ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຈ້ງເຕືອນ ລະດັບນໍ້າ-ນໍ້າເຊກອງ.
ບໍລິສັດ ຫຸ້ນສ່ວນ ເຂື່ອນໄຟຟ້ານໍ້າຕົກພາກກາງ (ອາເລື້ອຍ) ປະເທດ ສ.ສ ຫວຽດນາມ ຈະໄດ້ປ່ອຍນ້ຳອອກຈາກອ່າງເກັບນໍ້າ ໃນເວລາ 12:00 ໂມງ ຂອງວັນທີ 18 ຕຸລາ 2023 ໃນບໍລິມາດການປ່ອຍແມ່ນ; 1.600 ແມັດກ້ອນວິນາທີ, ລະດັບນ້ຳເຊກອງຈຸດວັດແທກບ້ານທ່າຫຼວງເວລາ 7:00 ໂມງ ຂອງວັນທີ 18 ຕຸລາ 2023 ແທກໄດ້ 5,57 ແມັດ ແລະ ຄາດຄະເນວ່າລະດັບນ້ຳ-ນ້ຳເຊກອງແຕ່ວັນທີ 18-20 ຕຸລາ 2023 ຈະມີປະລິມານສູງຂຶ້ນໂດຍສະເລ່ຍປະມານ 9,50-10,50 ແມັດ; (ລະດັບນໍ້າເຂດເຕືອນໄພ: 17,50 ແມັດ; ເຂດ ອັນຕະລາຍ: 18,50 ແມັດ).
ປັດຈຸບັນລະດັບນ້ຳເຊກອງທີ່ເມືອງກະລຶມເກົ່າເວລາ 7:00 ໂມງ ຂອງວັນທີ 18 ຕຸລາ 2023 ແມ່ນຖ້ວມຂົວຂ້າມເຊກອງ ໄປເມືອງກະລຶມໃໝ່ແລ້ວ.
ດັ່ງນັ້ນ, ຈຶ່ງຂໍແຈ້ງເຕືອນເຖິງ ອໍານາດການປົກຄອງ ແລະ ອົງການຈັດຕັ້ງທຸກພາກສ່ວນອ້ອມຂ້າງແຂວງ ແລະ 4 ຕົວເມືອງ, ຕະຫຼອດຮອດພໍ່ຄ້າ-ຊາວຂາຍ, ຫົວໜ່ວຍທຸລະກິດທຸກພາກສ່ວນ ແລະ ພໍ່ແມ່ປະຊາຊົນບັນດາເຜົ່າ ທີ່ຕັ້ງ ຖິ່ນຖານ ຫຼື ທໍາມາຫາກິນຢູ່ລຽບຕາມແຄມແມ່ນໍ້າເຊກອງ ແລະ ບັນດາສາຂາ ຈົ່ງມີສະຕິລະມັດລະວັງຈາກສະພາບການດັ່ງກ່າວທີ່ອາດຈະເກີດຂຶ້ນໄດ້. ພ້ອມນີ້ກໍໃຫ້ຕິດຕາມຂ່າວສະພາບລະດັບນ້ຳຈາກພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ (ຂະແໜງຊັບພະຍາກອນນໍ້າ ແລະ ອຸຕຸນິຍົມ) ໂດຍອອກຂ່າວທາງວິທະຍຸ ແລະ ໂທລະພາບ ຂອງແຂວງເປັນປະຈໍາ.
