລະ ແບບໂຄ້ງ ພາຍຫຼັງເຮັດຮົ້ວສຳເລັດຈະໄດ້ນໍາເອົາຮູບພາບ ທີ່ເນັ້ນສະຖານທີ່ທ່ອງທ່ຽວທຳມະຊາດ ວັດທະນະທຳ ແລະ ປະຫວັດສາດ ໂລໂກ້ ແລະ ຄຳຂວັນ ຕ່າງໆເປັນພາສາລາວ ແລະ ພາສາອັງກິດກ່ຽວກັບອາຊຽນມາຕິດໃສ່ຮົ້ວທີ່ມີຂະໜາດຍາວ 3 ແມັດ ສູງ 1 ແມັດ ເຮັດຂອບດ້ວຍໄມ້ໄຜ່ໃຫ້ກົມກືນກັບຮົ້ວ ເຊິ່ງຮູບພາບແຕ່ລະຮູບຈະມີປ້າຍໂລໂກບໍລິສັດ 25 ບໍລິສັດ ສ່ວນງົບປະມານທີ່ມາເຮັດຮົ້ວນີ້ແມ່ນໄດ້ຮັບການອຸປະຖໍາຈາກບໍລິສັດທີ່ນໍາເອົາຮູບພາບມາຕິດໃສ່ ໂດຍຈະ ບໍ່ໄດ້ນໍາໃຊ້ງົບປະມານຂອງລັດ.

ແຫຼ່ງຂ່າວ ວຽງຈັນໃໝ່