ກຸ່ມເຊັນທັນ ຜູ້ປະກອບການຫ້າງຊັບພະສິນຄ້າລາຍໃຫຍ່ຂອງປະເທດໄທ ວາງແຜນງົບປະມານລົງທຶນ ຈຳນວນ 3 ພັນລ້ານບາດ ຍົກລະດັບ ນະຄອນພະນົມ-ໜອງຄາຍ ເພື່ອຮອງຮັບເອົານັກທ່ອງທ່ຽວລາວທີ່ເພີ່ມຂຶ້ນ.
ອີງຕາມການລາຍງານຂອງ Bangkok Post ໄດ້ລາຍງານວ່າ: ກຸ່ມເຊັນທັນ ກຳລັງດຳເນີນການເປີດຫ້າງຊັບພະສິນຄ້າແຫ່ງໃໝ່ທີ່ໜອງຄາຍ ໃນປີ 2024 ດ້ວຍເງິນລົງທຶນ 1 ພັນລ້ານ.
ທົດ ຈິລາຖິວັດ ປະທານກຳມະການບໍລິຫານ ກຸ່ມເຊັນທັນ ກ່າວວ່າ ໜອງຄາຍເປັນເຂດພັທະນາເສດຖະກິດພິເສດ ເປັນເມືອງຊາຍແດນຕິດກັບນະຄອນຫຼວງວຽງຈັນ ແລະ ແຂວງບໍລິຄຳໄຊ ສປປ ລາວ ມີຈຸດຜ່ານຊາຍແດນດ່ານມິດຕະພາບໄທ-ລາວ ເປັນປະຕູການຄ້າກຸ່ມປະເທດອິນໂດຈີນ ເຮັດໃຫ້ເປັນທີ່ນິຍົມໃນການເດີນທາງມາຊື້ເຄື່ອງໃຊ້ສອຍຂອງປະເທດເພື່ອນບ້ານ ແລະ ຍັງມີແຜນພັດທະນາລະບົບຂົນສົ່ງທາງບົກ ທາງຮາງ ລົດໄຟທາງຄູ່ ລົດໄຟຄວາມໄວສູງ ເຊື່ອມຕໍ່ລະຫວ່າງ ໄທ ລາວ ຈີນ ຄຸນໝິງ ໃນອະນາຄົດອີກດ້ວຍ.
ໃນໜອງຄາຍ ມີມູນຄ່າການຄ້າລະຫວ່າງຊາຍແດນໄທ-ລາວ ສູງທີ່ສຸດຂອງໄທ ປີລະບໍ່ຕ່ຳກວ່າ 8 ໝື່ນລ້ານບາດ ມີນັກທ່ອງທ່ຽວຫຼາຍກວ່າ 2 ລ້ານເທື່ອຄົນຕໍ່ປີ ສ້າງລາຍຮັບໃນພາກທ່ອງທ່ຽວຫຼາຍກວ່າ 3.350 ລ້ານບາດ.
ນອກນີ້ຍັງວາງງົບປະມານ 2 ພັນລ້ານບາດ ເພື່ອສ້າງຫ້າງຊັບພະສິນຄ້າຢູ່ ນະຄອນພະນົມ ໃນປີ 2024 ເຊັ່ນກັນ ທັ້ງນີ້ ນະຄອນພະນົມ ກໍມີຊາຍແດນຕິດກັບເມືອງທ່າແຂກ ແຂວງຄຳມ່ວນ ສປປ ລາວ ໂດຍມີຂົວມິດຕະພາບ ແຫ່ງທີ 3 ເປັນເສັ້ນທາງຄົມມະນາຄົມໄປມາຫາສູ່ກັນ ຮອງຮັບການເດີນທາງ ການຂົນສົ່ງດ້ານການຄ້າ ແລະ ການທ່ອງທ່ຽວ.
ໃນນະຄອນພະນົມມີນັກທ່ອງທ່ຽວປະມານ 5 ລ້ານເທື່ອຄົນຕໍ່ປີ ສ້າງລາຍຮັບໃນພາກທ່ອງທ່ຽວຫຼາຍກວ່າ 2.200 ລ້ານບາດ.
ການລົງທຶນຂອງກຸ່ມເຊັນທັນໃນທັງ 2 ຈັງຫວັດນີ້ ຈະຊ່ວຍການເຕີບໂຕທາງເສດຖະກິດ ການຄ້າ ການລົງທຶນ ການບໍລິການ ແລະ ການທ່ອງທ່ຽວໃນປະເທດລຸ່ມແມ່ນ້ຳຂອງເຊັ່ນ ໄທ ລາວ ມຽນມາ ກຳປູເຈຍ ຫວຽດນາມ ແລະ ຈີນ.